1 Ndien edikem ete mme Amalekite ye mme Amulonite ye mme Lamanite emi ekedude ke isɔŋ Amulon, ye ŋko ke isɔŋ Helam, ye emi ekedude ke isɔŋ Jerusalem, ndien ke akpatre, ke kpukpru ŋkanare ŋkuk isɔŋ, emi mikikabakede esit inyuŋ idaha enyiŋ Anti-Nephi-Lehi inɔ idem mmɔ, mme Amalekite ye mme Amulonite ema edemere mmɔ ke iyaresit ebaŋa nditɔ eka mmɔ.

2 Ndien usua mmɔ ama okpon eti eti abaŋa mmɔ, tutu ete mmɔ etɔŋɔ ndisɔŋ ibuot ye edidem mmɔ, tutu ete mmɔ iyomke ete enye edi edidem mmɔ; ke ntak oro, mmɔ etaŋ ŋkpɔ ekɔŋ ekeŋwana ye mbon Anti-Nephi-Lehi.

3 Idahaemi edidem ama ayak ukara ɔnɔ eyen esie, ndien enye okot enyiŋ esie Anti-Nephi-Lehi.

4 Ndien edidem akpa ke ukem isua oro emi mme Lamanite eketɔŋɔde ndinam mbeŋidem mbaŋa ekɔŋ ye ikɔt Abasi.

5 Idahaemi kini Ammon ye nditɔ eka esie ye kpukpru mbon emi ekedɔkde edi ye enye ekekutde mme mbeŋidem mme Lamanite ndiwot nditɔ eka mmɔ, mmɔ edi isɔŋ Midian, ndien do Ammon osobo ye kpukpru nditɔ eka esie; ndien oto do mmɔ edi isɔŋ Ishmael man mmɔ enyene esop ye Lamoni ŋko ye eyen eka esie Anti-Nephi-Lehi, ebaŋa se anade nte mmɔ enam man ekpeme idem mmɔ kabaŋa mme Lamanite.

6 Idahaemi owo ndomo kiet ikiduhe ke otu kpukpru owo emi ekekabare esit enɔ Jehovah emi okoyomde ndimen ŋkpɔ ekɔŋ ŋka ekɔŋ ye nditɔ eka mmɔ; iŋ iŋ, mmɔ imaha kpak ndibeŋidem nnɔ ekɔŋ; iŋ, ndien ŋko edidem mmɔ ama ɔnɔ uyo ete mmɔ ekubeŋ idem.

7 Idahaemi, emi edi mme ikɔ emi enye eketiŋde ɔnɔ mme owo abaŋa ŋkpɔ oro: Ami mɔkɔm Abasi, ndima ikɔt mi, nte ke akwa Abasi nnyin ke mfɔn ɔdɔŋ nditɔ eka nnyin emi, mme Nephite, ɔnɔ nnyin edikwɔrɔ ikɔ enɔ nnyin, ye ndinam nnyin ikabare esit ibaŋa mme ido eke mme ete ibak nnyin.

8 Ndien sese, ami mɔkɔm akwa Abasi mi ke emi enye ɔnɔde nnyin ubak Spirit esie ndimem nnyin esit, man nnyin itɔŋɔ inam ufan ye nditɔ eka emi, mme Nephite.

9 Ndien sese, ami ŋko mɔkɔm Abasi mi, ke nte itɔŋɔde ndinam ufan emi nnyin imikabare esit ibaŋa mme idiɔk ŋkpɔ nnyin, ye uwak uwot owo emi nnyin ikinamde.

10 Ndien ami ŋko mɔkɔm Abasi mi, iŋ, akwa Abasi mi, ke emi enye ayakde nnyin ete nnyin ikabare esit ibaŋa mme ŋkpɔ emi, ye ŋko ete ke enye efen ɔnɔ nnyin uwak idiɔk ŋkpɔ nnyin ye mme uwot owo emi nnyin inamde, onyuŋ emen ndudue osio ke esit nnyin, oto ke mme edidot Eyen esie.

11 Ndien idahaemi sese, nditɔ eka mi, sia edide kpukpru se nnyin ikande inam (ke ntak emi nnyin ikidide mbon emi ekesopde ekan ke ofuri ubon owo) ndikabare esit mbaŋa kpukpru idiɔk ŋkpɔ nnyin ye uwak uwot owo emi nnyin ikinamde, ye ndinam Abasi emen mmɔ osio ke esit nnyin, koro ekedi kpukpru se nnyin ikikande inam ndikabare esit man ekekem ke iso Abasi man enye emen ntɔi nnyin efep—

12 Idahaemi, ndima nditɔ ete mi emi efɔnde ekan, sia Abasi ama ekemen mme ntɔi nnyin efep, ndien akaŋkaŋ nnyin akabare ayama, ke ntak oro yak nnyin ikutɔi mme akaŋkaŋ nnyin aba ye iyip nditɔ ete nnyin.

13 Sese, ami ndɔhɔ mbufo, Iŋ iŋ, yak nnyin inim mme akaŋkaŋ nnyin man mmɔ ekunyene ntɔi iyip nditɔ ete nnyin; koro ndusuk, edieke nnyin ifiakde itɔi akaŋkaŋ nnyin owo idikanke iyet mmɔ eyama aba oto ke iyip Eyen akwa Abasi nnyin, emi ediduɔkde inɔ usio-isop mme idiɔk ŋkpɔ nnyin.

14 Ndien akwa Abasi emi ama enyene mbɔm ɔnɔ nnyin, ndien anam nnyin ifiɔk mme ŋkpɔ emi man nnyin ikutak; iŋ, ndien enye ama ebemiso anam nnyin ifiɔk mme ŋkpɔ emi, ke ntak emi enye akamade ukpɔŋ nnyin kpa nte enye amade nditɔ nnyin; ke ntak oro, ke mbɔm esie ke enye ekedise nnyin oto ke mme angel esie, man enam nnyin ifiɔk uduak erinyaŋa ye mme emana ini iso ŋko.

15 Oh, didie ke Abasi nnyin enyene mbɔm! Ndien idahaemi sese, sia edide se nnyin ikikande inam man emen mme ntɔi nnyin efep ekpɔŋ nnyin, ndien enam mme akaŋkaŋ nnyin eyama, yak nnyin idip mmɔ ifep man enim mmɔ eyama, nte ikɔ ntiense inɔ Abasi nnyin ke akpatre usen, mme ke usen emi edidade nnyin ididida ke ikpe ke iso esie, ete ke nnyin itɔike mme akaŋkaŋ nnyin ye iyip nditɔ eka nnyin tɔŋɔ kini enye ɔkɔnɔde nnyin ikɔ esie ndien anam nnyin isana ito do.

16 Ndien idahaemi, nditɔ eka mi, edieke nditɔ eka nnyin eyomde ndiwot nnyin, sese, nnyin iyidip mmeakaŋkaŋ nnyin, ihŋ, tutu nnyin iyibuk mmɔ ɔtuŋɔ ke isɔŋ, man enim mmɔ eyama, nte ikɔ ntiense ete ke nnyin akananam ikamake mmɔ, ke akpatre usen; ndien edieke nditɔ eka nnyin ewotde nnyin, sese, nnyin iyika ibine Abasi nnyin ndien eyenyaŋa nnyin.

17 Ndien idahaemi edikem ete kini edidem ama eketre nditiŋ mme ikɔ emi, ndien kpukpru mme owo esobo ɔtɔ kiet, mmɔ etaŋ mme akaŋkaŋ mmɔ, ye kpukpru mme ŋkpɔ ekɔŋ emi ekedade eduɔk iyip owo, ndien mmɔ ema ebuk mmɔ ɔtuŋɔ ke isɔŋ.

18 Ndien emi mmɔ ekenam, ke enye ekedide ke enyin mmɔ ikɔ ntiense ɔnɔ Abasi, ye ŋko enɔ mme owo, ete ke mmɔ idikamake mme ŋkpɔ ekɔŋ iduɔk iyip owo aba; ndien emi mmɔ ekenam, eŋwɔŋɔ enyuŋ ediomi ye Abasi, ete utu ke iduɔk iyip nditɔ eka mmɔ ke mmɔ eyesana uwem mmɔ eyak; ndien ete ke utu ke ebɔ nditɔ eka mmɔ ke mmɔ eyenɔ enye; ndien ete utu ke mmɔ ebiat ini mmɔ ke ifu ke mmɔ eyenam utom eti eti ye ubɔk mmɔ.

19 Ndien ke emi nnyin ikut ite, kini ekedade mme Lamanite emi edi ete edibuɔt idem enyuŋ efiɔk akpanikɔ, mmɔ ema enyene nsɔŋɔ-nda, enyuŋ ebɔ ndutuhɔ tutu esim mkpa utu ke enam idiɔk ŋkpɔ; ndien ke ntem nnyin ikut ite ke mmɔ ebuk mme ŋkpɔ ekɔŋ emem mmɔ, mme ke mmɔ ebuk mme ŋkpɔ ekɔŋ, ke ntak emem.

20 Ndien edikem ete nditɔ eka mmɔ, mme Lamanite, ema enam mme mbeŋidem ebaŋa ekɔŋ, enyuŋ edɔk edi isɔŋ Nephi ke ntak ndiwot edidem, ye ndimek efen ke itie esie,ye ŋko ndiwot ikɔt Anti-Nephi-Lehi nsio ke isɔŋ oro.

21 Idahaemi kini mme owo ekekutde ete ke mmɔ edi ndiŋwana ye mmɔ mmɔ ewɔrɔ eka ndisobo ye mmɔ, enyuŋ eyanade idem mmɔ ke isɔŋ ke iso mmɔ, enyuŋ etɔŋɔ ndikot enyiŋ Jehovah; ndien ke ntem ke mmɔ ekedu ke ido emi kini mme Lamanite eketɔŋɔde ndiŋwana ye mmɔ, enyuŋ etɔŋɔ ndiwot mmɔ ye akaŋkaŋ.

22 Ndien ke ntem ke minyeneke ubiɔŋɔ ndomo kiet, mmɔ ema ewot mmɔ tɔsin kiet ye ition; ndien nnyin imifiɔk ete ke ediɔŋ mmɔ, koro mmɔ eka ndiduŋ ye Abasi mmɔ.

23 Idahaemi kini mme Lamanite ekekutde ete ke nditɔ eka mmɔ idifeheke akaŋkaŋ, nko ke mmɔ isike ika ubɔk nnasia mme ufien, edi ete mmɔ ena ke isɔŋ enyuŋ ekpa, enyuŋ etoro Abasi kpa ke ata edinam ndikpa ke akaŋkaŋ oro—

24 Idahaemi kini mme Lamanite ekekutde emi mmɔ ema etre ndiwot mmɔ; ndien ediwak ema edu emi esit mmɔ ɔkɔfuhɔde abaŋa nditɔ ete mmɔ oro emi ekewotde ke akaŋkaŋ, koro mmɔ ekabare esit ebaŋa mme ŋkpɔ emi mmɔ ekenamde.

25 Ndien edikem ete mmɔ etop mme ŋkpɔ ekɔŋ mmɔ enim ke isɔŋ, ndien mmɔ ikiyomke mmɔ aba, koro mmɔ ema efuhɔ ebaŋa mme owo emi mmɔ ema ekewot; ndien mmɔ ena ke isɔŋ kpa nte nditɔ eka mmɔ, edori enyin ke mme mbɔm mbon emi ekemenede ubɔk ndiwot mmɔ.

26 Ndien edikem ete ke usen oro ke ibat owo emi ekedianade ye ikɔt Abasi ema ewak ekan mbon emi ekewotde; ndien mbon emi ema ekewot ekedi ndinen owo, ke ntak oro nnyin inyeneke ntak ndiyik ete ke ema enyaŋa mmɔ.

27 Ndien idiɔk owo ikiduhe ke otu mbon emi ekewotde; edi ema ebe tɔsin kiet emi ekedade edi ifiɔk akpanikɔ; ke ntem nnyin ikut ite ke Jehovah anam erinyaŋa ikɔt esie etibe ke uwak usuŋ.

28 Idahaemi ibat mme Lamanite emi ekewakde ekan emi ekewotde nditɔ eka mmɔ ekedi mme Amalekite ye mme Amulonite, ibat mmɔ emi ekewakde ekan ekedi nte utɔ eke mme Nehor.

29 Idahaemi, ke otu mbon emi eke edianade ye ikɔt Abasi, ndomo kiet ikeduhe emi ekedide mme Amalekite mme mme Amulonite, mme emi ekedide nte utɔ eke Nehor, edi mmɔ ekedi eke ata ubon Laman ye Lemuel.

30 Ndien ke ntem nnyin ikut nte aŋwaŋade, ete ke ini ema ekenam enyin aŋwaŋa mme owo oto ke Spirit Abasi, ndien enyene ediwak ifiɔk ke abaŋa mme ŋkpɔ emi abaŋade nnen nnen ido, ndien eduɔ eduk idiɔk ŋkpɔ ye ndudue, mmɔ ekabare esɔŋ esit ekan akpa, ndien ke ntem idaha mmɔ akabare ɔdiɔk akan nte mmɔ ikifiɔkkɔfiɔk mme ŋkpɔ emi.