Sección 100
Rrevelasiõ oñemeʼẽvaʼekue José Smith upe Proféta ha Sidney Rigdon-pe, Perrysburg, Nueva York-pe, octubre 12, 1833-pe. Koʼã mokõi hermano, imombyrývo hogayguakuéragui heta ára, ojepyʼapyʼimi hesekuéra.
1–4, José ha Sidney omboʼevaʼerã evanhélio angakuéra salvasiõrã; 5–8, Oñemeʼẽta chupekuéra upe aravoitépe umi heʼiʼvaʼerã; 9–12, Sidney haʼéta hérape oñeʼẽva ha José haʼéta peteĩ rrevelador, ha imbaretéva testimóniope; 13–17, Ñandejára omopuʼãta peteĩ tavayguakuéra ipotĩva, ha umi iñeʼẽrendúva ojesalváta.
1 Añetehápe, péicha heʼi peẽme Ñandejára, che angirũnguéra Sidney ha José, pende rogayguakuéra oĩ porã; che pópe oĩ hikuái, ha Che ajapóta hendiekuéra chéve oĩporãháicha, chepype oĩgui opa pokatu.
2 Upévare, chesegi ha pehendu ñemoñeʼẽ Che ameʼẽtava peẽme.
3 Péina ápe, péicha, Che areko heta tavaygua ko tendápe, umi tenda jerereguápe; ha ojepeʼáta peteĩ okẽ iporãva umi tenda jerereguápe ko kuarahyresẽmegua retãme.
4 Upévare, Che, Ñandejára, ahejákuri peju ko tendápe; péicha iporãguikuri chéve angakuéra salvasiõrã.
5 Upévare, añetehápe Che haʼe peẽme, pehupi pene ñeʼẽpu ko tavayguakuérape; peje umi temiandu Che amoĩtava pene korasõme, ha napeneñemoapañuamoʼãi tekovekuéra renondépe;
6 Oñemeʼẽtagui peẽme pe aravoitépe, héẽ, upe javete, umi pejevaʼerã.
7 Ha katu Che ameʼẽ peẽme peteĩ tembiapoukapy, oimeraẽ mbaʼe pejéva che rérape, tojeʼe korasõ añetépe, tekomarangatu espíritu reheve, opa mbaʼépe.
8 Ha Che ameʼẽ peẽme ko promésa, kóva pejapóramo, pe Espíritu Santo oñehẽta otestifika hag̃ua opa mbaʼe peñeʼẽvagui.
9 Ha iporã chéve nde, che rembiguái Sidney, tahaʼe ko tavayguakuéra rérape oñeʼẽva; héẽ, añetehápe, Che roordenáta ko llamamiento-pe g̃uarã, héẽ, haʼe hag̃ua che rembiguái José rérape oñeʼẽva.
10 Ha Che ameʼẽta chupe pokatu testimóniope ipuʼakapa hag̃ua.
11 Ha Che ameʼẽta ndéve pokatu ndepuʼakapa hag̃ua remyesakãvo opa escritura, haʼe hag̃ua hérape oñeʼẽva; ha haʼe haʼéta ndéve g̃uarã peteĩ rrevelador, reikuaa porã hag̃ua opa mbaʼe haʼéva che rreino rehegua ko yvy ári.
12 Upévare, peho meme, ha tovyʼa pene korasõ; ha péina ápe, péicha, Che aime penendive ipaha peve jepeve.
13 Ha koʼág̃a Che ameʼẽ peẽme peteĩ ñeʼẽ Sion rehegua. Sion oñerredimíta, ojejaʼóramo jepe chupe peteĩ ára mbyky aja.
14 Pende joykeʼykuéra, che rembiguái Orson Hyde ha John Gould, oĩ che pópe; ha oñongatúramo hikuái che rembiapoukapykuéra, ojesalváta.
15 Upévare, taiñangapyhy pene korasõ; opa mbaʼe oikótagui umi tekojojápe oikóva ñeimeporãrã, ha tupao ñemomarangaturã.
16 Che amopuʼãtagui chembaʼerã peteĩ tavaygua ipotĩva, cheservítava tekojojápe;
17 Ha opa umi ohenóiva Ñandejára réra ha oñongatúva hembiapoukapykuéra, ojesalváta. Taupéicha. Amén.