Sección 122
Ñandejára ñeʼẽ José Smith upe Profétape, oĩ aja préso Misuri, Liberty kaʼirãime. Ko sección haʼe peteĩ kuatiapehẽ ñeʼẽmbyky Tupaópe, ojefecháva marzo 20, 1839-pe (tojehecha sección 121 moñepyrũ).
1–4, Umi yvy paha oporandúta José Smith rérare; 5–7, Opa iñeimevai ha ijehasaʼasy omeʼẽta chupe tembiesarã ha haʼéta iñeimeporãrã; 8–9, Pe Kuimbaʼe Raʼy oguejyvaʼekue opa umíva guýpe.
1 Umi yvy paha oporandúta nde rérare, umi ivýrova oñembohorýta nderehe ha pe aña retã pochýpe oñemoĩta nderehe;
2 Umi ikorasõ potĩva katu, umi iñarandúva, umi hekomarangatúva ha umi hekopotĩva oheka meméta ñemoñeʼẽ, autorida ha jehovasapy nde pógui.
3 Ha nde tavayguakuéra arakaʼeve ndojeremoʼãi nderehe umi traidor testimónio rupive.
4 Ha hembiapovai ndepoíramo jepe mbaʼevaípe ha rréha ha tápia kupépe, reñemombaʼeguasúta; ha ag̃ui koʼágui ne ñeʼẽpu oporomondyivéta leõ ñarõgui nde rayhuʼỹhakuéra apytépe, nderekojoja rupi; ha nde Tupã neipytyvõta akói ha tapiaite g̃uarã.
5 Reñehenóirõ rehasa hag̃ua jeikoʼasy; reimérõ jehasavaípe hermano-kuéra añeteguaʼỹva apytépe; rehasavairõ mondahakuéra apytépe; reime asýrõ yvy térã yguasúpe;
6 Oñeñeʼẽvaíramo nderehe opáichagua ñeʼẽ japu reheve; oúramo nde ári nderayhuʼỹhakuéra; ndeipeʼárõ hikuái nde ru ha nde sýgui, ndejoykeʼy ha ne reindýgui; ha kysepuku ñeguenohẽme nderayhuʼỹhakuéra ndeipeʼáramo ne rembireko pytiʼágui ha nde rogayguakuéragui, ha nde raʼy tuichavéva, séi áñonte oguerekóva, oñesãingo nde aóre, he´ívo: Che ru, che ru, mbaʼéreiko ndaikatúi repyta orendive? Che ru, mbaʼépa ojapóta nderehe koʼã kuimbaʼe?; ha upérõ, mbaretépe ojehekýi chupe ndehegui, kysepuku ñeguenohẽme, ha rejeguerotyryry kaʼirãime, ha umi nderayhuʼỹva ojerévo nderehe jaguarundi ovecha ruguyreguáicha;
7 Ha rejeitýramo yvykuápe, térã jukaharakuéra pópe, ha reñekondena remano hag̃ua; rejeitýrõ y pypukúpe; umi ypuʼã mbarete oñemoĩramo nderehe; pe yvytu vaietégui oikóramo nde rayhuʼỹha; umi yvága iñypytũramo ha opa eleménto ojoajúramo omboty hag̃ua upe tape; ha koʼýte, pe añaretã rokẽ jepe ojepeʼárõ nemokõ hag̃uáicha, eikuaáke, che raʼy, opa koʼã mbaʼe omeʼẽta ndéve tembiesarã, ha haʼéta ne ñeimeporãrã.
8 Pe Kuimbaʼe Raʼy oguejyvaʼekue opa koʼãva guýpe. Ndetuichavépa nde chugui?
9 Upévare, epyta nde rapépe, ha pe sacerdocio opytáta nendive; umi hembeʼy oñemoĩmbyrégui, ha ndaikatúi ojehasa umíva. Umi nde ára ojeikuaa ha umi ne áño noñemombykymoʼãi; upévare, ani rekyhyje yvypóra ikatúvare ojapo, Tupã oĩtagui nendive akói ha tapiaite g̃uarã.