Sección 33
Rrevelasiõ oñemeʼẽvaʼekue José Smith, pe Proféta rupive, Ezra Thayre ha Northrop Sweet-pe, Fayette, Nueva York, Octubre 1830-pe. Ko rrevelasiõ oñemeʼẽvo guare, José Smith rembiasakuépe oñemoañete, “Ñandejára … akóinte ohekomboʼese, umi jesarekópe ohekáva jerovia reheve”.
1–4, Oñehenói mbaʼapoharakuéra omomarandu hag̃ua pe evanhélio aravo undésimo-pe; 5–6, Oñemoĩ pe Tupao ha umi ojeiporavopyre oñembyatyvaʼerã; 7–10, Peñearrepentíke, yvagakuéra rréino hiʼaguĩmagui; 11–15, Pe Tupao oñemopuʼã evanhélio ita ári; 16–18, Peñembosaʼi pe Menarã oúramo guarrã.
1 Péina ápe, Che haʼe peẽme, che rembiguái Ezra ha Northrop, peipeʼa pende apysa ha pejapysaka Ñandejára pene Tupã ñeʼẽre, máva iñeʼẽ oikove ha ipuʼakapáva, haimbevéva kysepuku haimbejováivagui, oikéva ombojaʼo peve umi kangue joajuha ha karaku, pe ánga ha espíritu; ha ohechakuaáva korasõ remiandu ha pyʼamongeta.
2 Añetehápe, añetehápe, Che haʼégui peẽme peñehenoiha pemopuʼã hag̃ua pene ñeʼẽpu turu pupeguáicha, pemomarandu hag̃ua che evanhélio peteĩ ñemoñareaty hekovai ha hembiapovaívape.
3 Péina ápe, pe ñu morotĩmagui ñemonoʼõrã; ha haʼe pe aravo undésimo, ha ipahaite ahenoitaha mbaʼapoharakuéra che parraltýpe.
4 Ha oñembyaipaitékuri che parralty; ha ndaipóri ojapóva pe iporãva, ndahaʼéiramo mbovymi; ha koʼãva heta hendápe ojavy umi sacerdote-kuéra mbaʼeñemi rupi, opavave iñakã ñembyaipágui.
5 Ha añetehápe, añetehápe, Che haʼe peẽme, che amoĩhague ko tupao ha taveʼỹgui ahenóikuri ichupe.
6 Ha péicha Che ambyatýta umi che aiporavopyréva jepe, irundy yvy rembeʼýgui, opa umi cherehe ogueroviáva jepe, ha ohendúva che ñeʼẽ.
7 Heẽ, añetehápe, añetehápe, Che haʼe ndéve, pe ñu morotĩmaha ñemonoʼõrã; upévare, pemoingue pende kyse karapã, ha pemonoʼõ opa pende puʼaka, pene akãmegua ha pene mbarete reheve.
8 Pejejurupeʼa ha henyhẽta, ha peẽ haʼéta, pe ymaguaréva Nefi-cha, ojeʼoivaʼekue Jerusalén-gui pe taveʼỹme.
9 Heẽ, pejejurupeʼa ha ani pejejoko, ha pende ape oñemyenyhẽta monoʼõmbyrégui, péina ápe, che aimégui penendive.
10 Heẽ, pejurupeʼa ha henyhẽta, pejévo: Peñearrepentíke, peneañearrepentíke, ha pembosakoʼi Ñandejára raperã, ha pemyatyrõ hapekuéra; yvagakuéra rréino hiʼaguĩmagui;
11 Heẽ, peñearrepentíke ha peñemongarai opaite peẽkuéra, pene angaipakuéra rremisiõrã; heẽ, peñemongarai ýpe jepe, ha upérõ oúta tata ha Espíritu Santo rupi ñemongarai.
12 Péina ápe, añetehápe, añetehápe, Che haʼe peẽme, kóva haʼe che evanhélio; ha penemanduʼáke pejeroviavaʼerãha cherehe, térã mbaʼevéicha ndaikatumoʼãi pejesalva;
13 Ha kóva ko ita ári Che amopuʼãta che tupao; heẽ, ko ita ári ningo peñemopuʼã, ha pegueropuʼaka meméramo, umi añaretã rokẽ ndaipuʼakamoʼãi penderehe.
14 Ha peẽ penemanduʼáta tupogua apoukapy ha konveniokuérare, peñongatu hag̃ua.
15 Ha umi oguerekóvape jerovia, pekonfirmáta che tupaópe, po ñemoĩ rupive, ha che ameʼẽta chupekuéra pe Espíritu Santo don.
16 Ha Mormón Kuatiañeʼẽ ha umi escritura marangatu chehegui oñemeʼẽ peẽme, peñehekomboʼe hag̃ua; ha che Espiritu puʼaka omoingove opa mbaʼe.
17 Upévare, pendejeroviarekóke, akóinte peñemboʼévo, pemoĩporã ha pemyendývo umi pene mbaʼerendy, ñandyry reheve, peime hag̃ua ñembosakoʼípe Menarã jejúpe—
18 Ha péina ápe, añetehápe, añetehápe, che haʼe peẽme, che pyaʼe ajutaha. Taupéicha. Amén.