Sección 49
Rrevelasiõ oñemeʼẽvaʼekue José Smith, upe Proféta rupive, Sidney Rigdon, Parley P. Pratt, ha Leman Copley-pe, Kirtland, Ohio-pe, mayo 7, 1831-pe. Leman Copley omog̃uahẽkuri pe evanhélio, ha katu oguerovia gueteri tembladores secta mboʼepykuéra (Sociedad Unida de Creyentes en la Segunda Aparición de Cristo), haʼe oĩhague upe mboyve. Umi tembladores secta oguerovia oikomahague Cristo Jeju Mokõiha, ha Haʼe ojehechaukahague kuña ramo, Ann Lee rupive. Haʼekuéra heʼi natekotevẽiha ýpe ñemongarai. Haʼekuéra ombotove ñemenda ha oguerovia celibato-paitépe jeiko. Oĩ avei temblador heʼíva ani hag̃ua ojeʼu soʼo. Ko rrevelasiõ ñemombyky ramo, José Smith rembiasakuépe ojeʼe, “Aikũmby porãve hag̃ua kóva ko mbaʼe rehe, che aporandu Ñandejárape, ha ahupyty kóva”. Upe rrevelasiõme oñembotove temblador-kuéra aty gueroviapy imbaʼeguasuvéva. Umi hermano oñeñeʼẽ haguégui, ogueraha peteĩ upe rrevelasiõ kópia temblador-kuéra comunidad-pe (Cleveland ypýpe, Ohio-pe), ha omoñeʼẽmbaite chupekuéra, ha katu oñembotove.
1–7, Cristo jeju ára ha aravo ndojeikuaamoʼãi Haʼe ou peve; 8–14, Yvyporakuéra oñearrepentivaʼerã, oguerovia pe evanhélio, ha iñeʼẽrendu umi ordenansakuéra ohupyty hag̃ua salvasiõ; 15–16, Ñemenda oñeordena Tupãre; 17–21, Oñemoneĩ soʼo jeʼu; 22–28, Sion ipotyjera ha lamanita-kuéra rrósaicha ipotýta Jeju Mokõiha mboyve.
1 Pejapysaka che ñeʼẽre, che rembiguaikuéra Sidney ha Parley, ha Leman; péina ápe, añetehápe Che haʼégui peẽme, Che ameʼẽha peẽme tembiapoukapy peho hag̃ua pemboʼe umi temblador-kuérape che evanhélio pehupytyvaʼekue, pehupyty hagueichaite.
2 Péina ápe, Che haʼe peẽme, haʼekuéra oikuaase pehẽnguénte pe añetegua, ha katu ndahaʼéi opaite, ndahekojojáigui che renondépe ha tekotevẽ oñearrepenti.
3 Upévare, Che pombou, che rembiguaikuéra Sidney ha Parley, pemboʼe hag̃ua chupekuéra che evanhélio.
4 Ha che rembiguái Leman oñeordenáta ko tembiapópe, oñomongeta hag̃ua hendivekuéra, ndahaʼéi umi mbaʼe haʼekuéra omeʼẽvare chupe, ha katu umi mbaʼe, che rembiguaikuéra pemboʼétavare chupekuéra; ha péicha ojapóramo Che ahovasáta chupe, upeichaʼỹrõ katu, haʼe noñakãrapuʼãmoʼãi.
5 Péicha heʼi Ñandejára; Che haʼégui Tupã, ha ombouvaʼekue múndope che Raʼy Unihénito, múndo rredensiõrã, ha haʼevaʼekue, upe chupe omog̃uahẽva ojesalváta, ha chupe nomog̃uahẽiva oñekondenáta—
6 Ha ojapoʼakue hikuái Kuimbaʼe Raʼýre jepeve ojaposeháicha; ha haʼe oguerahavaʼekue ipokatu iglória akãtúape, ha koʼág̃a orreina yvágape, ha orreináta oguejy peve yvy ári, omoĩ hag̃ua ipyguýpe opa ihayhuʼỹhakuéra, ha upe aravo hiʼaguĩma—
7 Che, Tupã Ñandejára, añeʼẽvaʼekue upéva; ha katu pe aravo ha ára avave ndoikuaái, ha ndoikuaamoʼãi haʼe ou peve.
8 Upévare, Che rembipota haʼe, opa yvypóra toñearrepenti, opavave oĩ rupi angaipa guýpe, ndahaʼéirõ umi Che aiporavovaʼekue chembaʼerã, kuimbaʼe marangatu ndapeikuaáivagui.
9 Upévare, Che haʼe peẽme, Che ambouhague che konvénio opaveʼỹva, jepeve oĩvaʼekue iñepyrũmby guive.
10 Ha umi Che aprometevaʼekue, Che akumplivaʼekue, ha yvy arigua tetãnguéra oñesũta henondépe; ha ndojapóiramo ijeheguikuéra, ojeitýta chupekuéra, pe ijupe oñembotuicháva koʼág̃a, ojeipeʼátagui ipuʼaka.
11 Upévare, Che ameʼẽ peẽme tembiapoukapy peho hag̃ua ko tavayguakuéra apytépe, ha peje chupekuéra, che rembiguái ymaguaréicha, Pedro heravaʼekue;
12 Peguerovia Ñandejára Jesús ñeʼẽ, upe oikovaʼekue yvy ári, ha oútava, upe iñepyrũmby ha ipaha.
13 Peñearrepenti ha peñemongarai Jesucristo rérape, tembiapoukapy marangatu rupive, angaipakuéra jejorarã;
14 Ha umi péicha ojapóva, ohupytýta pe Espíritu Santo don, Tupao elder-kuéra po ñemoĩ rupive.
15 Ha avei, añetehápe Che haʼe peẽme, umi ombotovéva ñemenda noñeordenái Tupãgui, ñemenda oʼordenágui Tupã yvypórape g̃uarã.
16 Upévare, oĩporã oguereko peteĩ tembireko, ha peteĩ toʼo añónteta hikuái mokõivéva, ha opa koʼã mbaʼe pe yvy okumpli hag̃ua pe propósito ojejapohague;
17 Ha oñemyenyhẽ hag̃ua yvypóra medídare, kóva ojejapo haguéicha, múndo ojejapo mboyve.
18 Ha umi heʼíva ndojeʼuivaʼerãha soʼo, ani hag̃ua yvypóra hoʼu, noñeʼordenái Tupãgui.
19 Ha péina ápe, mymbakuéra ñumegua ha guyra yvytúre ovevéva, ha umi yvýgui osẽva, oñeʼordenavaʼekue yvypóra oiporu hag̃ua, tembiʼu ha aorã, ha hetaporã oguereko hag̃ua.
20 Ha katu noñemeʼẽivaʼekue peteĩ tapicha oguerekove hag̃ua ambuégui, upévare, pe múndo oiko angaipápe.
21 Ha ái pe tuguy oñohẽva, térã oñembosaráiva soʼóre noikotevẽi jave.
22 Ha avei, añetehápe Che haʼe peẽme, Kuimbaʼe Raʼy ndouiha kuñáicha, ni kuimbaʼéicha yvy ári ojeʼóiva.
23 Upévare, aníke avave penembotavy, ha katu peho meme ñemovaʼỹme, pehaʼarõvo yvága ojeityvyro, ha pe yvy oryrýi ha okacha okaʼúvaicha, ha umi yvy ipéva oñemboyvate, ha yvytykuéra oñembokarape, ha umi yvy oñembojojaʼỹva oñembojoja; ha opa koʼãva pe ánhel ombopu vove ituru.
24 Ha katu Ñandejára ára guasu ou mboyve, Jacob ipotýta pe taveʼỹme, ha lamanita-kuéra rrósaicha ipotyjeráta.
25 Sion ipotýta umi yvy puʼãme ha ovyʼáta umi yvytýpe, ha oñembyatýta tenda Che haʼe haguépe.
26 Péina ápe, Che haʼe peẽme, tapeho Che amanda haguéicha; peñearrepenti opa pene angaipakuéragui; pejerure ha oñemeʼẽta peẽme; pehenói ha ojepeʼáta peẽme.
27 Péina ápe, Che aháta pene renonderã ha haʼéta pene moʼãha; ha Che aiméta penembytépe, ha na peñemoapañuamoʼãi.
28 Péina ápe, Che haʼe Jesucristo, ha Che ajupotaitéma. Taupéicha. Amén.