1 Pejapysaka, O che tupaogua tavayguakuéra, heʼi Ñandejára pende Tupã, ha pehendu Ñandejára ñeʼẽ penderehegua—

2 Ñandejára, oútava ñehaʼarõʼỹme itémplope; Ñandejára, oguejýtava múndo ári peteĩ ñeʼẽngái huísio reheve; héẽ, opa tetãnguéra Tupãgui hesaráiva ári, ha opa iñañáva ári oĩva pende apytépe.

3 Omboʼopívotagui ijyva marangatu opa tetãnguéra resa renondépe, ha opa yvy rembeʼy ohecháta Itupã salvasiõ.

4 Upévare, peñembosakoʼi, peñembosakoʼi, O che tavayguakuéra; peñesantifika, peñembyaty, O che tupao tavayguakuéra, Sión retã ári, opa peẽ noñemandaivaʼekuépe pepyta hag̃ua.

5 Pesẽ Babilonia-gui. Penepotĩke peẽ peguaraháva Ñandejára váso.

6 Pehenói pene asamblea marangatu, ha pyʼỹi peñemongeta oñondive. Tohenói opa kuimbaʼe Ñandejára réra.

7 Héẽ, añetehápe Che haʼejey peẽme, ára og̃uahẽma Ñandejára ñeʼẽpu heʼiha peẽme: Pesẽ Babilonia-gui; peñembyaty tetãnguéra apytégui, umi irundy yvytúgui, peteĩ yvága apýra guive, ambue peve.

8 Pemondo che tupaogua elder-kuéra umi tetã mombyryguápe; umi isla del mar-pe; pemondo umi tetã ambuépe; pehenói opa tetãnguéra, hentilkuérape raẽve ha upéi Hudiokuérape.

9 Ha péina ápe, kóva haʼéta isapukái ha Ñandejára ñeʼẽ opa tavayguakuérape: Tapeho Sion retãme, oñembotuicha hag̃ua che tavayguakuéra rembeʼy, ha toñemombarete ijestakakuéra, ha Sion tojeipyso umi tenda jereregua peve.

10 Héẽ, toñehendu sapukái opa tavayguakuéra apytépe: Pepáy ha pepuʼã pemog̃uahẽ Menarãme; péina ápe, ou pe menarã; pesẽ pemog̃uahẽ chupe. Peñembosakoʼi Ñandejára ára guasurã.

11 Peñangarekóke upévare, ndapeikuaáigui ni ára ni aravo.

12 Upéicha, toñani Sion-pe umi hentilkuéra apytépe oĩva.

13 Ha upérõ toñani Jesuralén-pe umi Juda-gua, yvytykuéra Ñandejára rogaguápe.

14 Pesẽ tetãnguéra apytégui, héẽ, Babilonia-gui, tembiapoñaña mbytégui, haʼéva upe Babilonia espiritual.

15 Ha katu añetehápe, péicha heʼi Ñandejára, ani pekañy pyaʼe, ha katu toñembosakoʼi opa mbaʼe penerenonderã; ha aníke omaña tapykue gotyo upe osẽva, ani ou hiʼári peteĩ ñehundi oñehaʼarõʼỹva.

16 Pejapysaka ha pehendu, O yvy ári peikóva. Pehendu oñondivepa, peẽ che tupaogua elder-kuéra, ha pehendu Ñandejára ñeʼẽpu, haʼe ohenóigui opa tekovekuérape, ha omanda opavavépe opa hendápe toñearrepenti.

17 Péina ápe, Tupã Ñandejára omboúkuri upe ánhel osapukái hag̃ua yvága mbytépe, heʼívo: Pembosakoʼi Ñandejára rape, ha pembojoja umi hape, ijeju aravo hiʼag̃uímagui—

18 Upe Cordero oñemboʼýta jave Monte Sion ári, ha hendive ciento cuarenta y cuatro mil, oguerekótava isyvakuérare Itúva réra jehai.

19 Upévare, peñembosakoʼi upe Menarã jejurã; pesẽ, pesẽ pemog̃uahẽ chupe.

20 Ha péina ápe, haʼe oñemboʼýta pe Olivo mónte ári, ha pe oséano imbaretetéva ári, héẽ, pe yguasu pypuku, ha umi mar-pegua isla ári, ha Sion retã ári.

21 Ha ohupíta iñeʼẽpu Sion guive, ha oñeʼẽta Jerusalén guive, ha oñehendúta iñeʼẽ opa tavayguakuéra apytépe.

22 Ha haʼéta peteĩ ñeʼẽpu yeta ryapúicha, ha peteĩ arasunu guasu ñeʼẽpúicha, oitýtava ivýpe umi yvyty, ha ndojejuhumoʼãi umi yvy ipéva.

23 Haʼe omandáta pe yguasu pypukúpe, ha oñemyañáta norte-gua tetãnguéra gotyo, ha umi isla-gui oikóta peteĩ yvy añónte;

24 Ha Jerusalén retã ha Sion retã oujeýta henda teépe, ha pe yvy haʼéta umi ára oñembojaʼo mboyvéicha.

25 Ha Ñandejára, héẽ, upe Salvador, oĩta itavayguakuéra mbytépe ha orreináta opa yvypóra ári.

26 Ha umi oĩva norte-gua tetãnguérape oñeromanduʼáta Ñandejára renondépe; ha iprofetakuéra ohendúta iñeʼẽpu, ha ndojejokomoʼãvéima hikuái; ha oinupãta hikuái umi itaty, ha pe yrypyʼa hykúta henondepekuéra.

27 Ha oñemopuʼãta peteĩ tape pyrusu pe yguasu pypuku mbytépe.

28 Ihayhuʼỹhakuéragui oikóta présa chupekuéra g̃uarã,

29 Ha umi mbaʼeve heñoʼỹha yvy perõgui osẽta umi y oikovéva ykua; ha pe yvy ikãva ndaijyʼuheimoʼãvéima.

30 Ha oguerúta hikuái imbaʼerepykueraita Efraín raʼykuérape, che rembiguaikuéra.

31 Ha umi yvytyʼi opaveʼỹva rembeʼy oryrýita henondepekuéra.

32 Ha upépe oñesũta hikuái, ha oñekoronáta glória reheve, héẽ, Sion-pe, Ñandejára rembiguaikuéra po rupive, Efraín raʼykuéra jepeve.

33 Ha henyhẽta hikuái vyʼapavẽ opaveʼỹva purahéi reheve.

34 Péina ápe, kóva haʼe Tupã opaveʼỹva jehovasa umi Israel-gua trívu ári, ha jehovasa tuichavéva Efraín ha iñirũnguéra akã ári.

35 Ha avei umi Judá trivugua, ijehasaʼasy rire, ojepurifikáta santidápe Ñandejára renondépe, oiko hag̃ua hendive ára ha pyhare, akói ha tapiaite g̃uarã.

36 Ha koʼág̃a, añetehápe heʼi Ñandejára, ojeikuaa hag̃ua koʼã mbaʼe pende apytépe, O yvy ári peikovéva, Che amboúkuri che ánhel, oĩva ojehechaukavaʼekuépe, oveve hag̃ua yvága mbytére, oguerekóvo pe evanhélio ijapyraʼỹva, ha omeʼẽkuri yvypórape, ha ojehechaukáta heta ko yvy ári oikóvape.

37 Ha ko evanhélio oñemboʼéta opa tetã, ha avaretã, ha ñeʼẽ ha tavayguápe.

38 Ha Tupã rembiguaikuéra osẽta, heʼívo hatã ñeʼẽpúpe: Pekyhyje Tupãgui ha pemeʼẽ chupe glória, ihuísio aravo og̃uahẽmagui;

39 Ha petupãitũ upe ojapovaʼekuépe yvága, ha yvy ha yguasu, ha ykuéra yvu—

40 Pehenóivo Ñandejára réra ára ha pyhare, pejévo: O rembokuangaʼuraʼe umi yvága; reguejyngaʼuraʼe; tahykungaʼuraʼe umi yvyty ne renondépe.

41 Ha oñembohováita iñakã arikuéra; Ñandejára ñeime haʼétagui tata mboyku ohapývaicha, ha tata y ombopupúvaicha.

42 O Ñandejára, nde reguejýta reikuaauka hag̃ua nde réra umi nderayhuʼỹvape, ha opa tetãnguéra oryrýita ne renondépe—

43 Rejapo vove umi mbaʼe ivaietéva, umi mbaʼe haʼekuéra ohaʼarõʼỹva;

44 Héẽ, reguejy vove, ha umi yvyty hyku ne renondépe, remog̃uahẽta upe horýva ha hembiapo rekojojávape, pe imanduʼávape nderehe nde rapére.

45 Múndo ñepyrũmby guive tekovekuéra ndojapysakái ni nohendúi ijapysápe, ni avave tesa ohechaʼỹva, ndahaʼéiramo nde, O Tupã, tuichaite mbaʼe rembosakoʼivaʼekue upe neraʼarõvape g̃uarã.

46 Ha ojeʼéta: Mávapa ko Tupãgui oguejýva yvágape ao oñembosaʼýva reheve; héẽ, tenda ojeikuaaʼỹvagui, ijao gloriósope oñemondéva, oúva ipokatu guasúpe?

47 Ha haʼe heʼíta: Che upe añeʼẽvaʼekue tekojojápe, ipuʼakapáva oporosalva hag̃ua.

48 Ha pytãta Ñandejára aokuéra; ha umi ijao uvañamiha opyrũvaʼekuéicha.

49 Ha tuichaitétagui iñeime glória, kuarahy ñemotĩme omokañýta hova, ha jasy ojokóta hesape, ha mbyjakuéra ojeitýta hendágui.

50 Ha oñehendúta iñeʼẽpu: Che apyrũmbákuri cheʼaño pe uvañamiháre, ha aguerúkuri huísio opa tavayguakuéra ári; ha avave noĩrikuri chendive;

51 Ha apyrũmbákuri hesekuéra che ñekoʼõime, ha Che apyrũ hesekuéra che pochýpe, ha huguykuérape ahypyipákuri amondéva ha omongyʼapa che aokuéra; kóva haʼégui vengánsa ára oĩvaʼekue che korasõme.

52 Ha koʼág̃a che rredimidokuéra áño og̃uahẽma; ha imanduʼáta hikuái Ñandejára mborayhu porãre, ha opa mbaʼe haʼe omoĩvaʼekue hiʼarikuéra ipyʼaporãme, ha iporiahuvereko mborayhúpe, akói ha tapiaite g̃uarã.

53 Opa ijehasaʼasykuérape haʼe oñembohasaʼasyvaʼekue. Ha pe ánhel hendivegua osalva chupekuéra; ha imborayhu ha iporiahuverekópe haʼe orredimivaʼekue chupekuéra, ha oñangarekovaʼekue hesekuéra, ha oguerahavaʼekue chupekuéra opa ára ymaguarépe;

54 Héẽ, ha avei Enoc-pe ha umi hendive oĩvaʼekuépe; ha profetakuéra haʼe mboyveguarépe; ha avei Noé ha umi haʼe mboyveguarépe; ha avei Moisés-pe, ha umi haʼe mboyveguerépe;

55 Ha Moisés-gui Elías-pe, ha Elías-gui Juan-pe, oĩvaʼekue Cristo-ndi ijeikovejeýpe, ha umi sánto apóstol, Abraham, Isaac ha Jacob-ndi, oĩta Cordero renondépe.

56 Ha santokuéra ñeñotỹha ojepeʼáta; ha osẽta hikuái ha oñemboʼýta pe Cordero po akatúape, haʼe oñemboʼy vove Monte Sion ári, ha tavaguasu marangatu ári, pe Jerusalén Pyahu; ha opurahéita hikuái pe Cordero purahéi, ára ha pyhare akói ha tapiaite g̃uarã.

57 Ha upéva rupi, tekovekuéra ohupyty hag̃ua umi glória ojeikuaaukátava, Ñandejára omboúkuri iñevanhélio plenitu, ikonvénio opaveʼỹva, ohesaʼỹijóvo hasyʼỹme ha tesakãme—

58 Ombosakoʼi hag̃ua umi ikangývape umi mbaʼe yvy ári oútavape g̃uarã, ha Ñandejára rembiaporã upe ára umi ikangýva omoapañuãitahápe umi iñarandúvape, ha pe michĩvévagui oikóta peteĩ tetã mbarete, ha mokõi omuñáta ideséna de millares-pe.

59 Ha umi mbaʼe yvy arigua ikangýva rupi, Ñandejára omboykéta tetãnguérape Ijespíritu pokatu rupive.

60 Ha upéva rupi oñemeʼẽvaʼekue koʼã tembiapoukapy; oñemandavaʼekue oñeñomi hag̃ua múndogui ára umíva oñemeʼẽrõguare, ha katu koʼág̃a ohovaʼerã opa yvypórape—

61 Ha kóva, Ñandejára orreináva opa yvypóra ári heʼiháicha ha oipotaháicha.

62 Ha pe oñearrepentíva ha oñesantifikávape Ñandejára renondépe oñemeʼẽta tekove ijapyraʼỹva.

63 Ha umi nohendúiva ári Ñandejára ñeʼẽpu oñekumplíta proféta Moisés ohaivaʼekue, ojepeʼataha hikuái tavayguakuéra apytégui.

64 Ha avei proféta Malaquías ohaivaʼekue: Péina ápe, oúgui pe ára tatakua hakúicha, ha opa oñembotuicháva ha hekoñañáva haʼéta ñana pirúicha; ha upe ára oútava ohapýta chupekuéra, heʼi Jehová de los ejércitos, ha ndohejamoʼãi hesekuéra hapo ni hakã.

65 Upévare, kóva haʼéta Ñandejára ñembohovái chupekuéra g̃uarã:

66 Ára Che ajurõguare umi che mbaʼévape, mavave pende apytépe nachemog̃uahẽi, ha peñemosẽkuri okápe.

67 Che ahenói jeýrõ, ndaipórikuri pende apytépe ombohováiva; upevére, che jyva noñemombykýikuri ni michĩmi, Che ndaikatúi hag̃ua pororredimi, ni che pokatu poromoʼã hag̃ua.

68 Péina ápe, che jehavirápe Che amokã yguasu. Che ajapo yvy perõ umi ysyrýgui; hyakuãvaipa umi ipira ha omano yʼuhéigui.

69 Amonde pytũgui yvagakuéra, ha silísiogui ajapo ijahoja.

70 Ha kóva oúta peẽme che pógui—vyʼaʼỹme pejeitýta.

71 Péina ápe, ndaipóri penemosãsovaʼerã; napeneñeʼẽrendúigui che ñeʼẽpúre pohenoirõguare yvágagui; ndapegueroviái che rembiguaikuérape, ha oñembourõguare peẽme, napemog̃uahẽi chupekuéra.

72 Upévare, osellákuri hikuái upe testimónio ha ojokua upe léi, ha peẽ peñemeʼẽkuri umi pytũmbýpe.

73 Koʼãva ohóta umi pytũmby okapeguápe, oĩháme tasẽ ha pyahẽvai, ha tái pururũ.

74 Péina ápe, Ñandejára pende Tupã oñeʼẽvaʼekue. Amén.