Sección 97
Rrevelasiõ oñemeʼẽvaʼekue José Smith, upe Proféta rupive, Kirtland, Ohio-pe, agosto 2, 1833-pe. Ko rrevelasiõ oñeʼẽve santokuéra Sion, Jackson kondádo, Misuri-gua mbaʼekuérare, oñembohováivo porandu Proféta ojapoʼakue Ñandejárape ohupyty hag̃ua mbaʼekuaarã. Upe ára, tupao miembro-kuéra oikóva Misuri-pe, ohasákuri hína ñemuña vai ha, upe julio 23, 1833-pe, ojejopýkuri chupekuéra ofirma hag̃ua peteĩ ñeʼẽmegua akuérdo osẽ hag̃ua Jackson kondádogui.
1–2, Heta Santokuéra Sion-pe oikóva (Jackson kondádo, Misuri) ojehovasa ijeroviarekógui; 3–5, Oñemomorã Parley P. Pratt-pe hembiapokuérare Sion mboʼehaópe; 6–9, Umi oñongatúva ikonveniokuérare ojerohory Ñandejárare; 10–17, Oñemopuʼãvaʼerã peteĩ óga Sion-pe, umi ikorasõ potĩva ohechataha Tupãme; 18–21, Sion haʼe umi ikorasõ potĩva; 22–28, Ñandejára tukumbo ndohupytymoʼãi Sion-pe ijeroviarekóramo.
1 Añetehápe Che haʼe peẽme, che angirũnguéra, Che añeʼẽ peẽme che ñeʼẽpúpe, jepeve che Espíritu ñeʼẽpu, Che ahechauka hag̃ua peẽme che rembipota pende joykeʼykuéra Sion retãmeguáre, heta umíva imirĩ añete ha oheka jesarekópe ohupyty hag̃ua arandu ha ojuhu hag̃ua añetegua.
2 Añetehápe, añetehápe Che haʼe peẽme, ojehovasapyre umíva, ipuʼakátagui hikuái; Che, Ñandejára, ahechaukágui poriahuvereko opa hekomarangatúvape, ha oimeraẽ Che aipotávape, Che ajehustifika hag̃ua agueru vove huísiope chupekuéra.
3 Péina ápe, Sion-gua mboʼehaóre, Che, Ñandejára, haʼe peẽme aguerohoryeteha oĩ haguére peteĩ mboʼehao Sion-pe, ha avei che rembiguái Parley P. Pratt-ndi, opytágui chendive.
4 Ha opyta memérõ chendive, oisãmbyhy meméta Sion retãgua mboʼehao, Che ameʼẽ peve chupe ambue tembiapoukapykuéra.
5 Ha Che ahovasáta chupe hetaiterei jehovasa reheve, opa escritura ha ñemimby ñemyesakãme, mboʼehao ha tupao Sion-pegua edifikasiõrã.
6 Ha mboʼehao rembyrére, Che, Ñandejára, ahechaukase poriahuvereko; upevére, oĩ umi tekotevẽva ojehavira, ha hembiapokuéra ojehechaukáta.
7 Pe hácha oñemoĩma yvyra rapóre; ha opa yvyramáta hiʼa porãʼỹva oñeikytĩta ha ojeitýta tatápe, Che, Ñandejára, haʼékuri.
8 Añetehápe Che haʼe peẽme, opa ijapyteguikuéra oikuaáva ikorasõ japuʼỹva ha oĩha ñembyasýpe, ha ijespíritu imirĩha, ha iñeʼẽrenduse ikonveniokuérare jehasaʼasy rupive—héẽ, oimeraẽ jehasaʼasy, Che Ñandejára, amandáva—koʼãvape che arohory.
9 Che Ñandejára, amoheñóitagui chupekuéra peteĩ yvyramáta hiʼa hetávaicha yvy porãme, ysyry potĩ ykére, omeʼẽva heta yvaʼa repyete.
10 Añetehápe Che haʼe peẽme, che aipota oñemopuʼã chéve g̃uarã peteĩ óga Sion retãme, ojoguáva modélo Che ameʼẽvaʼekue peẽmeicha.
11 Héẽ, pyaʼéke toñemopuʼã, che tavayguakuéra diésmo rupive.
12 Péina ápe, kóva haʼe diésmo ha jehasaʼasy Che, Ñandejára, ajeruréva ipoguikuéra, oñemopuʼã hag̃ua chéve peteĩ óga, Sion salvasiõrã—
13 Peteĩ aguijemeʼẽ renda opa santokuérape g̃uarã, ha peteĩ ñehekomboʼe renda, opa umi oñenehóivape g̃uarã ministério rembiapópe, opa umi illamamiénto ha ofísiope;
14 Iporãmba hag̃ua hikuái iministério ñeikũmbýpe, teoria, principio, ha doctrina-pe, opa mbaʼe haʼéva Tupã rreinoguápe ko yvy ári, umi illavekuéra oñekonferiʼakue peẽme.
15 Ha che tavayguakuéra omopuʼãramo chéve g̃uarã peteĩ óga Ñandejára rérape, ha ndohejái oike ipype mbaʼe kyʼa ombyai hag̃ua, che glória opytuʼúta hiʼári;
16 Héẽ, ha che aiméta upépe, Che ajútagui ipype; ha opa ikorasõ potĩva ipype oikéva, ohecháta Tupãme.
17 Ha katu oñemongyʼárõ, Che ndajumoʼãi ipype, ni che glória noĩmoʼãi upépe; Che ndaikemoʼãigui umi témplo imarangatuʼỹvape.
18 Ha koʼág̃a, péina ápe, Sion ojapóramo koʼã mbaʼe, oñakãrapuʼãta, ha oñembotuicháta ha igloriosaitereíta, ha tuichaiterei ha oporomongyhyjetéta.
19 Ha tetãnguéra yvy arigua omomorãta ichupe, ha heʼíta: Añetehápe Sion haʼe ñande Tupã táva, ha añetehápe Sion ndaikatúi hoʼa ni oñemonguʼe hendágui, Tupã oĩgui upépe, ha Ñandejára po oĩ upépe;
20 Ha haʼe ohurákuri ipokatu puʼaka rupive, haʼetaha isalvasiõ ha iñemoʼãha yvate.
21 Upévare, añetehápe, péicha heʼi Ñandejára, tovyʼa Sion, kóva haʼégui Sion—Umi Ikorasõ Potĩva; upévare, tovyʼa Sion opa umi hekoñañáva ojaheʼo aja.
22 Ha péina ápe, péicha, pyaʼe oúta vengánsa umi iñañáva ári, pe yvytu jeréicha; ha mávapa okañýta pévagui?
23 Ñandejára tukumbo ohasáta pyhare ha ára, ha imomarandu ombohasaʼasýta opa tavayguakuérape; héẽ, ha ndopamoʼãi Ñandejára ou peve;
24 Ñandejára pochykue hendýgui hembiapokyʼakuérare ha opa umi hembiapo ñañáre.
25 Upevére, Sion-pe ndohupytymoʼãi, oñehaʼãramo ojapo opa mbaʼe Che amandáva ichupe.
26 Ha katu noñehaʼãirõ ojapo upe Che amandavaʼekue chupe, avisitáta chupe opa tembiapo ojapo haguéicha, jeikoʼasy vaiete reheve, mbaʼasy vai reheve, plága reheve, kysepuku reheve, vengánsa reheve, ha tatarendy oporohapýva reheve.
27 Upevére, toñemoñeʼẽ ijapysakuérape koʼág̃a añoite, Che, Ñandejára, amboaje iñemeʼẽmby; ha haʼe ndojapovéiramo angaipa, mavavéva koʼã mbaʼe ndoumoʼãi hiʼári;
28 Ha Che ahovasáta chupe jehovasakuéra reheve, ha ambohetáta hetaiterei jehovasa hiʼári, ha iñemoñareatykuéra ári akói ha tapiaite g̃uarã, heʼi Ñandejára pende Tupã. Amén.