1 Ojesella hag̃ua ko kuatiañeʼẽ ha Mormón Kuatiañeʼẽ testimónio, romomarandu José Smith, upe Proféta ha itykeʼýra Hyrum Smith, upe Patriarca martírio. Mokõivévape ojejapíkuri Carthage kaʼirãime, junio 27, 1844-pe, kaʼaru cinco aravo rupi, peteĩ populácho rehe—hova hũmbáva—oĩháme ciento cincuenta ha dociento-rupi tekove armádo. Hyrum-pe raẽve ohupyty umi mbokapu ha pyʼaguapýpe hoʼa, heʼívo: Che haʼe kuimbaʼe omanombyréva! José opo ventána rupi, ha oñehaʼãvo opo hag̃ua, ojejuka válape, heʼívo: O Ñandejára, che Tupã! Omano riréma hikuái, oñembokapu vaipaite hiʼarikuéra ha mokõivépe ohupyty irundy vála.

2 John Taylor ha Willard Richards, mokõi Dosegua, haʼékuri umi tekove añoite oĩvaʼekue pe kotýpe upe ára; peteĩva ojejapi vaietékuri irundy válape, ha katu oĩporã jeýma; ambuéva, Tupã providénsia rupi, ndohupytýikuri ni peteĩ kuára ijaópe.

3 José Smith, Ñandejára Proféta ha Techapahára, ojapovékuri tekove salvasiõrã ko múndope, oimeraẽ ambue oikovaʼekuégui ipype, ndahaʼéirõ Jesús añoite. Véinte ary mbykýpe, haʼe oguenohẽkuri tesakãme Mormón Kuatiañeʼẽ, ombohasavaʼekue Tupã don ha pokatu rupive, ha oguenohẽuka mokõi kontinéntepe; oguerahakákuri upe evanhélio opaveʼỹva plenitu, upe kuatiañeʼẽme oĩva, irundy yvy pehẽgui; oguenohẽvaʼekue umi rrevelasiõ ha tembiapoukapykuéra oĩva ko Doctrina ha Konveniokuéra kuatiañeʼẽme, ha upéicha avei heta ambue dokuménto arandu ha mboʼepykuéra yvypóra raʼykuéra ñeimeporãrã; ombyatýkuri hetaiterei Santokuéra Ára Pahaguápe, omopuʼã peteĩ táva tuicha ha ohejákuri peteĩ téra ha terakuãporã ikatuʼỹva oñehundi. Oikovaʼekue tekoporãme ha omano tekoporãme Tupã ha itavayguakuéra resa renondépe; ha hetave Ñandejára unhídoicha umi ára ymaguarépe, osellavaʼekue imisiõ ha hembiapokue huguy teépe; ha upéicha avei ikyvy Hyrum. Hekovépe noñembojaʼóikuri ha iñemanóme ndojepeʼái ojuehegui!

4 José ohoramoguare Carthage-pe, oñemoĩ hag̃ua umi léi ojerure guaʼúvape, mokõi térã mbohapy ára ojejuka mboyve, heʼíkuri: “Aha ovecharaʼýicha matadérope; ha katu chepyʼaguapy peteĩ arahaku pyharevéicha; areko peteĩ konsiénsia ipotĩva angaipágui Tupãre ha opa tekovekuérare. Che amanóta angaipaʼỹre, ha ojeʼéta uvei cherehe: ojejukákuri tuguy roʼysãme”.—Upe pyharevete, Hyrum, oñembosakoʼi rire oho hag̃ua—jejukahápe, jaʼéta? héẽ, ha upéichakuri—haʼe omoñeʼẽkuri ko párrafo, Eter kapítulo dóse paha mbotápe, Mormón Kuatiañeʼẽme, ha ombope upe kuatiarogue:

5 Ha ojehu ajerure Ñandejárape omeʼẽ hag̃ua grásia Gentil-kuérape, oguereko hag̃ua hikuái karida. Ha ojehu Ñandejára heʼi chéve: Ndoguerekóiramo hikuái karida, upéva ndahaʼéi nde rupive oikóva; nde ndejeroviarekókuri; upévare, nde aokuéra ipotĩta. Ha rehecha haguére nde rekokangy, reñemombaretéta, reguapy peve jepeve tenda che ambosakoʼivaʼekuépe che Ru rogaguasúpe. Ha koʼág̃a, che … amomaitei Gentil-kuérape, héẽ, ha avei che joykeʼykuéra ahayhúvape, rojotopa peve Cristo trivunal renondépe, opa yvypóra oikuaatahápe che ao noñemongyʼaihague pende ruguy rehe. Testador-kuéra koʼág̃a omanóma, ha itestaménto ovaléma.

6 Hyrum Smith ombotýkuri cuarenta y cuatro áño, febrero 1844-pe, ha José Smith ombotýkuri treinta y ocho, diciembre 1843-pe; ha koʼág̃a guive herakuéra ojeipapáta religion-gua mártir apytépe; ha opa tetãygua omoñeʼẽva oikuaáta hepyhague tuguy iporãvéva siglo diecinueve-gua, oñeguenohẽ hag̃ua tupaogua Mormón Kuatiañeʼẽ ha ko Doctrina ha Konveniokuéra, peteĩ múndo ñehundipyre salvasiõrã; ha pe tata ikatúramo ombopiru yvyramáta hovyũva Tupã gloriarã, hasyʼỹetevéta ohapy hag̃ua umi yvyramáta ipirúva opurifika hag̃ua pe víña opa ñembyaígui. Oikovevaʼekue hikuái glóriare; omanovaʼekue hikuái glóriare; ha upe glória haʼe ijopói ijapyraʼỹva. Ñemoñareatýgui ñemoñareatýpe herakuéra ohasáta taʼyrakuérape, jeguakáramo umi oñesantifikavaʼekuépe g̃uarã.

7 Iñangaipaʼỹvaʼekue hikuái opa tembiapovaígui, pyʼỹiete ojehechauka haguéicha upe mboyve, ha oñemoĩvaʼekue hikuái kaʼirãime tekovekuéra rembiapoñemi ha traisiõ rupi añónte; ha huguykuéra iñangaipaʼỹva oñeñohẽvaʼekue Carthage kaʼirãi písope haʼe peteĩ séllo guasu “Mormonismo-re” oñemoĩva, mbaʼeve trivunal mundoguápe ikatúva oñembotove; ha huguykuéra iñangaipaʼỹva Illinois estádo eskúdore, ñeʼẽ jejapyhara igovernador omeʼẽvaʼekue reheve, haʼe peteĩ testimónio evanhélio opaveʼỹva añeteguaha, múndo tuichakue ikatuʼỹva ombohovái, ha huguykuéra iñangaipaʼỹva ñemosãso pavellõ ári, ha Estados Unidos léi guasu ári, haʼe peteĩ Jesucristo evanhélio embajador, opokótava tekovekuéra ijapuʼỹva korasõre opa tetãnguérape; ha huguykuéra iñangaipaʼỹva, opa mártir ruguy iñangaipaʼỹva reheve, Juan ohechavaʼekue upe altar guýpe, osapukáita upe Señor de los Ejercitos-pe, haʼe ovenga peve upe tuguy ko yvy ári. Amén.