1 Pejapysaka O che tupaogua elder-kuéra, ha pehendu umi ñeʼẽ Che haʼétava peẽme.

2 Péina ápe, añetehápe, añetehápe, Che haʼégui peẽme, pehupytyhague peteĩ tembiapoukapy haʼétava léi ramo che tupaópe, upe Che ahenoivaʼekue peẽme rupive, ohupyty hag̃ua umi tembiapoukapy ha rrevelasiõ che pógui.

3 Ha kóva peikuaa añetéta—noñehenoihague peẽme avave ambue ohupyty hag̃ua umi tembiapoukapy ha rrevelasiõ, haʼe ojegueraha peve, opytáramo chendive.

4 Ha katu añetehápe, añetehápe, Che haʼe peẽme, avave ambue noñehenoimoʼãiha ko don-pe, ndahaʼéirõ haʼe rupive; ha ojeipeʼáramo chugui, ndoguerekomoʼãi puʼaka, ndahaʼéirõ ohenói hag̃ua ambuéva hendaguépe.

5 Ha kóva haʼéta peẽme léi ramo: Napemog̃uahẽmoʼãi rrevelasiõ térã tembiapoukapy ramo, umi mboʼepy, avave oúvagui pene renondépe.

6 Ha kóva Che ameʼẽ peẽme ani hag̃ua avave penembotavy, peikuaa hag̃ua umíva ndahaʼeiha chembaʼe.

7 Añetehápe Che haʼégui peẽme, pe cherehe oñeordenáva, oikéta okẽ rupi, ha oñeordenáta, Che haʼe haguéicha peẽme, omboʼe hag̃ua umi rrevelasiõ pehupytyvaʼekue ha pehupytýtava, upe máva che ahenoivaʼekue rupive.

8 Ha koʼág̃a péina ápe, Che ameʼẽ peẽme peteĩ tembiapoukapy, peñembyaty jave oñondive peñohekomboʼe ha peñomokyreʼỹta, peikuaa hag̃ua mbaʼéicha peikovaʼerã ha peisãmbyhyvaʼerã che tupao, ha mbaʼéicha pejapovaʼerã umi púnto che léi ha che rembiapoukapykuéra reheguávape, Che ameʼẽvaʼekue.

9 Ha péicha peñehekomboʼéta che tupao léipe, ha peñesantifikáta umi pehupytyvaʼekue rehe, ha pejapoukáta pendejupe peiko hag̃ua opa marangatúpe che renondépe—

10 Ha upéva pejapoháicha, oñemoĩvéta glória pe rréino pehupytyvaʼekuépe. Ha ndapejapoirõ, ojeipeʼáta, jepeve umi pehupytyvaʼekue.

11 Peñemopotĩ tembiapovai oĩvagui pende apytépe; peñesantifika che renondépe;

12 Ha peipotãrõ umi rréino glória, pehenói che rembiguái José Smith, pe taʼýrape, ha peñangareko hese che renondépe, ñemboʼe jerovia rupive.

13 Ha avei, Che haʼe peẽme, peipotárõ umi rreinogua ñemimby, pemeʼẽ chupe tembiʼu, ao ha oimeraẽ mbaʼe oikotevẽva ojapo hag̃ua tembiapo Che ameʼẽvaʼekue chupe;

14 Ha ndapejapóirõ, haʼe opytáta umi omog̃uahẽvaʼekue chupe ñeimeporãrã, Che amboyke hag̃ua che mbaʼerã, peteĩ tavaygua ipotĩva che renondépe.

15 Ha Che haʼe jey peẽme, che tupaogua elder-kuéra, Che ahenoivaʼekuépe: Napeñemondói peñehekomboʼe hag̃ua, ha katu pemboʼe hag̃ua yvypóra raʼykuérape umi mbaʼe Che amoĩvaʼekue pende pópe, che Espíritu puʼaka rupive;

16 Ha peñehekomboʼéta yvateguágui. Peñesantifika ha peñembyaóta puʼaka reheve, pemboʼe hag̃ua, jepeve Che añeʼẽ haguéicha.

17 Pejapysaka, ha péina ápe, Ñandejára ára guasu hiʼag̃uima.

18 Oúma rupi ára Ñandejára omboputaha iñeʼẽpu yvágagui; umi yvága osusũta ha pe yvy oryrýita, ha Tupã turu ipu puku ha hatãporãta, ha heʼíta tetãnguéra okévape: Pepuʼã santokuéra ha peikove; peẽ angaipa apohára, pepyta ha peke, Che ahenói jey peve!

19 Upévare, pejekuʼajokua, ani pejejuhu umi iñañáva apytépe.

20 Pemopuʼã pene ñeʼẽpu ha ani pembopaha. Pehenói tetãnguérape toñearrepenti, ituja ha imitãvape, oñeñapytĩ ha isãsovape, pejévo: Peñembosakoʼi Ñandejára ára guasúpe g̃uarã.

21 Ha Che, kuimbaʼéva, ahupi che ñeʼẽpu ha pohenói peñearrepenti hag̃ua, ha ndapecherayhúi, mbaʼépa pejéta ára ou vove umi arasunu ohendukávo iñeʼẽpukuéra pe yvy rembeʼy paha guive, oñeʼẽvo opa oikovéva apysápe, heʼívo: Peñearrepenti ha peñembosakoʼi Ñandejára ára guasurã?

22 Héẽ, ha avei, umi aravera omimbi vove kuarahyresẽ guive kuarahyreike peve, ha og̃uahẽ iñeʼẽpukuéra ñeʼẽ opa oikovévape, ha ombohyapu opa umi ohendúva apysa, heʼívo: Peñearrepenti, Ñandejára ára guasu og̃uahẽmagui?

23 Ha avei, Ñandejára oñeʼẽta iñeʼẽpu yvága guive, heʼívo: Pejapysaka, O yvy arigua tetãnguéra, ha pehendu Tupã pende apohare ñeʼẽnguéra.

24 O peẽ, yvy arigua tetãnguéra, mboy ára piko pombyatyvaʼerãmoʼã ryguasu ombyatyháicha iryguasuraʼykuéra umi ipepo guýpe, ha katu ndapeipotáikuri!

25 Mboy ára piko pohenoivaʼekue che rembiguaikuéra juru rupi, ha anhelkuéra ministrasiõ rupive, ha che ñeʼẽpu tee rupive, ha arasunu ñeʼẽpu rupive, ha aratiri ha aravaiete ñeʼẽpu rupive; ha yvyryrýi ñeʼẽpu ha amandáu atã rupive, ha ñembyahýi ha opáichagua mbaʼasy vai ñeʼẽpu rupive; ha peteĩ turuguasu ñeʼẽpu rupive, ha huísio ha poriahuvereko ñeʼẽpu rupive, opa ára pukukue; ha glória ha terakuãporã ñeʼẽpu rupive, ha tekove ijapyraʼỹva rrikésa ñeʼẽpu rupive, ha posalvavaʼeramoʼã, salvasiõ opaveʼỹva reheve, ha katu ndapeipotáikuri!

26 Péina ápe, og̃uahẽma ára, che ñekoʼõi pochykue kópa henyhẽma.

27 Péina ápe, añetehápe Che haʼe peẽme, koʼãva haʼeha Ñandejára pende Tupã ñeʼẽnguéra.

28 Upévare, pembaʼapo, pembaʼapo ipahaite che víñape—ipahaite pehenói umi yvy ári oikovévape.

29 Che árape Che ajútagui huísiope yvy ári, ha che tavayguakuéra oñerredimíta ha orreináta chendive yvy ári.

30 Oútagui pe Milénio tuichaite, Che añeʼẽhague che rembiguaikuéra juru rupi.

31 Satana ojejokuátagui; ha ojejora jey vove, haʼe orreináta peteĩ ára mbyky aja, ha upérõ oúta pe yvy ára paha.

32 Ha pe tekojojápe oikovéva oñemoambuéta peteĩ tesa pirĩme, ha pe yvy opáta tata rupiguáicha.

33 Ha umi iñañáva ohóta tata ogueʼỹvape, ha ipahakuéra, avave tekove yvy arigua ndoikuaái, ha arakaʼeve ndoikuaamoʼãi, ou peve hikuái huísiope che renondépe.

34 Pejapysaka koʼã ñeʼẽre. Péina ápe, Che haʼe Jesucristo, múndo Salvahára. Peñongatu koʼã mbaʼe pene korasõme, ha topytuʼu pene akãme umi ára apyraʼỹmegua solemnida.

35 Peneakãguapýke. Peñongatu opa che rembiapoukapykuéra. Taupéicha. Amén.