Sección 60
Rrevelasiõ oñemeʼẽvaʼekue José Smith, upe Proféta rupive, Independence, Jackson kondádo, Misuri-pe, agosto 8, 1831-pe. Upe ára umi elder ojeʼoiʼakue Jackon kondádope, ha oĩvaʼekue pe yvy ha pe témplo rendag̃ua ojededikárõ guare, oikuaase mbaʼépa ojapovaʼerã hikuái.
1–9, Elder-kuéra omboʼevaʼerã pe evanhélio umi iñañáva atýpe; 10–14, Haʼekuéra noĩreírivaʼerã, ni noñomirĩvaʼerã italentokuéra; 15–17, Haʼekuéra ikatu ojohéi ipy testimónio ramo umi ombotovéva rehe evanhélio.
1 Péina ápe, péicha heʼi Ñandejára itupaogua elder-kuérape, umi pyaʼe oho jeyvaʼerã upe tetã ou haguégui: Péina ápe, chembovyʼa pejuhague koʼápe;
2 Ha katu oĩ máva Che ndaguerohorypáiva, ndojejurupeʼaséigui, ha katu oñomi pe talénto Che ameʼẽvaʼekue chupekuéra, okyhyje rupi yvypóragui. Áina koʼãva, hendýgui che pochy hesekuéra.
3 Ha ojehúta, ndaijeroviarekovéimarõ hikuái cherehe, jepeve umi orekóva, ojepeʼáta chuguikuéra.
4 Che, Ñandejára, arreinágui yvágape, ha soldádo atykuéra yvy arigua apytépe; ha ára Che ambyaty vove oñondivepa umi che jeguakua, opa tekove oikuaáta mbaʼépa Tupã pokatu ohechauka.
5 Ha katu, añetehápe, Che añeʼẽta peẽme pende jeʼói rehe upe tetã peju haguégui. Tojejapo térã tojejogua peteĩ ygára, peẽme oĩporaháicha, peteĩchante chéve, ha pejeʼói pyaʼe, tenda hérava Saint Louis-pe.
6 Ha tojeʼói che rembiguaikuéra Sidney Rigdon, Joseph Smith, upe taʼýra, ha Oliver Cowdery, upe guive Cincinnati peve.
7 Ha tohupi iñeʼẽpu ko tendápe ha tomombeʼu che ñeʼẽ ñeʼẽpu hatãme, ñekoʼõi ha pyʼamokõiʼỹre, ohupívo hiʼarikuéra po marangatu. Che ikatúgui ajapo pendehegui sánto, ha oñeperdona peẽme pene angaipakuéra.
8 Ha tosẽ ambuekuéra Saint Louis-gui, mokõi mokõi, ha tomboʼe upe ñeʼẽ, ndahaʼéi pyaʼépe, umi iñañáva aty apytépe, oho jey peve hikuái umi tupao ou haguégui.
9 Ha opa koʼãva tupaokuéra ñeimeporãrã; pevarã Che amondoʼakue chupekuéra.
10 Ha tomeʼẽ che rembiguái Edward Partridge pirapire, Che ameʼẽvaʼekuégui chupe, peteĩ pehẽngue che elder-kuérape, umi oñemandavaʼekuépe ou jey hag̃ua.
11 Ha pe ikatúva, tomeʼẽ jey pe ahénte rupive; ha pe ndaikatúivape, ndojejeruremoʼãi.
12 Ha koʼág̃a Che añeʼẽ umi oútavare ko tetãme.
13 Péina ápe, oñembouʼakue chupekuéra omboʼe hag̃ua che evanhélio umi aty iñañáva apytépe; upévare, Che ameʼẽ chupekuéra ko tembiapoukapy: Ndereiporuvaimoʼãi nde ára, ni ndereñomimoʼãi ne talénto ani hag̃ua ojekuaa.
14 Ha rejupi rire Sion retãme, ha remomarandu rire che ñeʼẽ, pyaʼe reju jeýta, remombeʼúvo che ñeʼẽ umi aty iñañáva apytépe, ndahaʼéi pyaʼépe, ni ñekoʼõi ni ñorairõme.
15 Ha reityvyróta pe yvytĩmbo nde pýgui umi nanemog̃uahẽiva rehe, ndahaʼéi hovakekuéra, ani rembopochy chupekuéra, ha katu ñemiháme; ha ejohéi umi nde py, testimónio ramo hesekuéra huísio árape.
16 Péina ápe, kóva iporãntema peẽme, ha haʼe upe penembouʼakue rembipota.
17 Ha che rembiguái José Smith, upe taʼýra juru rupive, ojeikuaaukáta Sidney Rigdon ha Oliver Cowdery rehegua. Upe hembýva, tenondeve. Taupéicha. Amén.