Sección 12
Rrevelasiõ oñemeʼẽvaʼekue José Smith, pe Proféta rupive, Joseph Knight, pe túva, Harmony, Pensilvania, Mayo 1829-pe. Joseph Knight, ogueroviákuri José Smith heʼíva oguerekoha hendive Mormón Kuatiañeʼẽ planchakuéra ha pe tembiapo ñembohasa ojejapóva hina upérõ guare rehegua, ha heta ára jave haʼe omeʼẽ ñepytyvõ material José Smith ha chupe ohaívape g̃uarã, ohejáva chupekuéra oho meme ñembohasa rehe. Joseph Knight ojerurégui, Proféta oporandu Ñandejárape ha oñemeʼẽ chupe ko rrevelasiõ.
1–6, Parraltýpe ombaʼapóva ohupytýta salvasiõ; 7–9, Opavave ombaʼapose ha orekóva katupyry ikatu oipytyvõ Ñandejára rembiapópe.
1 Peteĩ tembiapo tuicha ha hechapyrãva oĩ osẽ hag̃uáicha yvypóra raʼykuéra apytépe.
2 Péina ápe, che haʼe Tupã; ehendu che ñeʼẽ oikove ha ipuʼakapáva, haimbevéva kysepuku haimbejováivagui, oikéva ombojaʼo peve umi kangue joajuha ha karaku; upévare, ehendu che ñeʼẽ.
3 Péina ápe, pe ñu morotĩma ñemonoʼõrã; upévare, máva omonoʼõséva, tomoinge ikysekarapã imbarete reheve, ha tomonoʼõ ára ipuku aja, oñongatu hag̃ua hiʼángape g̃uarã salvasiõ opaveʼỹva Tupã rréinope.
4 Heẽ, oimeraẽva omoingéva ikysekarapã ha omonoʼõva, péva oñehenói Tupãgui.
5 Upévare, rejeruréramo chéve, oñemeʼẽta ndéve; rembotáramo, ojepeʼáta ndéve.
6 Koʼág̃a, rejerurégui, péina ápe, haʼe ndéve, eñongatu umi che rembiapoukapy, ha eñehaʼã eguenohẽ ha emoĩmbarete Sion káusa.
7 Péina ápe, añeʼẽ ndéve, ha avei mayma omopuʼãse ha omombareteséva che rembiapo;
8 Ha avave ndaikatúi ombaʼapo ipype térã pe oñemomirĩ ha henyhẽva mborayhúgui, oguerekóva jerovia, ñehaʼarõkuaa ha karida, iñakãguapývo opa mbaʼépe, tahaʼe haʼe pe oñemeʼẽva chupe oñangareko hag̃ua.
9 Péina ápe, che haʼe múndo resape ha rekove, pe haʼéva koʼã ñeʼẽ, upévare, ehendu nde puʼaka katupyry reheve, ha upérõ, reñehenóita. Amén.