Sección 28
Rrevelasiõ oñemeʼẽvaʼekue José Smith, pe Proféta rupive, Oliver Cowdery-pe, Fayette, Nueva York, Setiembre 1830-pe. Hiram Page, Tupaogua miembro, oguereko peteĩ ita ha heʼi, upéva rupi ohupytyha rrevelasiõ, Sion ñemopuʼã ha Tupao orden-pe g̃uarã. Koʼã mbaʼe heta miembro-pe oroviauka añeteguaʼỹ, ha Oliver Cowdery jepe ojegueraha vai. Peteĩ conferencia ojejapo mboyvemi, pe Proféta, ipyʼaite guive oporandu Ñandejárape ko mbaʼe rehe ha ohupyty kóva ko rrevelasiõ.
1–7, José Smith oguereko ministerio-kuéra lláve, ha haʼe añónte ohupyty Tupaópe g̃uarã rrevelasiõ; 8–10, Oliver Cowdery omboʼevaʼerã Lamanita-kuérape; 11–16, Satana ombotavy Hiram Page-pe ha omeʼẽ chupe umi rrevelasiõ añeteguaʼỹva.
1 Péina ápe, Oliver, che haʼe ndéve, oñemeʼẽtaha pe tupao tanerendu oimeraẽ mbaʼe remboʼévape chupekuéra pe Moangapyhyhára rupive, umi rrevelasiõ ha tembiapoukapy che ameʼẽvaʼekue rehegua.
2 Ha katu, péina ápe, añetehápe, añetehápe, che haʼe ndéve, avave noñehenoimoʼãi ohupyty hag̃ua tembiapoukapy ha rrevelasiõ ko tupaópe, ndahaʼéiramo che rembiguái José Smith, pe taʼýra, haʼe ohupytýtagui Moiséicha jepe.
3 Ha nde neñeʼẽrenduvaʼerã umi mbaʼe chupe ameʼẽtavare, Aarón-cha jepe, Tupaópe remombeʼu hag̃ua jeroviarekópe umi tembiapoukapy ha rrevelasiõ, puʼaka ha autorida reheve.
4 Ha oimeraẽ ára pe Moangapyhyhára oñandukáramo reñeʼẽ térã remboʼe hag̃ua, térã opa ára tembiapoukapy ramo pe tupaópe, ikatu rejapo.
5 Ha katu nderehaimoʼãi tembiapoukapy, ha katu arandúpe rehaikuaa;
6 Ha neremandaivaʼerã upe máva ndeʼári omyakãvape, térã haʼéva pe tupao akã;
7 Che ameʼẽgui chupe ministerio-kuéra lláve, ha umi rrevelasiõ ojesellapyréva, ahenói peve chupekuéra ambuéva hendaguépe.
8 Ha koʼág̃a, péina ápe, che haʼe ndéve rehotaha Lamanita-kuérape ha remboʼéta chupekuéra che evanhélio; ha omoguahẽ ramo hikuái ne mboʼepykuéra, remoĩta che tupao ijapytepekuéra; ha reguerekóta umi rrevelasiõ, ha katu ani rehai umíva tembiapoukapy ramo.
9 Ha koʼág̃a, péina ápe, che haʼe ndéve ndojehechaukihague, ni avave yvypóra ndoikuaáiha moõpa oñemopuʼãta Sion tavaguasu, ha katu oñemeʼẽta tenondeve. Péina ápe, che haʼe ndéve haʼetaha umi yvy rembeʼy Lamanita-kuéra ypýpe.
10 Neresẽmoʼãi ko tendágui térã pe conferencia rire; ha pe conferencia ñeʼẽ rupive, che rembiguái José oñehenóita opresidi hag̃ua upéva, ha pe haʼe heʼíva ndéve, péva eréta.
11 Ha avei, tereho nde joykeʼy, Hiram Page ndive, nde ha haʼe peneañoháme, ha eréta chupe umi mbaʼe haʼe ohaivaʼekue pe itágui ndahaʼeiha chembaʼe, ha Satana ombotavyha chupe;
12 Ha péina ápe, noñemeʼẽigui chupe koʼã mbaʼe, ni avave ko tupaópe noñemeʼẽmoʼãi mbaʼeve oñemoĩva tupao konveniokuérare.
13 Opa mbaʼe ojejapovaʼerãgui hekopete ha peteĩ ñeʼẽme pe tupaópe, ñemboʼe jerovia rupive.
14 Ha reipytyvõta toñemoĩporã opa mbaʼe, tupao konveniokuérape oĩháicha, rejeʼói mboyve Lamanita-kuéra apytépe.
15 Ha ojehechaukáta ndéve, ára resẽ guive, ára rejujey peve, mbaʼépa rejapovaʼerã.
16 Ha opa ára rejurupeʼáta, remomarandúvo che evanhélio vyʼapavẽ púpe. Amén.