1 Oliver Cowdery, añetehápe, añetehápe, haʼe ndéve, Ñandejára oikoveháicha, haʼéva ne Tupã ha ne Redentor, katuete rehupytýta kuaapy jepeve opa mbaʼe rejerurévagui chéve, fe reheve, korasõ añetépe, regueroviávo rehupytytaha kuaapy umi jahaipyre ymágui, heta ary guaréva, oguerekóva umi che escritura pehẽngue oñeñeʼẽhague che Espíritu jehechauka rupive.

2 Heẽ, péina ápe, che añeʼẽta ndéve ne akã ha ne korasõme, Espíritu Santo rupive, oguejýtava nde ári ha opytátava ne korasõme.

3 Koʼág̃a, péina ápe, kóva haʼe pe rrevelasiõ espíritu; péina ápe, kóva haʼe pe espíritu Moisés oguenohẽhague rupi Israel raʼykuérape Mar Rojo rupive yvy ikãva ári.

4 Upévare, kóva haʼe ne don; eiporu ha rejehovasáta, nemosãsotagui umi nderayhuʼỹva pógui, ha ndaupéichai ramo, ndejukáta hikuái ha ogueraháta ne ánga ñehundípe.

5 O, nemanduʼáke koʼã ñeʼẽre, ha eñongatu umi che rembiapoukapy. Nemanduʼáke, kóva haʼe ne don.

6 Koʼág̃a, ndahaʼéi kóva añónte ne don; eguerekógui ambue don, haʼéva Aarón don; péina ápe, ohechaukavaʼekue ndéve heta mbaʼe.

7 Péina ápe, ndaipóri ambue puʼaka, ndahaʼéiramo Tupã puʼaka, ikatúva ojapo ko Aarón don toĩ nendive.

8 Upévare, ani ndepyʼaheta, haʼégui Tupã don; ha reguerekóta nde pópe, ha rejapóta tembiapo hechapyrãva; ha mbaʼevéichag̃ua puʼaka oipeʼáta nde pógui, haʼégui Tupã rembiapo.

9 Ha, upévare, oimeraẽ mbaʼe rejeruréva chéve haʼe hag̃ua ndéve, upéva rupi, ameʼẽta ndéve, ha rehupytýta kuaapy upéva rehegua.

10 Nemanduʼáke fe ndereguerekóiramo ndaikatuiha ejapo mbaʼeve; upévare, fe reheve ejerure. Ani remombaʼeʼi koʼã mbaʼe; aníke ejerure pe ejerureʼỹvaʼerã.

11 Ejerure eikuaa hag̃ua umi Tupã ñemimby, ha ikatu hag̃ua embohasa ha ehupyty kuaapy opa umi jehaipyre yma oñeñomivaʼekuégui, imarangatúva; ha fe reguerekoháicha ojejapóta ndéve.

12 Péina ápe, che pe añeʼẽvaʼekue; ha chete haʼe pe añeʼẽvaʼekue ndéve iñepyrũmby guive. Amén.