Doctrina ha Konveniokuéra
Sección 1
Rrevelasiõ oñemeʼẽvaʼekue José Smith, pe Proféta rupive, Noviembre 1, 1831-pe, elder-kuéra Tupaogua conferencia especial aja, ojejapóva Hiram, Ohio-pe. Ko ára mboyve, oñemoguahẽ heta rrevelasiõ Ñandejáragui, ha umi jehai ñembyaty oñeguenohẽ hag̃ua kuatiañeʼẽicha, haʼevaʼekue peteĩva umi mbaʼe guasu oñemoneĩva upe conferencia. Ko sección haʼe Ñandejára moñepyrũ umi doctrina, konvénio ha tembiapoukapy oñemeʼẽvaʼekue ko dispensación-pe.
1–7, Ñemomarandu ñeʼẽ haʼe opa tavayguápe g̃uarã; 8–16, Apostasía ha tekoaña ou Jejujey Mokõiha mboyve; 17–23, José Smith oñehenói omoĩjey hag̃ua yvy ári Ñandejára añetegua ha ipuʼakakuéra; 24–33, Mormón Kuatiañeʼẽ osẽ tesakãme ha oñemoĩ pe Tupao añetegua; 34–36, Pyʼaguapy ojeipeʼáta yvy árigui; 37–39, Pehesaʼỹijo koʼã tembiapoukapy.
1 Pehendu, O che tupao tavaygua, heʼi pe yvate oikovéva ñeʼẽ, ha hesa oĩva opa yvypóra ári; heẽ, añetehápe haʼe: Pehendu, tavayguakuéra mombyrygua; ha peẽ peiméva umi yguasu paʼũme; oñondivepa pejapysaka.
2 Añetehápe, Ñandejára ñeʼẽ oñemeʼẽgui opa yvypórape, ha avave nopiãmoʼãi; ha ndaiporimoʼãi tesa ohechaʼỹtava, apysa ohenduʼỹtava, ni korasõ oñanduʼỹtava.
3 Ha umi hekoñemoĩvape ojopýta heta vyʼaʼỹ; hembiapovaikuéra oñemombeʼúta rupi ogakuéra técho guive, ha umi hembiapo ñemi ojehechaukáta.
4 Ha pe ñemomarandu ñeʼẽ ohóta opa tavayguápe, che remimboʼekuéra juru rupi, aiporavovaʼekue koʼã ára pahápe.
5 Ha ohóta hikuái ha ndaiporimoʼãi ijokohakuéra, che Ñandejára amandágui chupekuéra.
6 Péina ápe, kóva haʼe che autorida ha umi che rembiguái autorida, ha che rembiapokapykuéra kuatiajehaipyrépe g̃uarã moñepyrũ, ameʼẽvaʼekue chupekuéra oguenohẽ hag̃ua peẽme g̃uarã, O yvy ári peikovéva.
7 Upévare, pekyhyje ha peryrýi, O tavaygua, umi mbaʼe che Ñandejára haʼevaʼekue hesekuéra oñekumplítagui.
8 Ha añetehápe che haʼe peẽme, umi osẽva ogueraha hag̃ua koʼã marandu pyahu yvy ári oikovévape, chupekuéra oñemeʼẽ puʼaka osella hag̃ua, mokõive, yvy ári ha yvágape, ogueroviaʼỹva ha hekoñemoĩvape;
9 Heẽ, añetehápe, osella hag̃ua chupekuéra ára Tupã ñekoʼõi oñeñohẽ heta porã vove umi iñañáva ári—
10 Ára Ñandejára oúvo g̃uarã ohepymeʼẽ hag̃ua mayma yvypóra hembiapokuére, ha omedi hag̃ua mayma yvypóra, medída hapichápe omedi haguéicha.
11 Upévare, Ñandejára ñeʼẽ oho yvy opaha peve, opa ohenduséva ohendu hag̃ua:
12 Peñembosakoʼi, peñembosakoʼi umi mbaʼe oútavape g̃uarã, Ñandejára hiʼaguĩmagui;
13 Ha Ñandejára pochy hendy, ha ikysepuku yvágape oñemopotĩ ha oguejýta yvýpe oikovéva ári.
14 Ha ojehechaukáta Ñandejára jyva; ha ára oúta umi nohendúiva Ñandejára ñeʼẽ, ni hembiguaikuéra ñeʼẽ, ni noñatendéiva proféta ha apóstol-kuéra ñeʼẽre, oñemosẽta tavaygua apytégui;
15 Osẽgui hikuái umi che ordenansagui, ha ojapyhara che konveniokuéra opaveʼỹva;
16 Ndohekái hikuái Ñandejárape omopuʼã hag̃ua ihustísia, ha katu opa yvypóra oiko iñakãre, ha itupã raʼanga rapykuéri, haʼanga múndope ojoguáva ha haʼéva peteĩ ídoloicha, ituja ha omanótava Babilonia-pe, Babilonia, pe tuicháva jepe, hoʼátava.
17 Upévare, che, Ñandejára, aikuaávo mbaʼevaiete oútava yvy ári oikovévape, ahenói che rembiguái José Smith, pe taʼýra, ha añeʼẽ chupe yvágagui, ha ameʼẽ chupe tembiapoukapy;
18 Ha ameʼẽ avei tembiapoukapy ambuévape, haʼekuéra omomarandu hag̃ua koʼã mbaʼe múndope; ha opa koʼãva oñekumpli hag̃ua umi proféta ohaivaʼekue—
19 Múndope imbaʼeguasuʼỹva oúta ha oitýta pe imbarete ha ipuʼakapáva, ani hag̃ua yvypóra oñemoñeʼẽ hapichápe, ni omoĩ ijerovia tete jyváre—
20 Ha katu mayma tekove oñeʼẽ hag̃ua Ñandejára pe Tupã rérape, pe múndo Salvahára jepe;
21 Hetave hag̃ua avei fe yvy ári;
22 Oñemoĩ hag̃ua che konvénio opaveʼỹva;
23 Che evanhélio plenitu oñemomarandu hag̃ua umi imbaʼeguasuʼỹ ha iñaranduʼỹva rehe, yvy opaha peve, umi rréi ha sambyhyhára renondépe.
24 Péina ápe, che haʼe Tupã ha añeʼẽvaʼekue; che mbaʼe koʼã tembiapoukapy, ha oñemeʼẽvaʼekue che rembiguaikuérape, iñeʼẽme, ipuʼakaʼỹ jave, ohupyty hag̃ua hikuái ñeikũmby.
25 Ha ojavy jave hikuái, ojeikuaa hag̃ua;
26 Ha oheka jave hikuái arandu, oñehekomboʼe hag̃ua;
27 Ha ojapo jave angaipa, oñedisciplina hag̃ua chupekuéra, oñearrepenti hag̃ua;
28 Ha oñemomirĩ jave, oñemombarete ha ojehovasa hag̃ua yvatégui, ohupyty hag̃ua mbaʼekuaa sapyʼapyʼa.
29 Ha ohupyty rire Nefita-kuéra jehaipyre, heẽ, che rembiguái José Smith, pe taʼýra jepe, toguereko puʼaka ombohasa hag̃ua, Tupã poriahuvereko ha puʼaka rupive, pe Mormón Kuatiañeʼẽ.
30 Ha avei, umi oñemeʼẽvaʼekue koʼã tembiapoukapy, toguereko puʼaka omoĩ hag̃ua ko Tupao pyenda, ha oguenohẽ hag̃ua chupe pytũ ha tatatĩpytũgui, peteĩete Tupao añetegua ha oikovéva opa yvy ape ári, che, Ñandejára, arohoryetéva, añeʼẽvo tupao atýpe ha ndahaʼéi peteĩ teĩme—
31 Che Ñandejára ndaikatúigui ahechaporã pe angaipa ni michĩmi;
32 Upevére, pe oñearrepenti ha ojapóva Ñandejára rembiapoukapy, oñeperdonáta;
33 Ha oñearrepentiʼỹvagui, ojeipeʼáta pe tesape ohupytyvaʼekue jepe; che Espíritu noñorairõmoʼãigui tapiaite yvypóra ndive, heʼi pe Señor de los Ejércitos.
34 Ha añetehápe, che haʼe jey peẽme, O yvy ári oikovéva: Che, Ñandejára, aikuaaukase opa tetépe koʼã mbaʼe;
35 Chéve g̃uarã maymáva peteĩchante, ha aipota opa tavaygua toikuaa pe ára pyaʼe oumaha; pe aravo neʼĩrã gueteri, ha katu hiʼaguĩma, pyʼaguapy ojeipeʼataha yvy árigui, ha pe aña oguerekóta puʼaka iñesambyhyete ári.
36 Ha Ñandejára oguerekóta avei puʼaka isantokuéra ári, ha orreináta imbytepekuéra, ha oguejýta huísio reheve Idumea ári, térã pe múndo.
37 Pehesaʼỹijo koʼã tembiapoukapy, hiʼañete ha ijeroviapýgui, ha umi profesía ha promésa oguerekóva oñekumplipáta.
38 Ha pe che, Ñandejára, haʼéva, che jahaʼéma, ha ndajediskulpái; ha opáramo jepe yvy ha yvága, che ñeʼẽ ndopamoʼãi, ha katu oñekumplipáta, tahaʼe che ñeʼẽ térã che rembiguaikuéra ñeʼẽ rupi, peteĩcha.
39 Ha péina ápe, péina, Ñandejára haʼe Tupã, ha pe Espíritu omeʼẽ testimónio, ha pe testimónio añetegua, ha añetegua opyta akói ha tapiaite g̃uarã. Amén.