1 Péicha heʼi Ñandejára, añetehápe, añetehápe, Che haʼe ndéve, che raʼy, oñeperdona ne angaipakuéra, rejerure haguéicha, umi ne ñemboʼe ha ndejoykeʼykuéra ñemboʼe og̃uahẽgui che apysápe.

2 Upévare, rejehovasapyre koʼág̃a rire tenonderã, reguerekóva rreinogua llavekuéra oñemeʼẽvaʼekue ndéve; rréino oúva ipahaite.

3 Añetehápe Che haʼe ndéve, ko rreinogua llavekuéra arakaʼeve ndojeipeʼamoʼãi ndehegui, reime aja ko múndope, ni upe múndo oútavape;

4 Upevére, umi rrevelasiõ oñemeʼẽta nde rupi ambuévape, héẽ, pe tupaópe.

5 Ha umi ohupytýva Tupã rrevelasiõ, toñangarekóke mbaʼéicha oiporu umíva, ani ojapoʼítei, ha kóvape oike kondenasiõme, ha oñapysãnga ha hoʼa ou vove umi aravai ha umi yvytu oipeju ha ou umi amaguasu, ha hoʼa mbarete hogakuérare.

6 Ha añetehápe, añetehápe Che haʼe nde joykeʼykuéra, Sidney Rigdon ha Frederick G. Williams-pe, oñeperdona avei chupekuéra iñangaipakuéra, ha ndéicha avei ojehecha chupekuéra ko rréino paha llavekuéra jererekópe;

7 Ha avei, ne rembiapo rupive, umi proféta mboʼehaogua llavekuéra, Che amandavaʼekue oñemohenda hag̃ua;

8 Koʼãva reheve iporãmba hag̃ua hikuái iministériope, Sion salvasiõrã, ha Israel-gua tetãnguéra, ha opa hentilkuéra ogueroviaháicha;

9 Ne rembiapo rupive ohupyty hag̃ua hikuái pe ñeʼẽ, ha hembiapokuéra rupive toho pe ñeʼẽ yvy paha peve, hentilkuérape raẽve, ha upérõ, péina ápe, ha péicha oujeýta Hudiokuérape.

10 Ha upérõ oúta ára, pokatúpe ojehechaukataha Ñandejára jyva, okonvense hag̃ua tetãnguérape, umi tetã ogueroviaʼỹva, José róga, isalvasiõkuéra evanhéliore.

11 Ojehútagui upe ára, opa tekove ohendúta pe evanhélio plenitu iñeʼẽ ojepokuaaha ha iñeʼẽ teépe, umi ko pokatúpe oñeʼordenavaʼekue rupive, pe Moangapyhyhára ñeisãmbyhy rupive, oñeñohẽʼakue hiʼarikuéra, Jesucristo-pe orrevela hag̃ua.

12 Ha koʼág̃a, añetehápe Che haʼe peẽme, Che ameʼẽ peẽme tembiapoukapy pepyta meme hag̃ua upe ministério ha presidencia-pe.

13 Ha pejapopa vove profetakuéra rehegua ñembohasa, pe presidíta tupaogua mbaʼekuéra ha pe mboʼehaopegua, upe guive tenonderã;

14 Ha sapyʼapyʼa, pe Moangapyhyhára ohechaukataháicha, pehupytýta umi rrevelasiõ pemohesakã hag̃ua umi ñemimby rreinogua.

15 Ha pemoĩta hekópe tupaokuéra, ha pestudiáta ha peikuaáta, ha peñemoarandúta opa aranduka iporãvare ha umi ñeʼẽre, umi ñeʼẽ jepokuaaháre, ha tavayguakuérare.

16 Ko kóva haʼéta pene rembiaporã ha pene misiõ opa pende rekove pukukue, pe presidi umi konsého ha pemoĩ hekópe opa ko tupao ha rréino mbaʼekuéra.

17 Ani petĩ, ni peneapañuãi; ha katu toñeñemoñeʼẽ peẽme opa peneñembotuicha ha orgúllore, kóva omoñuhágui pene angakuéra.

18 Pemoĩ pende rogapy hekópe; pemomombyry pendejehegui ateʼỹ ha tekokyʼa.

19 Koʼág̃a, añetehápe Che haʼe ndéve, toñembosakoʼi peteĩ óga, pyaʼe ikatuveháicha, ne konsehéro ha ohaívape ndéve g̃uarã, haʼéva, Frederick G. Williams.

20 Ha topyta hogayguakuérandi che rembiguái tuja, Joseph Smith, upe túva, pe óga koʼág̃a oikohápe; ha anítei oñevende Ñandejára juru heʼi peve.

21 Ha topyta che konsehéro koʼág̃a oikohápe, haʼéva Sidney Rigdon, Ñandejára juru heʼi peve.

22 Ha pe obispo toñehaʼã jesarekópe ojuhu hag̃ua peteĩ ahénte; ha tahaʼe peteĩ kuimbaʼe orekóva rrikésa ñongatupy—peteĩ kuimbaʼe Tupã ndivegua, ha mbaretéva ijeroviápe—

23 Ha péicha ohepymeʼẽmba hag̃ua opa jedeveha; ani hag̃ua Ñandejára almasẽ opyta vai tavayguakuéra resa renondépe.

24 Pehesaʼỹijo jesarekópe, akóinte peñemboʼe, pegueroviareko, ha opa mbaʼe oikóta peneñeime porarã, peikóramo tekojojápe ha penemanduʼa upe konvénio pejapoʼakuére oñondive.

25 Tamichĩ pende rogayguakuéra, tenondépe che rembiguái tuja Joseph Smith, upe túva, umi haʼeʼỹva rehegua pende rogaygua papapy;

26 Umi mbaʼe oñemeʼẽvaʼekue peẽme pejapo hag̃ua che rembiapo, ani hag̃ua ojeipeʼa pendehegui ha oñemeʼẽ umi hekojojaʼỹvape—

27 Ha péicha rupi ndaikatúi pejapo umi mbaʼe Che amandavaʼekue peẽme.

28 Ha avei, añetehápe Che haʼe peẽme, che aipota che rembiguái Vienna Jaques ohupyty pirapire ohepymeʼẽ hag̃ua hemikotevẽnguéra, ha tojupi Sion retãme;

29 Ha upe pirapire rembyre toñekonsagra chéve g̃uarã, ha toñembojopói chupe che árape.

30 Añetehápe Che haʼe ndéve, iporã chéve tojupi haʼe Sion retãme ha tohupyty peteĩ jehejapyre obispo pógui;

31 Oiko hag̃ua pyʼaguapýpe, ijeroviarekóramo, ha ani ohasa umi hiʼára tekoreípe upe rire tenonderã.

32 Ha péina ápe, añetehápe Che haʼe peẽme, pehaivaʼerãha ko tembiapoukapy, ha pejevaʼerã pende joykeʼykuéra Sion-guápe, maitei joahúpe, Che avei pohenoihague pepresidi hag̃ua Sion che árape.

33 Upévare, anivéma chemyangekói koʼã mbaʼére.

34 Péina ápe, Che haʼe peẽme umi pende joykeʼy oĩva Sion-pe oñepyrũma oñearrepenti, ha anhelkuéra ovyʼa hesekuéra.

35 Upevére, oĩ heta mbaʼe Che ndarohorypáiva; ha ndachembororypái che rembiguaikuéra William E. McLellin ha Sidney Gilbert ndive; ha avei pe obispo ha ambuekuéra oreko heta mbaʼe oñearrepenti hag̃ua.

36 Ha katu añetehápe Che haʼe peẽme, Che, Ñandejára, añorairõtaha Sion-ndi, ha akonvenséta imburuvichakuérape, ha ahaviráta chupe ipuʼakapa peve ha oñemopotĩ meve che renondépe.

37 Ndojeipemoʼãigui chupe hendágui. Che, Ñandejára, añeʼẽvaʼekue upéva. Amén.