Sección 99
Rrevelasiõ oñemeʼẽvaʼekue José Smith upe Proféra rupive John Murdock-pe, agosto 29, 1832-pe, Hiram, Ohio-pe. John Murdock omboʼékuri oikóvo pe Evanhélio pukuve peteĩ arýgui, upe aja itaʼyrakuéra—ityreʼỹva isýgui, hembireko Julia Clapp omano rire, abril 1831-pe—oikókuri ambue ogayguakuérandi Ohio-pe.
1–8, John Murdock oñehenói omomarandu hag̃ua upe evanhélio, ha umi chupe omog̃uahẽva, omog̃uahẽ Ñandejárape ha ohupytýta poriahuvereko.
1 Péina ápe, péicha heʼi Ñandejára che rembiguái John Murdock-pe—Reñehenói reho hag̃ua umi tetã kuarahyresẽmeguápe, ógagui ógape, távagui távape, tavaguasúgui tavaguasúpe, remombeʼu hag̃ua che evanhélio opaveʼỹva umi upépe oikóvape, ñemuña ha tembiapoñaña paʼũme.
2 Ha pe nemog̃uahẽva, chéve chemog̃uahẽ; ha reguerekóta puʼaka remombeʼu hag̃ua che ñeʼẽ che espíritu marangatu jehechauka reheve.
3 Ha umi nemog̃uahẽva mitã michĩcha, ohupytýta che rréino; ha ojehovasapyre hikuái, umíva ohupytýtagui poriahuvereko.
4 Ha umi nembotovéva, oñembotovéta che Rúre ha hógagui, ha remopotĩta nde py tapére umi tenda ñemíme testimónio ramo hesekuéra.
5 Ha péina ápe, péicha, pyaʼe Che aju huísiope, akonvense hag̃ua opavavépe umi hembiapoñañágui, ojapovaʼekue hikuái cherehe, ojehaiháicha cherehe pe kuatiañeʼẽme.
6 Ha koʼág̃a, añetehápe Che haʼe ndéve, naiporãi resẽ oñemeʼẽ meve nde raʼykuérape oikotevẽva, ha oñembou pyʼaporãme Sion obispo-pe.
7 Ha saʼi ary rire, reipotáramo chehegui, ikatúta avei reho pe yvy porãme reguereko hag̃ua nde jehejapyre;
8 Upeichaʼỹramo, remboʼe meméta che evanhélio rejegueraha peve. Amén.