Sección 14
Rrevelasiõ oñemeʼẽvaʼekue José Smith, pe proféta rupive, David Whitmer-pe, Fayette, Nueva York, Junio 1829-pe. Whitmer rogayguakuéra oikuaasékuri pe Mormón Kuatiañeʼẽ rehegua. Pe Proféta ohókuri oiko Peter Whitmer, pe túva, rógape, oiko haguépe tembiapo ñembohasa rehegua, ojejapopa peve, ha ojehupyty pe kuatiañeʼẽ oñeimprimítava rehegua propieda literaria. Mbohapy pe Whitmer familia, ohupytývo opavave peteĩ testimónio pe tembiapo añeteteha, ipyʼambytete guive ojepyʼapy hikuái hembiaporãkuéra teére. Kóva ko rrevelasiõ ha umi mokõi hapykuerigua (umi sección 15 ha 16) oñemeʼẽkuri oñembohovái hag̃ua ñeporandu ojejapovaʼekue upe Urim ha Tumim rupive. Tenondeve, David Whitmer-gui oiko peteĩ umi Mbohapy Testígo Mormón Kuatiañeʼẽmegua.
1–6, Parraltýpe ombaʼapóva ohupytýta salvasiõ; 7–8, Tekove Ijapyraʼỹva haʼe tuichavéva Tupã don; 9–11, Cristo ojapovaʼekue umi yvága ha yvy.
1 Peteĩ tembiapo tuicha ha hechapyrãva oĩ osẽ hag̃uáicha yvypóra raʼykuéra apytépe.
2 Péina ápe, che haʼe Tupã; ehendu che ñeʼẽ oikove ha ipuʼakapáva, haimbevéva kysepuku haimbejováivagui, oikéva ombojaʼo peve umi kangue joajuha ha karaku; upévare, ehendu che ñeʼẽ.
3 Péina ápe, pe ñu morotĩma ñemonoʼõrã; upévare, máva omonoʼõséva, tomoinge ikysekarapã imbarete reheve, ha tomonoʼõ ára ipuku aja, oñongatu hag̃ua hiʼángape g̃uarã salvasiõ opaveʼỹva Tupã rréinope.
4 Heẽ, oimeraẽva omoingéva ikysekarapã ha omonoʼõva, péva oñehenói Tupãgui.
5 Upévare, rejeruréramo, oñemeʼẽta ndéve; rembotáramo, ojepeʼáta ndéve.
6 Eñehaʼã eguenohẽ ha emoĩmbarete che Sion. Eñongatu che rembiapoukapykuéra opa mbaʼépe.
7 Ha reñongatúramo che rembiapoukapykuéra ha reñehaʼãramo ipahaite peve, rehupytýta tekove ijapyraʼỹva, tuichavéva opa Tupã don apytépe.
8 Ha ojehúta, rejeruréramo Túvape che rérape, jeroviápe, regueroviávo, rehupytýta pe Espíritu Santo, omeʼẽva ñeʼẽkuaa, nde haʼe hag̃ua testígo umi mbaʼe rehendu ha rehechátavagui, ha avei remomarandu hag̃ua arrepentimiento ko ñemoñareatýpe.
9 Péina ápe, che haʼe Jesucristo, Tupã oikovéva Raʼy, ajapovaʼekue umi yvága ha yvy, peteĩ tesape ndaikatúiva oñeñomi pytũmbýpe;
10 Upévare, aguerahavaʼerã che evanhélio plenitu, Hentilkuéragui Israel rógape.
11 Ha péina, nde haʼe David, ha reñehenói reipytyvõ hag̃ua; ha péva rejapóramo, ha rejeroviarekóramo, rejehovasáta, mokõive, espiritual ha temporalmente, ha tuicháta nde jopói. Amén.