Sección 95
Rrevelasiõ oñemeʼẽvaʼekue José Smith, upe Proféta rupive, Kirtland, Ohio-pe, junio 1, 1833-pe. Ko rrevelasiõ haʼe peteĩ mbojoapy umi ñehekomboʼe marangatu rehegua, oñemopuʼã hag̃ua peteĩ óga adorasiõ ha ñehekomboʼerã, Ñandejára róga (tojehecha sección 88:119–136).
1–6, Ojejaʼo santokuérape nomopuʼãi haguére Ñandejára róga; 7–10, Ñandejára oiporuse Hóga ombyao hag̃ua Itavayguakuérape yvategua puʼaka reheve; 11–17, Upe óga ojededikavaʼerã tenda ojeʼadora hag̃ua ha Apóstol-kuéra mboʼehaorã.
1 Añetehápe, péicha heʼi Ñandejára peẽ Che ahayhúvape, ha umi ahayhúvape, Che ahavira avei, oñeperdona hag̃ua iñangaipakuéra, pe jehavira reheve, Che ambosakoʼígui peteĩ tape aipeʼa hag̃ua chupekuéra jepyʼaraʼãgui opa mbaʼépe, ha Che pohayhúkuri—
2 Upévare, tekotevẽ pejejaʼo ha pepyta jejaʼopyrépe che rova renondépe;
3 Pejapóguikuri cherehe peteĩ angaipa ivaietéva, ndapejesarekói haguére opa mbaʼépe, upe tembiapoukapy guasu Che ameʼẽvaʼekuére peẽme, che róga ñemopuʼã rehegua;
4 Ñembosakoʼi Che ambosakoʼiseha umi che apóstol, akopi hag̃ua che víña ipahaite, ajapo hag̃ua che rembiapo hechapyrãva, añohẽ hag̃ua che Espíritu opa oikovéva ári—
5 Ha katu, añetehápe Che haʼe peẽme, oĩ pende apytépe heta oñeordenaʼakue, umi Che ahenoiʼakue, ha katu mbovy ijapytepekuéra ojeporavo.
6 Umi ndojeporavóiva ojapókuri peteĩ angaipa ivaietereíva, oikógui hikuái pytũmbýpe asaje vove.
7 Ha kóva rupi Che ameʼẽkuri peẽme tembiapoukapy pehenói hag̃ua peteĩ asamblea solemne, umi pene ajúno ha pende jaheʼo ojupi hag̃ua upe Señor de Sabaot apysápe, oñehesaʼỹijóvo heʼiséva ára peteĩha apoha, upe iñepyrũmby ha ipaha.
8 Héẽ, añetehápe Che haʼe peẽme, Che ameʼẽkuri peẽme tembiapoukapy pemopuʼã hag̃ua peteĩ óga, upe óga Che ambyaotahápe yvategua pokatu reheve umi Che aiporavovaʼekuépe;
9 Kóva haʼégui Túva promésa peẽme g̃uarã; upévare, Che amanda peẽme pepyta hag̃ua, jepe che apóstol-kuéraicha Jerusalén-pe.
10 Upevére, che rembiguaikuéra ojapókuri peteĩ angaipa ivaitéva; ha oĩkuri joavy profetakuéra mboʼehaópe; che pyʼapyetevaʼekue, heʼi pene Ñandejára; upévare, Che amosẽkuri chupekuéra ojehavira hag̃ua.
11 Añetehápe Che haʼe peẽme, che aipota pemopuʼã peteĩ óga. Peñongatúramo che rembiapoukapykuéra, pendepuʼakáta pemopuʼã hag̃ua.
12 Napeñongatúiramo che rembiapoukapykuéra, upe Túva mborayhu ndopytamoʼãi penendive; upévare, peikóta pytũmbýpe.
13 Koʼág̃a, ápe oĩ arandu, ha pe Ñandejára potapy—toñemopuʼã peteĩ óga, ani múndo ojapoháicha, Che ndahejáigui peẽme peiko múndo oikoháicha;
14 Upévare, toñemopuʼã pe Che ahechaukataháicha mbohapy pende apyteguápe, pehenói ha peordenátavape ko puʼakápe.
15 Ha pe koty orekóta cincuenta y cinco pies ipyrusukue ha sesenta y cinco ipukukue, hyepýpe.
16 Ha pededikáta chéve g̃uarã iguypegua koty ryepy, pene ofrénda sacramental-rã, ha pe predika hag̃ua, umi pene ajúno ha pene ñemboʼerã, ha peikuaveʼẽ hag̃ua umi pende rembipota imarangatuvéva chéve g̃uarã, heʼi pene Ñandejára.
17 Ha pededika chéve g̃uarã pe koty yvategua che apóstol-kuéra mboʼehaorã, heʼi upe Taʼýra Ahmán; térã, ambue ñeʼẽme, Alfa; térã, ambue ñeʼẽme, Omega; haʼéva, Jesucristo pende Tupã. Amén.