Sección 56
Rrevelasiõ oñemeʼẽvaʼekue José Smith, upe Proféta rupive, Kirtland, Ohio-pe, junio 15, 1831-pe. Ko rrevelasiõme ojejaʼo Ezra Thayre-pe, naiñeʼẽrendúigui peteĩ rrevelasiõ upe mboyveguáre (“tembiapoukapy” oñeñeʼẽvare versículo 8-pe), José Smith ohupytyvaʼekue chupe g̃uarã, ohekomboʼéva Thayre-pe hembiaporã, Frederick G. Williams gránhape, haʼe oiko haguépe. Ko rrevelasiõme ojepeʼa avei Thayre ñehenói oho hag̃ua Misuri-pe, Thomas B. Marsh ndive (tojehecha sección 52:22).
1–2, Santokuéra ojapyhyvaʼerã ikurusu ha osegí Ñandejárape ohupyty hag̃ua salvasiõ; 3–13, Ñandejára omanda ha oipeʼa, ha umi iñeʼẽrenduʼỹvagui ojepoi; 14–17, Aina umi imbaʼehetáva noipytyvõiva imboriahúvape, ha áina umi mboriahu na ikorasõ mirĩriva; 18–20, Ojehovasapyre umi mboriahu ikorasõ potĩva, ojehejátagui chupekuéra pe yvy.
1 Pejapysaka, O tavayguakuéra pemomarandúva che réra, heʼi Ñandejára pene Tupã; péina ápe, hendýgui che pochy umi hekoñemoĩva rehe, ha umíva oikuaáta che jyva ha che pochykue, tetãnguéra ári visitasiõ ha ñekoʼõi árape.
2 Ha pe ndojapyhýiva ikurusu ha chesegí, ha ojapo che rembipoukapykuéra, péva ndojesalvamoʼãi.
3 Péina ápe, Che, Ñandejára, amanda; ha pe naiñeʼẽrendúiva ojepeʼáta che árape, Che amanda rire ha ojejapyharávo pe tembiapoukapy.
4 Upévare, Che, Ñandejára, amanda ha aipeʼa, chéve oĩporãháicha; ha opa koʼãva hoʼáta umi hekoñemoĩva akã ári, heʼi Ñandejára.
5 Upévare, Che aipeʼa pe tembiapoukapy oñemeʼẽvaʼekue che rembiguaikuéra Thomas B. Marsh ha Ezra Thayre-pe, ha ameʼẽ peteĩ tembiapoukapy pyahu che rembiguái Thomas-pe, pyaʼe tojeʼói Misuri retãme, ha che rembiguái Selah J. Griffin ohóta avei hendive.
6 Péina ápe, Che aipeʼágui tembiapoukapy oñemeʼẽvaʼekue che rembiguaikuéra Selah J. Griffin ha Newel Knight-pe, che tavayguakuéra oĩva Thompson-pe rekoñemoĩ ha ñeitĩndyseʼỹ rupi.
7 Upévare, topyta hendivekuéra che rembiguái Newel Knight; ha opa ohoséva ohokuaa, oñembyasýramo che renondépe, ha ogueraháta chupekuéra tetã Che ahechauka haguépe.
8 Ha avei, añetehápe Che haʼe peẽme, tekotevẽ che rembiguái Ezra Thayre toñearrepenti ijorgúllo ha ichenteségui, ha taiñeʼẽrendu tembiapoukapy upe mboyve ameʼẽvaʼekuére chupe, tenda haʼe oikoha rehegua.
9 Ha péva ojapóramo, ndaiporimoʼãigui yvy ñembojaʼo, oñehenóita chupe oho hag̃ua Misuri retãme jepeve;
10 Upéichaʼỹrõ, oñemeʼẽta chupe pirapire ohepymeʼẽʼakue ha ojepeʼáta upe tendágui, ha ojepeʼáta che tupaógui, heʼi pe Señor de los Ejércitos;
11 Ha opáramo jepe yvy ha yvága, che ñeʼẽ ndopamoʼãi, ha katu oñekumplíta.
12 Ha che rembiguái José Smith, upe taʼýra, tekotevẽramo opaga ipirapire, péina ápe, Che, Ñandejára, amyengoviáta chupe Misuri retãme, ikatu hag̃ua umi chupe omeʼẽtava ohupyty jey jopói, haʼekuéra ojapoháicha;
13 Haʼekuéra ojapoháicha, oñemeʼẽtagui chupekuéra, jepeve umi yvy ijehejapyrerã.
14 Péina ápe, péicha heʼi Ñandejára che tavayguakuérape—peguereko heta mbaʼe pejapovaʼerã ha peñearrepenti hag̃ua; péina ápe, ojupígui chéve pene angaipakuéra ha noñeperdonái, pehekágui ñemoñeʼẽ peẽ peipotaháichante.
15 Ha pene korasõ nahenyhẽi. Ha napeñeʼẽrendúi pe añetegua, ha katu peguerovyʼa umi tembiapoñaña.
16 Áina pendehegui tekove irríkova, napemeʼẽséiva penembaʼerepýgui imboriahúvape, pende rrikésa ombyaítagui pene ánga; ha péva haʼéta pende jaheʼo, visitasiõ, huísio ha pochykue árape: Ñemonoʼõ ára ohasáma, arahaku opáma, ha che ánga ndojesalváikuri!
17 Áina pendehegui tekove imboriahúva, pene korasõ mirĩʼỹva, pende espíritu ñembyasyʼỹva, ha pende rye renyhẽʼỹva, pemoĩva pende po ambue tapicha mbaʼerepy ári, pende resa henyhẽva taryrýigui; napembaʼaposéiva pende po tee reheve!
18 Ha katu ojehovasapyre umi mboriahu ikorasõ potĩva, umi ikorasõ mirĩva, umi ijespíritu oñembyasýva, haʼekuéra ohechátagui Tupã rréino, oúva pokatu ha tuicha glóriape, omosãso hag̃ua chupekuéra; imbaʼétagui pe yvy reñói porãngue.
19 Péina ápe, Ñandejára oútagui, ha ijehepymeʼẽ oĩta hendive, ha ombojopóita opa tekovépe, ha umi imboriahúva ovyʼáta;
20 Ha iñemoñareatykuéra ohupytýta upe yvy, ñemoñareatýgui ñemoñareatýpe, akói ha tapiaite g̃uarã. Ha koʼág̃a Che ambopaha che ñeʼẽ peẽme. Taupéicha. Amén.