1 O Tupã, moõ reime? Ha moõ oĩ ogaao ojahoʼíva nde reikoha ñemi?

2 Arakaʼe pevépa rejokóta nde po, ha nde resa, héẽ, nde resa imaraʼỹva, omaʼẽta yvága apyraʼỹ guive umi mbaʼevai ojejapóva nde tavayguakuérare ha ne rembiguaikuérare, ha oikéta nde apysápe umi ijerureʼasy?

3 Héẽ, O Ñandejára, arakaʼe pevépa ohasáta hikuái koʼã mbaʼevai ha jejopy oĩvaíva, oñemohuʼũ mboyve ne korasõ ha henyhẽ mboyve nde ryepy poriahuverekógui hesekuéra?

4 O Ñandejára, Tupã Ipuʼakapáva, yvága, pe yvy, umi yguasu ha opa mbaʼe ipype oĩva apohare, ha ndepuʼakáva ha remoĩva nde poguýpe upe aña, ha Seol-pegua puʼakareko iñypytũ ha hatatĩva—eipyso nde po; eheja nde resa tohecha; tojepeʼa nde rogaao; anivéma oñemoʼã nde reikoha ñemi; tojere nde apysa; tahuʼũ ne korasõ ha tahenyhẽ nde ryepy poriahuverekógui orerehe.

5 Tahendy nde pochy ore rayhuʼỹva rehe; ha ne korasõ ñekoʼõime, ore venga nde kysepukúpe ore mbaʼevaikuéragui.

6 Nemanduʼáke ne santokuéra ohasaʼasývare, O ore Tupã, ha umi ne rembiguái ovyʼáta nde rérape akoiete g̃uarã.

7 Che raʼy, pyʼaguapy toĩ ne ángape; ndejeikoʼasy ha ndejehasaʼasykuéra sapyʼamítante;

8 Ha upérõ, regueropuʼaka porãramo, Tupã nemombaʼeguasúta yvate; ndepuʼakáta opa nderayhuʼỹvare.

9 Ne angirũnguéra opyta ndeykére, ha nemomaitei jeýta korasõ imbaʼeporãva ha po hekorayhúva reheve.

10 Nde ndahaʼéi gueteri Job-cha jepe; nopuʼãi nderehe ne angirũnguéra, ni ndeʼíri rejapyharahague, ojapo haguéicha hikuái Job-re.

11 Ha umi heʼíva nde rejapyharahague oñehundíta iñehaʼarõmby, ha umi ohaʼarõva hikuái hykúta amandáuicha kuarahy resẽ resape aku guýpe;

12 Ha avei Tupã omoĩma ipo ha iséllo omoambue hag̃ua umi ára ha arajere, ha omoypytũ hag̃ua iñakã ani oikũmby hikuái umi hembiapo rechapyrãva; oipyʼaraʼã ha opilla hag̃ua chupekuéra ijapu jave;

13 Avei ikorasõkuéra oñembyai rupi, ha umi mbaʼe ombohasaséva hikuái ambuekuérare, ha oguerovyʼáva ambuekuéra ohasa, tou hiʼarikuéra tuichaiteve;

14 Ha avei taikyreʼỹpoi hikuái ha tojei umi iñehaʼarõmby;

15 Ha koʼágui mbovy arýpe, haʼekuéra ha iñemoñarekuéra ojepeʼáta yvága guýgui, heʼi Tupã, ndopytamoʼãiha ijapytepekuéra ni peteĩ, oñemboʼýtava upe tápia ykére.

16 Toñemoñeʼẽngái opa umi omopuʼãva ipyta opyvoi hag̃ua umi che aunhivaʼekuére, heʼi Ñandejára, oguerosapukáivo iñangaipahague hikuái, ha naiñangaipáivokuri hikuái che renondépe, heʼi Ñandejára, upe rãngue katu ojapókuri hikuái pe oĩporãva che resa renondépe, ha pe Che amandavaʼekue chupekuéra.

17 Ha katu umi oguerosapukáiva jejapyhara, ojapo hikuái haʼégui angaipa rembiguái, ha haʼekueraite haʼe upe ñeʼẽrenduʼỹ raʼy.

18 Ha umi ohuráva japúpe che rembiguaikuéra rehe, ogueraha hag̃ua chupekuéra ñeñapytĩmby ha ñemanóme—

19 Ái chuguikuéra; omoangaipa haguére hikuái umi che mitã michĩme, ojepeʼáta chupekuéra che róga ordenansakuéragui.

20 Ijajakakuéra nahenyhẽmoʼãi, hogakuéra ha ikóga raʼỹi rendakuéra oñehundíta, ha haʼekueraite ojehayhuʼỹta umi ombojuruheʼẽvaʼekuére chupekuéra.

21 Ndoguerekomoʼãi hikuái derécho secerdocio-pe, ni iñemoñare haʼekuéra rire ñemoñareatýgui ñemoñareatýpe.

22 Iporãvevaʼerãmoʼã chupekuéra oñemosãingo rire ijajúrare peteĩ ita molino-pe ojeporúva, ha ojahoga yguasu ruguápe.

23 Ái opa umi omyangekóiva che tavayguakuérape, ha omosẽ, ha ojuka, ha otestifikáva hesekuéra, heʼi pe Señor de los Ejércitos; peteĩ mboikuéra ñemoñareaty nokañymoʼãi añaretã kondenasiõgui.

24 Péina ápe, umi che resa ohecha ha oikuaa opa hembiapokuéra, ha Che aguereko ñongatupy peteĩ huísio hiʼaraitépe opa chupekuéra g̃uarã;

25 Oĩgui peteĩ ára oñemeʼẽmbyréva opa tekovépe g̃uarã, hembiapo haguéicha hikuái.

26 Tupã omeʼẽta peẽme kuaapy Ijespíritu Sánto rupive, héẽ, Espíritu Santo don oñemombeʼukuaaʼỹva rupive, kuaapy ndojeikuaaukaivaʼekue múndo ñepyrũmby guive koʼág̃a peve;

27 Upe ñande ypykuéra ohaʼarõ asyvaʼekue ojeikuaauka hag̃ua umi ára pahápe, anhelkuérare omoĩhague gotyo iñakãnguéra, oĩrõguáicha ñongatupýpe igloriakuéra pleniturã;

28 Peteĩ ára oútavape mbaʼeve noñeñongatumoʼãihápe, tahaʼe oĩha peteĩ térã hetave Tupã, ojeikuaaukáta.

29 Opa apykajegua ha poguygua, mburuvichakuéra ha puʼakakuéra, ojeikuaaukáta ha oñemeʼẽta opa umi pyʼaguasúpe ogueropuʼakavaʼekue Jesucristo evanhéliope.

30 Ha avei, oñemoĩrõ límite umi yvága, yguasu, térã yvy ikãvape, térã kuarahy, jasy, térã mbyjakuérape—

31 Opa hiʼarajerekuéra ára, opa ára, mése ha áño oñemoĩvaʼekue; ha opa hiʼarakuéra ára, mése ha áño, ha opa igloria, léi ha ára oñemoĩmbyre, ojeikuaaukáta dispensasiõ ára oñekumplipaitetaha arakuérape—

32 Oñemoĩ haguéicha Tupã Ijapyraʼỹva Konsílio mbytépe, opa ambue tupãnguéra apytépe, ko múndo oiko mboyve, oñeñongatuvaʼerã ikumplimiénto ha ipaharã, opa yvypóra oiketahápe iñeime apyraʼỹme ha hekove omanokuaaʼỹva pytuʼúpe.

33 Arakaʼe pevépa ikatúta ikyʼa umi y osyrýva? Mbaʼe puʼakápa oĩ ojokótava umi yvága? Vyroreíta yvypórape oipysóramo ijyva kangy ojoko hag̃ua Misuri ysyry rape oñemoĩmbyréva, térã omboguevi hag̃ua, ohejaʼỹrõguáicha pe Ipuʼakapáva oñohẽ kuaapy yvágagui Santokuéra Ára Pahapegua akã ári.

34 Péina ápe, heta oĩ umi oñehenóiva ha mbovy pe ojeporavóva. Ha mbaʼére ndojeporavói hikuái?

35 Omoĩetereígui hikuái ikorasõ ko mundogua mbaʼekuérare, ha ohupytységui tekovekuéra terakuãporã, ndoikũmbýiva hikuái ko mboʼepy peteĩte—

36 Upe sacerdocio derechokuéra ojoajupaiteha umi yvagagua pokatúre, ha koʼãva ndaikatuiha ojeporu ni oñeisãmbyhy térã umi tekojoja principio-kuérare añónte.

37 Añete ningo ikatuha oñemeʼẽ ñandéve; ha katu ñañomiséramo umi ñane angaipa, térã ñambovyʼase ñande orgúllo, ñande potapy rei, térã ñamandase, ñamoĩse ñande poguýpe térã jajopyse yvypóra raʼykuéra ánga, oimeháichagua inhustísiape, péina ápe, umi yvága ojei; Ñandejára Espíritu oñembohasaʼasy; ha ojeíramo, upe kuimbaʼe sacerdocio térã autorida opa.

38 Péina ápe, haʼe ohechakuaa mboyve, opyta haʼeñorei opyvoi hag̃ua popíãre, omuña hag̃ua santokuérape, ha oñorairõ hag̃ua Tupãndi.

39 Jaikuaákuri tembiasa oñembyasýva rupive, haimeteha opa kuimbaʼe naturalesa ha disposisiõ, ohupytyʼimívo autorida, oimoʼãháicha hikuái, haʼeha pyaʼete oñepyrũ oiporu puʼakareko ijojaʼỹva.

40 Upévare, hetápe oñehenói, ha katu mbovy ojeporavóva.

41 Mbaʼevéichagua puʼaka térã puʼakakuaa ikatu ni noñemanteneivaʼerã sacerdocio rupive, ndahaʼéirõ pyʼaporã, torypa, tekomarangatu ha mborayhu añete rupive;

42 Pyʼaporã ha kuaapy potĩ rupive, ombotuicha guasútava upe ánga tovamokõiʼỹre ha japuʼỹre—

43 Reporojaʼo mbaretévo oñeikotevẽ vove, Espíritu Santo heʼi jave; ha upérõ rehechaukávo mborayhu tuichavéva pe rejaʼovaʼekuére, ani mbaʼe nderecha ihayhuʼỹháraramo;

44 Oikuaa hag̃ua nde jeroviareko imbareteveha ñemano sãgui.

45 Eheja avei tahenyhẽ nderyepy karidágui opa tekovekuérandi, ha umi ndejeroviápe nemoirũnvandi, ha eheja pe virtu tombojegua meme ne remiandu; upérõ ndejeroviapy oñemombaretéta Tupã renondépe; ha sacerdocio doctrina otykytykýta ne ánga ári ysapy yvágagui guáicha.

46 Pe Espíritu Santo haʼéta ne irũ tapia, ha nde vára, peteĩ vára iñambueʼỹva tekojoja ha añeteguágui; ha ndepuʼakareko haʼéta peteĩ puʼakareko ijapyraʼỹva, ha jejopyʼỹre oúta ndéve akói ha tapiaite g̃uarã.