Sección 78
Rrevelasiõ oñemeʼẽvaʼekue José Smith, upe Proféta rupive, Kirtland, Ohio-pe, marzo 1, 1832-pe. Upe ára, proféta ha ambue líder-kuéra oñembyatyʼakue oñemongeta hag̃ua umi Tupao rembiapóre. Ko rrevelasiõ ohekomboʼe ñepyrũ profétape, Sidney Rigdon ha Newel K. Whitney-pe, ojeʼói hag̃ua Misuri-pe, ha omohenda hag̃ua tupaogua mbaʼe mercantil ha editorial-va, peteĩ “firma” apo rupive, ohechátava umíva umi tembiapo, ha oguerútava fondo, Sion oñemoĩ hag̃ua, ha umi imboriahúva ñeimeporãrã. Upe firma, ojeikuaáva Firma Unida ramo, oñemohendákuri Abril 1832-pe, ha oñembopaha 1834-pe (tojehecha sección 82). Mbovy ára oñembopa rire, ha José Smith poguýpe, upe frase “umi almasẽ mbaʼe imboriahúvape g̃uarã” omyengovia “establecimientos mercantiles ha editoriales-pe”, upe rrevelasiõme, ha ñeʼẽ “orden” oñemoĩ “firma” rangue.
1–4, Santokuéra omohenda ha omoĩvaʼerã peteĩ almasẽ; 5–12, Imbaʼerepykuéra jeporu arandúpe oporogueraháta salvasiõme; 13–14, Tupao isãsovaʼerã umi yvy arigua puʼakágui; 15–16, Miguel (Adán) oservi Imarangatuetéva (Cristo) ñeisãmbyhy guýpe; 17–22, Ojehovasapyre umi ijeroviarekóva, haʼekuéra ohupytýtagui jehejapyre ramo opa mbaʼe.
1 Ñandejára oñeʼẽʼakue José Smith, upe taʼýrape, heʼívo: Pejapysaka cherehe, heʼi Ñandejára pene Tupã, peẽ peñeʼordenavaʼekue che tupao sumo sacerdocio-pe, ha peñembyatyʼakue oñondive;
2 Ha pehendu pe yvatégui pene ordenavaʼekue ñemoñeʼẽ, oñeʼẽtava pende apysápe umi arandu ñeʼẽ, pejuhu hag̃ua salvasiõ upe mbaʼe pemoĩʼakue che renondépe, heʼi Tupã Ñandejára.
3 Añetehápe Che haʼégui peẽme, og̃uahẽma ára ha hiʼãguíma; ha péina ápe, péicha tekotevẽ oĩ peteĩ che tavayguakuéra ñemohenda, oñeisãmbyhývo ha oñemoĩporãvo umi mbaʼe almasẽ rehegua, che tavayguakuéra apytépe imboriahúvape g̃uarã, ko tendápe ha Sion retãme avei—
4 Peteĩ opaʼỹva ha ijapyraʼỹva ñemohenda ha ñemoĩmbyre che tupaópe g̃uarã, pemboguata hag̃ua pe káusa peñañuãvaʼekue, yvypóra salvasiõrã, ha pende Ru Yvágape oĩva gloriarã;
5 Peteĩchapa hag̃ua umi mbaʼe yvagagua ñembojoajúpe, héẽ, ha umi mbaʼe yvy ariguápe avei, pehupyty hag̃ua umi mbaʼe yvagapegua.
6 Napendejojáiramo umi mbaʼe yvy ariguápe, ndaikatúi pendejoja pehupytývo umi mbaʼe yvagagua;
7 Peipotáramo Che ameʼẽ peẽme peteĩ tenda múndo celestial-pe, tekotevẽ peñembosakoʼi pejapóvo umi mbaʼe Che amanda ha ajerureʼakue peẽme.
8 Ha koʼág̃a, añetehápe péicha heʼi Ñandejára, iporã peẽ, peiméva guive ko orden-pe, pejapo opa mbaʼe che gloriarã;
9 Térã, ambue ñeʼẽme, toguapy konsíliope che rembiguái Newel K. Whitney ha che rembiaguái José Smith, pe taʼýra, ha che rembiguái Sidney Rigdon, santokuéra Sion-pe oĩva ndive;
10 Upeichaʼỹramo, Satana oñehaʼãta ombojere añeteguágui ikorasõkuéra, ombohechaʼỹ hag̃ua chupekuéra, ha noikũmbýi hag̃ua umi mbaʼe oñembosakoʼíva chupekuéra g̃uarã.
11 Upévare, Che ameʼẽ peẽme tambiapoukapy, peñembosakoʼi ha peñemohenda hag̃ua, peteĩ ñembojoaju térã konvénio opaveʼỹva rupive, ikatuʼỹva ojejapyhara.
12 Ha umi ojapyharávagui ojeipeʼáta ijofísio ha ijestádo tupaópe, ha oñemeʼẽta umi Satana tovajepetépe rredensiõ ára peve.
13 Péina ápe, kóva haʼe ñembosakoʼi Che pombosakoʼiva reheve, ha ñemopyenda ha tembiecharã Che ameʼẽva peẽme, ikatutaha rupive pekumpli tembiapokapykuéra oñemeʼẽva peẽme.
14 Ikatu hag̃uáicha che ñeñangareko rupive, tahaʼe haʼéva umi jehasaʼasy oúva pende ári, pe tupao taʼisãso mayma ambue tekovekuéragui múndo celestial guýpe;
15 Pejupi hag̃ua pehupyty peve koróna oñembosakoʼíva peẽme g̃uarã, ha peñemoĩ hag̃ua sãmbyhyhára ramo heta rréino ári, heʼi Tupã Ñandejára, Sion-gua Imarangatuetéva, pe omoĩvaʼekue Adán-ondi-Ahmán ñemopyendakuéra;
16 Upe ohenoivaʼekue Miguel-pe pene Príncipe-rã, ha omohendavaʼekue ipy, ha omoĩʼakue chupe yvate, ha omeʼẽvaʼekue chupe salvasiõ llavekuéra, pe Imarangatuetéva ñemoñeʼẽ ha ñeisãmbyhy guýpe, ndoguerekóiva ára ñepyrũmby ni tekove paha.
17 Añetehápe, añetehápe, Che haʼe peẽme, peẽ ningo mitã michĩmi, ha neʼĩra gueteri peikũmby umi tuichaite jehovasa Túva orekóva ipópe, ha ombosakoʼivaʼekue peẽme g̃uarã;
18 Ha ndaikatúi pegueropuʼaka koʼág̃a opa mbaʼe; upevére, peñanima, Che poisãmbyhýtagui. Penembaʼe ningo pe rréino ha umi jehovasa ipypegua, ha penembaʼe umi ára apyraʼỹmegua mbaʼerepy.
19 Ha pe omog̃uahẽva opa mbaʼe aguyjerekópe ojeglorifikáta; ha oñemeʼẽvéta chupe umi mbaʼe ko yvygua, jepeve cien jeyve, héẽ, ha hetave.
20 Upévare, pejapo umi mbaʼe Che amandavaʼekue peẽme, heʼi pene Rredentor, uvei Taʼýra Ahmán, upe ombosakoʼíva opa mbaʼe pendegueraha mboyve;
21 Peẽ haʼégui pe Primohénito tupao, ha haʼe penderupíta peteĩ araípe, ha omeʼẽta opa tekovépe imbaʼerãva.
22 Ha upe haʼéva majordómo ijeroviareko ha iñarandúva, ohupytýta jehejapyre ramo opa mbaʼe. Amén.