Sección 3
Rrevelasiõ oñemeʼẽvaʼekue José Smith, pe Proféta, Harmony, Pensilvania, Julio 1828-pe, umi 116 páhina pópe jehaipyre ñehundi rehegua, oñembohasavaʼekue Mormón Kuatiañeʼẽ ñepyrũhágui, hérava Lehi Kuatiañeʼẽ. Pe Proféta, pyʼahetápe, ohejavaʼekue umi páhina ohasa ipógui Martin Harris pópe, oipytyvõvaʼekue ára mbykymi haihára ramo, Mormón Kuatiañeʼẽ ñembohasápe. Pe rrevelasiõ oñemeʼẽ Urim ha Tumim rupive. (Tojehecha sección 10).
1–4, Ñandejára rape haʼe peteĩ jere ijapyraʼỹva; 5–15, José Smith oñearrepentivaʼerã, térã operdéta don ombohasa hag̃ua; 16–20, Mormón Kuatiañeʼẽ osẽ tesakãme osalva hag̃ua Lehi ñemoñare.
1 Tupã rembiapo, ha hembipota, ha ipropositokuéra ndaikatúi oñehundi, ni ndaikatúi oiko chugui mbaʼeveʼỹ.
2 Tupã ndoguatáigui tape karẽre, ha ndojevýi akatúa ni asu gotyo, ni novãi pe heʼívagui; upévare, umi iguataha ijoja ha hape haʼe peteĩ jere ijapyraʼỹva.
3 Nemanduʼáke, nemanduʼáke, ndahaʼeiha Tupã rembiapo oñehundíva, ha katu yvypóra rembiapo;
4 Peteĩ tapicha ohupytýramo jepe heta rrevelasiõ, ha oguereko puʼaka ojapo hag̃ua heta tembiapo poguasu, ha katu oñembovale mbarete orekóva rupi ha nomombaʼéi umi Tupã ñemoñeʼẽ, ha oho hembipota heʼíva ha hete oipotáva rapykuéri, hoʼavaʼerã ha ogueruvaʼerã hiʼári peteĩ Tupã ijojáva vengansa.
5 Péina ápe, ojejerovia ndéve koʼã mbaʼe, ha katu hasyetépa raʼe umi nerembiapoukapy; ha ne manduʼáke avei umi promésa ojejapovaʼekue ndéve, nderejapyharáirõ umíva.
6 Ha péina ápe, pyʼỹiete rejapyharavaʼekue Tupã rembiapoukapy ha leikuéra, ha reho umi yvypóra pyʼamovã rapykuéri.
7 Ha péina ápe, nderekyhyjeveivaʼerãmoʼã yvypórape Tupãmegui. Yvypóra ningo nomombaʼéi jepe Tupã ñemoñeʼẽ, ha ndochaʼéi iñeʼẽre—
8 Upevére ejeroviavaʼerãmoʼã; ha haʼe oipysótakuri ijyva ha nemoʼã opa aña árma hendypávagui; ha oĩvaʼerãmoʼã nendive opa ára rejejopy jave.
9 Péina ápe, nde haʼe José, ha rejeporavo rejapo hag̃ua Ñandejára rembiapo, ha katu rejapyhara rupi, reʼáta nereñeñangarekóiramo.
10 Ha katu nemanduʼáke, Tupã iporiahuvereko; upévare, eñearrepenti pe ejapovaʼekuégui, tembiapoukapy ameʼẽvaʼekue ndéve rehe oñemoĩva, ha rejeporavo gueteri, ha reñehenói jey tembiapópe;
11 Ha péva nderejapóiramo, reñemotyreʼỹta ha haʼéta ambue kuimbaʼeichante, ha ndereguerekomoʼãvéima don.
12 Ha remeʼẽvo umi rembohasavaʼekue pe visiõ ha puʼaka Tupã ameʼẽvaʼekue ndéve rupi, remeʼẽ pe isagrádova kuimbaʼe hembiapoañáva pópe,
13 Nomombaʼéiva Tupã ñemoñeʼẽ ha ojapyhara umi promésa imarangatuvéva ojejapovaʼekue Tupã renondépe, ha ojerovia pe haʼénte heʼívare, ha oñembovale arandu orekóvare.
14 Ha péva rupi ojepeʼa nde priviléhio peteĩ ára jave—
15 Rehejágui oñepyrũmba ne sãmbyhyhára ñemoñeʼẽre iñepyrũmby guive.
16 Upevére, che rembiapo oñemotenondéta, peteĩ Salvador jeikuaa oúgui múndope, Hudiokuéra testimónio rupi, péicha avei, peteĩ Salvador jeikuaa oúta che tavayguápe—
17 Ha Nefita, ha Jacobita, ha Josefita, ha Zoramita-kuérape, ituvakuéra testimónio rupi—
18 Ha ko testimónio ojeikuaaukáta Lamanita ha Lemuelita, ha Ismaelita-kuérape, hoʼavaʼekue jegueroviaʼỹme ijypykuéra rembiapoaña rupi, ha koʼãva haʼe, Ñandejára ohejavaʼekue ohundi umi ijoykeʼy, Nefita-kuérape, hembiapoaña ha hembiapokyʼa rupi.
19 Ha koʼãvarã añoite oñeñongatu koʼã pláncha oguerekóva koʼã jehaipyre—oñekumpli hag̃ua Ñandejára promésa, haʼe ojapovaʼekue itavayguápe;
20 Ha Lamanita-kuéra oikuaa hag̃ua umi ijypykue rehegua, ha toikuaa Ñandejára promésagui, ha toguerovia pe evanhélio ha tojerovia Jesucristo méritore, ha tojeglorifika hikuái fe orekóva rupi hérare, ha tojesalva arrepentimiento rupi. Amén.