Sección 65
Rrevelasiõ ñemboʼe rehegua, oñemeʼẽvaʼekue José Smith, upe Profétape, Hiram, Ohio-pe, octubre 30, 1831-pe.
1–2, Tupã rréino llavekuéra oñemeʼẽʼakue yvypórape yvy ári, ha pe evanhélio káusa osẽta tenonde; 3–6, Pe yvága rréino milenário oguejýta ha ojoajúta Tupã rréino yvy ariguáre.
1 Pejapysaka ha pehendu peteĩ oñemboúvaicha yvatégui ñeʼẽpu, peteĩ imbarete ha ipuʼakapáva, iñesẽ ohóva yvy paha peve, héẽ, iñeʼẽpu ohóva tekovekuérape—Pembosakoʼi Ñandejára raperã, pembojoja hapekuéra.
2 Tupã rréino llavekuéra oñemeʼẽʼakue yvypórape yvy ári, ha upégui ojeréta upe evanhélio yvy paha peve, pe ita yvytýgui oñeikytĩmbyrévaicha, ndahaʼéiva pópe, ojeréta omyenyhẽmba meve opa pe yvy.
3 Héẽ, peteĩ ñeʼẽpu osapukáiva—Pembosakoʼi Ñandejára rape, pembosakoʼi upe Cordero séna, pemoĩporã Menarãme g̃uarã.
4 Pehenói Ñandejárape, pehenói héra marangatu, peikuaauka umi hembiapo hechapyrãva tavayguakuéra apytépe.
5 Pehenói Ñandejárape, irréino oñemosarambi hag̃ua yvy ape ári, omog̃uahẽ hag̃ua ijupe umi ipype oikóva, ha peñembosakoʼi umi ara oútavape g̃uarã, upe Kuimbaʼe Raʼy oguejytahápe yvágagui, oñembyaóvo iglória mimbípe, omog̃uahẽ hag̃ua Tupã rréino oñemoĩvaʼekue yvy ári.
6 Upévare, toñemosarambi Tupã rréino, ou hag̃ua yvága rréino, ikatu hag̃ua nde, O Tupã, rejeglorifika yvágape yvypeguáicha, umi nderayhuʼỹva oĩ hag̃ua nde poguýpe; ne mbaʼégui terakuãporã, pokatu ha glória, akói ha tapiaite g̃uarã. Amén.