1 Peteĩ Jesucristo rrevelasiõ hembiguái José Smith, upe taʼýra ha séi elder-kuérape, ombojoajúvoguare ikorasõkuéra ha omopuʼã umi iñeʼẽpu yvágare.

2 Héẽ, Ñandejára ñeʼẽ itupao rehegua, oñemoĩʼakue umi ára pahápe itavayguakuéra ñemoĩjeyrã, omombeʼu haguéicha iprofetakuéra juru rupive, ha isantokuéra ñembyatyrã Sion yvyty ári, haʼétava Jerusalén Pyahu táva.

3 Táva oñemopuʼãtava, oñepyrũvo témplo terrénogui, Ñandejára kuã ohechaukáva, Misuri Estado kuarahyreike rembeʼy gotyo, ha oñekonsagravaʼekue José Smith, upe taʼýra po rupive, ha ambuekuéra, Ñandejára horyetevaʼekuéndi.

4 Añetehápe kóva haʼe Ñandejára ñeʼẽ, Jesusalén Pyahu táva toñemopuʼã santokuéra ñembyaty rupive, oñeñepyrũvo ko tendápe, jepe upe témplo rendag̃ua, oñemopuʼãtava ko ñemoñareatýpe.

5 Añetehápe ko ñemoñareaty ndopamoʼãigui oñemopuʼã mboyve peteĩ óga Ñandejárape g̃uarã, ha peteĩ arai opytuʼúta hiʼári, haʼétava Ñandejára glória omyenyhẽtava upe óga.

6 Ha Moisés raʼykuéra, Sacerdocio Marangatu Moisés ohupytyvaʼekuéicha isuégro Jetro po rupi;

7 Ha Jetro ohupytyvaʼekue Caleb po rupi;

8 Ha Caleb ohupytýkuri Eliú po rupi;

9 Ha Eliú, Jeremías po rupi;

10 Ha Jeremías, Gad po rupi;

11 Ha Gad, Esaías po rupi;

12 Ha Esaías ohupyvaʼekue Tupã po rupi;

13 Esaías oikoʼakue avei Abraham árape, ha ojehovasavaʼekue hese—

14 Ha Abraham ohupytyvaʼekue upe sacerdocio Melquisedec pógui, ha haʼe ohupytyvaʼekue ituvakuéra lináhegui, Noé peve jepeve;

15 Ha Noé guive Enoc peve, ituvakuéra lináhe rupi;

16 Ha Enoc guive Abel peve, pe ojejukavaʼekue ijoykeʼy rembiapoñemi rupi, pe ohupytyvaʼekue upe sacerdocio, Tupã rembiapoukapy rupi, itúva Adán pógui, haʼéva pe kuimbaʼe ypykue—

17 Ko sacerdocio okontinua Tupã tupaópe opa ñemoñareatýpe, ha ndoguerekói ára ñepyrũmby ni ary paha.

18 Ha Ñandejára omoĩ avei peteĩ sacerdocio Aarón ha iñemoñare ári, opa iñemoñareaty aja; ha ko sacerdocio avei oho meme ha opyta tapiaite g̃uarã upe sacerdocio-ndi, haʼéva Tupã orden imarangatuvévape oĩháicha.

19 Ha ko sacerdocio mayor oʼadministra pe evanhélio ha oguereko rréino ñemimby llavekuéra, jepeve Tupã kuaapy lláve.

20 Upévare, iñordenansape ojehechauka divinida pokatu.

21 Ha umi iñordenansa ha pe sacerdocio autoridaʼỹre, upe divinida pokatu ndojehechaukái tekovekuérape hetépe;

22 Kóva ỹre, avave tekove ikatu ohecha Tupã rova, jepe upe Túva, ha oikove.

23 Moisés omboʼevaʼekue tesakãme kóva Israel raʼykuérape taveʼỹme, ha jesarekópe oñehaʼãvaʼekue osantifika itavayguakuérape, ikatu hag̃ua ohecha hikuái Tupã rova;

24 Ha katu omohatã hikuái ikorasõ ha ndaikatúi ogueropuʼaka iñeime; upévare, Ñandejára iñekoʼõime, hedýgui iñekoʼõi hesekuéra, ohurákuri oĩ aja hikuái upe taveʼỹme ndoikemoʼãiha ipytuʼúpe, haʼéva iglória plenitu.

25 Upévare, oipeʼa Moisés-pe ijapyteguikuéra, ha avei upe Sacerdocio Marangatu;

26 Ha okontinua pe sacerdocio menor, oguerekóva umi anhel ministério lláve ha evanhélio ñembosakoʼirã.

27 Haʼéva arrepentimiento ha ñemongarai evanhélio, ha angaipakuéra jejora, ha umi tembiapoukapy toʼo rehegua léi, Ñandejára iñekoʼõime oheja memevaʼekue Aarón rógape, Israel raʼykuéra apytépe, Juan peve, Tupã omopuʼãvaʼekuépe, henyhẽvo Espíritu Sántogui isy ryepy guive.

28 Oñemongaraígui imitã jave gueteri, ha orekóvo ócho áño, Tupã ánhel oordenavaʼekue chupe ko pokatúpe g̃uarã, oity hag̃ua hudiokuéra rréino, ha ombojoja hag̃ua Ñandejára rapekuéra itavaygua rova renondépe, ombosakoʼi hag̃ua chupekuéra Ñandejára jejurã, upe ipópe oĩháme opa puʼaka.

29 Ha avei, elder ha obispo ofisiokuéra haʼe mbojoapy tekotevẽva, haʼéva sacerdocio mayor rehegua.

30 Ha avei, umi maestro ha diácono ofísio haʼe moĩve oñeikotevẽva, haʼéva sacerdocio menor-gua, pe sacerdocio oñekonfirmavaʼekue Aarón ha itaʼyrakuéra ári.

31 Upévare, haʼe haguéicha Moisés raʼykuérare—Moisés raʼykuéra ha avei Aarón raʼykuéra oikuaveʼẽta peteĩ ñemeʼẽmby ha peteĩ temikuãveʼẽ oñemboajéva Ñandejára rógape, óga oñemopuʼãtava Ñandejárape g̃uarã ko ñemoñareatýpe, upe tenda oñekonsagrapyrépe, Che ahechauka haguéicha.

32 Ha Moisés ha Aarón raʼykuéra, itaʼyrakuéra, haʼéva peẽ, henyhẽta Ñandejára glóriagui, Sion yvyty ári Ñandejára rógape; ha avei heta Che ahenói ha ombouʼakue omopuʼã hag̃ua che tupao.

33 Umi hekojojáva ohupyty peve koʼã mokõi sacerdocio Che añeʼẽ haguére, ha omombaʼeguasu illamamiénto, oñesantifikágui Espíritu rupive, umi hete ñembopyahurã.

34 Oiko chuguikuéra Moisés ha Aarón raʼykuéra, ha Abraham ñemoñare, ha pe tupao ha rréino, ha Tupã poravopyre.

35 Ha avei opa umi omog̃uahẽva ko sacerdocio, chéve chemog̃uahẽ, heʼi Ñandejára;

36 Umi che rembiguaikuérape omog̃uahẽva, chéve chemog̃uahẽ;

37 Ha upe chéve chemog̃uahẽva, che Rúpe omog̃uahẽ;

38 Ha upe che Rúpe omog̃uahẽva, omog̃uahẽ che Ru rréino; upévare, opa mbaʼe che Ru orekóva oñemeʼẽta chupe.

39 Ha upéva oho huraménto ha konvéniope heʼiháicha, haʼéva ko sacerdocio rehegua.

40 Upévare, opa umi oñemeʼẽvape sacerdocio, ohupyty ko huraménto ha konvénio che Rúgui, haʼe ikatuʼỹva ojapyhara, ni ndakatúiva ojeipeʼa.

41 Ha katu upe ojapyharáva ko konvénio, ohupyty rire, ha ohejapaite, ndohupytymoʼãi perdón iñangaipakuéragui ko múndope ni múndo oútavape.

42 Ha áina opa umi ndohupytýiva ko sacerdocio oñemeʼẽvaʼekue peẽme, koʼág̃a Che akonfirmáva pende ári, peẽ peiméva ko árape, che ñeʼẽpu tee rupive yvága guive; ha jepe Che pomeʼẽkuri umi yvagagua tekoʼatýpe ha che anhelkuérape oñangareko hag̃ua penderehe.

43 Ha koʼág̃a Che ameʼẽ peẽme tembiapoukapy peñeñangareko hag̃ua pendejehe, peñatende hag̃ua jesarekópe umi tekove ijapyraʼỹva ñeʼẽre.

44 Peikótagui opa ñeʼẽ Tupã jurúgui osẽvare.

45 Ñandejára ñeʼẽ añeteguágui, ha oimeraẽ añeteguáva haʼe tesape, ha oimeraẽ tesapéva haʼe Espíritu, haʼéva Jesucristo Espíritu.

46 Ha pe Espíritu omeʼẽ tesape opa tekove oúva múndope; ha pe Espíritu ohesape opa mundopegua tekove ohendúva pe Espíritu ñeʼẽpu.

47 Ha opavave ohendúva pe Espíritu ñeʼẽpu, ou Tupãme, héẽ, upe Túva.

48 Ha Túva omboʼe chupe upe konvénio haʼe ombopyahu ha okonfirmavaʼekue pende ári, oñekonfirmáva pende ári pene ñeimeporãrã; ha ndahaʼéi pene ñeimeporãrã añónte, ha katu opa múndo ñeimeporãrã.

49 Ha opa múndo oĩ angaipápe, ha ipyahẽ angaipa pytũmby ha ñeñapytĩmby guýpe.

50 Ha kóvare peikuaáta oĩha hikuái angaipa ñeñapytĩmby guýpe, ndoúgui hikuái che rendápe.

51 Pe ndoúiva che rendápe oĩgui angaipa ñeñapytĩmby guýpe.

52 Ha upe nomog̃uahẽiva che ñeʼẽpu ndohechakuaái che ñeʼẽpu, ha ndahaʼéi chembaʼe.

53 Ha péicha pehechakuaáta hejojojáva iñañávagui, ha peikuaáta opa múndo ipyahẽha angaipa ha pytũmby guýpe koʼág̃a jepeve.

54 Ha ambue ára ohasávape pene akã iñypytũkuri jegueroviaʼỹ rupi, ha napemombaʼéigui umi mbaʼe pehupytyvaʼekue—

55 Ha ko jegueroviaʼỹ ha jererovu oguerúkuri kondenasiõ opa pe tupao ári.

56 Ha ko kondenasiõ oĩ Sion raʼykuéra ári, héẽ, opavave hiʼarikuéra;

57 Ha opytáta hikuái ko kondenasiõ guýpe oñearrepenti ha imanduʼa peve konvénio pyahúre, haʼéva Mormón Kuatiañeʼẽ ha umi tembiapoukapy upe mboyvegua Che ameʼẽvaʼekue chupekuéra, ndahaʼéi oñeʼẽnte hag̃ua, ha katu ojapo hag̃ua umi Che ahaivaʼekuépe heʼiháicha.

58 Omeʼẽ hag̃ua hikuái yvaʼa ijojáva Ituvakuéra rréinope g̃uarã; upeichaʼỹramo, opyta oñeñohẽ hag̃uáicha peteĩ jehavira ha huísio Sion raʼykuéra ári.

59 Ha katu omongyʼánepa rreinogua taʼyrakuéra che yvy marangatu? Añetehápe, Che haʼe peẽme, Nahániri.

60 Añetehápe, añetehápe, Che haʼe peẽme, koʼág̃a pehendúva che ñeʼẽnguéra, haʼéva che ñeʼẽpu, pejehovasapyre pemog̃uahẽramo koʼã mbaʼe;

61 Che aperdonátagui pene angaipakuéra ko tembiapoukapy rupive—Tapepyta ñemovaʼỹme akãguapýpe ha ñemboʼe espíritupe, pemeʼẽvo testimónio opa yvórape umi mbaʼe oñemombeʼúvagui peẽme.

62 Upévare, tapeho opa múndore; ha oimeraẽ tenda pehokuaaʼỹháme, peporombou, osẽ hag̃ua pendehegui upe testimónio opa mundopýre ha opa yvypórape.

63 Ha Che haʼe haguéicha che apóstol-kuérape, péicha avei Che haʼe peẽme, peẽ haʼégui che apóstol-kuéra, héẽ, Tupã sumo sacerdote; peẽ haʼe umi che Ru omeʼẽvaʼekue chéve; peẽ haʼe che angirũnguéra;

64 Upévare, Che haʼe haguéicha che apóstol-kuérape haʼe jey peẽme, opa ánga ogueroviáva pene ñeʼẽnguéra ha oñemongaraíva ýpe iñangaipakuéra rremisiõrã, ohupytýta pe Espíritu Santo.

65 Ha koʼã techauka osegíta umi ogueroviávape—

66 Che rérape ojapóta hikuái heta tembiapo hechapyrãva;

67 Che rérape omosẽta hikuái añakuéra;

68 Che rérape omongueráta hikuái umi hasýva;

69 Che rérape ojapóta hikuái umi ohechaʼỹva tohecha, ha umi ohenduʼỹva tohendu;

70 Ha oñeʼẽʼỹva kũ oñeʼẽta;

71 Ha oĩramo omeʼẽva chupekuéra venéno, ndojapovaimoʼãi hesekuéra;

72 Ha pe mbói popĩa ndaipuʼakamoʼãi ojapovai hag̃ua hesekuéra.

73 Ha katu peteĩ tembiapoukapy Che ameʼẽ chupekuéra, ani oñembotuicha hikuái koʼã mbaʼére, ni oñeʼẽ koʼãvare múndo renondépe; oñemeʼẽgui peẽme koʼã mbaʼe pene ñeimeporã ha salvasiõrã.

74 Añetehápe, añetehápe, Che haʼe peẽme, umi ndogueroviáiva pene ñeʼẽ, ha noñemongaraíriva ýpe che rérape, iñangaipakuéra rremisiõrã, ohupyty hag̃ua hikuái Espíritu Santo, oñekondenáta, ha ndoikemoʼãi che Ru rréinope, Che ha che Ru roĩháme.

75 Ha ko rrevelasiõ ha tembiapoukapy oñemeʼẽva peẽme, ovaléta ko aravo guive opa mundopýpe; ha pe evanhélio haʼe opa umi ndohupytyivaʼekuépe g̃uarã.

76 Ha katu, añetehápe Che haʼe opa oñemeʼẽvaʼekuépe upe rréino—tekotevẽ pendehegui oñemboʼe chupekuéra, oñearrepenti hag̃ua hembiapo ñaña upe mboyveguágui; ojejaʼovaʼerã chupekuéra ikorasõ aña jegueroviaʼỹgui, ha péicha avei umi pende joykeʼy Sion-gua, opuʼã haguére penderehe ára Che pomboúrõ guare.

77 Ha avei, Che haʼe peẽme, che angirũnguéra, koʼág̃a guive tenonderã Che pohenóitagui che angirũnguéra, iporã Che ameʼẽ peẽme ko tembiapoukapy, haʼe hag̃ua che angirũnguéraicha, ára ahárõguare hendivekuéra amboʼe hag̃ua pe evahélio che pokatúpe;

78 Ndahejáigui chupekuéra ogueraha vosa ni vakapire atiʼyregua, ni mokõi ao.

79 Péina ápe, Che pombou pehaʼã hag̃ua múndope, ha mbaʼapohára ohupyty hembiapo repy.

80 Ha avave kuimbaʼe osẽva ha omboʼe ko rreinogua evanhélio, ha ohejaʼỹre ijeroviareko opa mbaʼépe, naikaneʼõmoʼãi ni naiñypytũmoʼãi iñakã, ni hete, ijyva térã henypyʼa, ni ikangue joajuha; ha ni peteĩ iñakãrague ndoʼamoʼãi yvýpe ojehechaʼỹre. Ha noñandumoʼãi hikuái ñembyahýi ni yʼuhéi.

81 Upévare, ani pejepyʼapy koʼẽrõ g̃uarãre, mbaʼépa peʼúta térã peyʼúta, térã mbaʼépa pemondéta.

82 Pemaʼẽmi umi ñumegua líriore, mbaʼéichapa okakuaa; nombaʼapói ni nombovyvýi; ha umi mundogua rréino, opa iglóriape, noñemondéi ni peteĩ umívaicha.

83 Pende Ru, yvágape oĩva, oikuaa peikotevẽha opa koʼã mbaʼe.

84 Upévare, peheja koʼẽrõ tojapyhy jepyʼapy imbaʼéva.

85 Ani pejepyʼapy mbaʼépa pejevaʼerã; ha katu peñongatu meme pene akãme umi ñeʼẽ oporomoingovéva, ha aravoitépe oñemeʼẽta peẽme upe párte oñemedítava peteĩteĩ opa tekovépe.

86 Upévare, ani avave pende apytégui, ko tembiapoukapy haʼégui opa umi ijeroviarekóvape g̃uarã, Tupãre oñehenóiva tupaópe ministériope g̃uarã, ogueraha, ko aravo guive, vosa ni vakapire atiʼyregua osẽvo omombeʼu hag̃ua ko rreinogua evanhélio.

87 Péina ápe, Che pombou ojaʼo hag̃ua ko múndope opa hembiapovaikuére, ha pemboʼe hag̃ua chupekuéra peteĩ huísio oútavagui.

88 Ha umi penemog̃uahẽva, upépe Che avei aiméta, Che ahátagui pene renonderã. Aiméta pende akatúa ha pende asu gotyo, ha che Espíritu oĩta pene korasõme, ha che anhelkuéra pende jerére, pende joko hag̃ua.

89 Umi penemog̃uahẽva, chéve chemog̃uahẽ; ha penemongarúta, ha penembyaóta, ha omeʼẽta peẽme pirapire.

90 Ha upe penemongarúva, térã penembyaóva, térã omeʼẽva peẽme pirapire, mbaʼevéicharõ ndopytamoʼãi ijopoiʼỹre.

91 Ha upe ndojapóiva koʼã mbaʼe, ndahaʼéi che discípulo; upéva rupi peikuaáta che discípulo-kuérape.

92 Pejere penemog̃uahẽʼỹvagui, ha peneʼaño jave, pejohéi pende py ýpe, y potĩme, tahaʼe ára hakúpe térã roʼy jave, ha pemeʼẽ testimónio umívagui pende Ru yvagaguápe, ha anive peho jey upe tekove rendápe.

93 Ha péicha pejapo avei oimeraẽ vílla térã táva peikehápe.

94 Upevére, peheka jesarekópe ha ani penekangy; ha ái upe óga, térã vílla, térã táva penembotovéva, térã ombotovéva umi pene ñeʼẽ térã pene testimónio che rehegua!

95 Ái, Che haʼe jey, upe óga, térã vílla térã táva penembotovéva, terã ombotovéva pene ñeʼẽ, térã pene testimónio che rehegua;

96 Che, pe Ipuʼakapáva, amboguejýgui che po tetãnguéra ári ahavira hag̃ua chupekuéra umi hembiapoñañáre.

97 Ha plága vaiete oñemosarãmbíta, ha ndojeipeʼamoʼãi umíva ko yvy árigui Che akumpli peve che rembiapo, oñemombykýtava tekojojápe—

98 Chekuaa peve, opavave umi opytavaʼekue, michĩvéva guive tuichavéva peve, ha tahenyhẽ hikuái Ñandejára kuaapýgui, ha tohecha hesa tee rupi, ha tohupi iñeʼẽpu, ha oñondivepa topurahéi ko purahéi pyahu, heʼívo:

99 Ñandejára ogueru jey Sion-pe;Ñandejára orredimi itavayguakuéra, Israel-pe,Grásia jeporavópe oĩháicha,Ojejapovaʼekue jerovia rupiveHa ituvakuéra konvénio rupive.

100 Ñandejára orredimíkuri itavayguakuéra;Ha Satana ojejokua, ha ára opáma.Ñandejára ombyatýkuri peteĩme opa mbaʼe.Ñandejára omboguejýkuri Sion-pe yvatégui.Ñandejára ohupíkuri Sion-pe yvýgui.

101 Pe yvy oĩkuri imemby hag̃ua, ha oguenohẽkuri imbaretekue;Ha añetegua oĩ hyepýpe;Ha umi yvága opukavy ichupe;Ha oñemonde Itupã glória reheve;Haʼe oĩgui itavayguakuéra mbytépe.

102 Glória, ha terakuãporã, ha pokatu, ha mbarete,Toñemeʼẽ ñane Tupãme; henyhẽgui poriahuverekógui,Hustísia, grásia ha añetegua, ha pyʼaguapy,Akói ha tapiaite g̃uarã, Amén.

103 Ha avei, añetehápe, añetehápe, Che haʼe peẽme, iporã opa kuimbaʼe osẽva omboʼe che evanhélio opaveʼỹva, orekóramo hogayguakuéra ha oñemeʼẽ chupe pirapire jopóirõ, ombouvaʼerã chupekuéra térã oiporu umíva ñeimeporãrã, Ñandejára ohechaukaháicha, péicha oĩporãgui chéve.

104 Ha umi ndorekóiva hogaygua, ha ohupytýva pirapire, tomondo Sion-gua obispo-pe, térã Ohio-gua obispo-pe, oñekonsagra hag̃ua umi rrevelasiõ ñembosakoʼi ha ñeguenohẽrã, ha Sion oñemopuʼã hag̃ua.

105 Ha oĩramo omeʼẽva peẽme peteĩ jahoʼiha, térã peteĩ tráhe, pejapyhy pe itujáva ha pemeʼẽ umi imboriahúvape, ha tapeho vyʼápe pende rapére.

106 Ha oimeraẽ pende apytépe imbaretéva Espíritu-pe, togueraha hendive ikangývape, ojeʼedifika hag̃ua chupe opa pyʼaporãme, haʼe avei imbarete hag̃ua.

107 Upévare, pejapyhy penendive umi oñeordenáva sacerdocio menor-pe, ha pembou chupekuéra penerenonderã ojapo hag̃ua umi jejuhurã, ha ombosakoʼi hag̃ua tape, ha ojapo hag̃ua umi kompromíso peẽ ikatuʼỹva pekumpli.

108 Péina ápe, péicha che apostól-kuéra ára ymavépe omopuʼãvaʼekue che tupao.

109 Upévare, tojapo opa kuimbaʼe ijofísio, ha tombaʼapo iñehenói teépe; ha ani akã heʼi umi pýpe noikotevẽiha hesekuéra; umi pyʼỹre, mbaʼéicha upe tete oñemboʼýta?

110 Avei tete oikotevẽ opa miembro-re, opavave ojoʼedifika hag̃ua oñondive, upe sistéma oĩ porãmba hag̃ua.

111 Ha péina ápe, umi sumo sacerdote ohovaʼerã, ha umi elder ha presbítero avei; ha katu umi diákono ha maestro oñehenoivaʼerã ojesareko hag̃ua tupaóre, ha haʼe hag̃ua iministro-kuéra residente.

112 Ha pe obispo, Newel K. Whitney, avei ohovaʼerã opa tupaokuéra apytépe, ohekávo umi imboriahúva oñatende hag̃ua hemikotevẽkuérare, omomirĩvo umi imbaʼehetáva ha umi oñembotuichávape.

113 Haʼe avei ogueruvaʼerã peteĩ ahénte oñatende ha ojapo hag̃ua umi asúnto tupaoguaʼỹva haʼe ohekomboʼeháicha.

114 Upevére, toho pe obispo Nueva York távape, ha Albany ha Boston-pe, ha toñatõi tapichakuéra umi tavaguápe, upe evanhélio púpe, ñeʼẽ sapukáipe, ñembyai ha ñehundipa ohaʼarõvare chupekuéra ombotovéramo hikuái koʼã mbaʼe.

115 Ombotovéramo hikuái koʼã mbaʼe, hiʼag̃uima ihuisiokuéra aravo, ha hogakuéra ojeheja nandíta.

116 Tojerovia haʼe cherehe ha noñemoapañuãmoʼãi; ha ni peteĩ iñakã rague ndoʼamoʼãi yvýpe ojehechakuaaʼỹre.

117 Ha añetehápe Che haʼe peẽme, ambue che rembiguaikuéra, pesẽ pene llamamiento-kuérape, ikatuháicha peẽme, umi táva tuicha ha hechapyrãvare ha umi víllape, pehavirávo múndope hustísiape, opa hembiapo aña ha ikyʼávare, pejévo chupekuéra tesakãme ha ñeikũmbýpe upe mbaʼevaiete oporohundíva ára pahapegua.

118 Penendive, heʼígui Ñandejára Ipuʼakapáva, Che ahundíta irreinokuéra; ndahaʼéi aityvyrótante pe yvy, ha katu umi yvága imbyjakuéra reheve oryrýita.

119 Che, Ñandejára, aipysógui che po aiporu hag̃ua umi yvagagua pokatu; ndapehechái koʼág̃a, ha katu ára mbykýpe pehecháta, ha peikuaáta Che haʼeha, ha Che ajutaha ha arreinataha che tavayguakuérandi.

120 Che pe Alfa ha Omega, iñepyrũmby ha ipaha. Amén.