Almon Babbit

(1812–56)

Na soifua mai Almon Babbitt i Cheshire, Massachusetts. Na papatisoina o ia i le O Le Ekalesia a Iesu Keriso o le Au Paia o Aso e Gata Ai e tusa o le 1830, auauna atu i se misiona i Niu Ioka 1831 ma le 1833, ma faaipoipo atu ia Julia Ann Johnson i le faaiuga o le 1833. Na ia auai i le Tolauapiga a Isaraelu i le malaga i Misuri i le 1834 ma na tofia o se sui o le Korama Muamua a Fitugafulu i le 1835. Na faanofo vaavaaia o ia ia Tesema 1835 ae na toe faatulai i le faaaumeaina i le masina na sosoo ai, I le 1837–38 na ia auauna atu ai i se misiona i Upper Canada, ma i le 1838 na ia taitaia ai se vaega o le Au Paia o Aso e Gata Ai mai Kanata i Misuri. I le 1839 na tofia ai Babbitt e aoina lipoti uma ma faasalalauga faasaga i le Ekalesia lea e mafai ona ia maua. O le tausaga na sosoo ai, sa tofia ai o ia o se peresitene o le siteki o Ohio i Katelani. Na toe faanofo vaavaaia o ia i le 1840 ma le 1841 ae na toe faatulai i le faaaumeaina ma tofia o se toeaina pule faamalumalu i Ramus, Ilinoi, i le 1843. I le 1844 na tuuina atu ai o ia i le Aufono a le Toalimasefulu, ma i le 1846 na tofia ai o ia o se tasi o le toalima tausimavaega e taulimaina tupe ma vaega faaletino a le Ekalesia i Navu. Na ia auai i le Taua a Navu, ina ua tutuli faamalosi ese le Au Paia na totoe, ma saini le feagaiga e faamatuu atu ia Setema 1846. I le 1849, na malaga atu ai Babbitt i le vaega lea ua avea nei ma Teritori o Iuta, ma i le 1854 na faatea ese ai mai le Ekalesia.

Mau faasino i le Mataupu Faavae ma Feagaiga

Mataupu Faavae ma Feagaiga 124

Faamatalaga Faaopoopo

Talaaga Moni ma punavai, O Pepa a Iosefa Samita

O Almon Babbit i le Talafaasolopito o le Ekalesia ma Utuofaamatalaga

Tagai i le FamilySearch mo Almon Babbit