Punaoa o Talafaasolopito o le Mataupu Faavae ma Feagaiga: Uilifoti Uitilafi, Punaoa o Talafaasolopito o le Mataupu Faavae ma Feagaiga (2025)
Uilifoti Uitilafi, Punaoa o Talafaasolopito o le Mataupu Faavae ma Feagaiga (2025)
Uilifoti Uitilafi
(1807–98)
Uilifoti Uitilafi, pe tusa o le 1843–1844, daguerreotype, Potutusi o le Talafaasolopito o le Ekalesia, PH 10143.
Sa soifua a’e Uilifoti Uitilafi i Farmington, Connecticut, i le 1807. I a Tesema 1833, na papatisoina ai i le Ekalesia a Iesu Keriso o le Au Paia o Aso e Gata Ai i autafa ane o Richland, Niu Ioka. I le 1834 sa siitia atu ai i Katelani, Ohaio, ma auai ai i le faigamalaga a le Tolauapiga a Isaraelu i Misuri. Mai le 1834 i le 1836, sa auauna atu ai i se misiona i Arkansas, Tennessee, ma Kentucky. Sa faauuina o se Fitugafulu i le 1836. O le tausaga na sosoo ai, na faaipoipo atu ai i a Phebe Carter i Katelani. Mai le 1837 i le 1838, na auauna atu ai Uitilafi i ni misiona i Egelani Fou ma Fox Islands. I a Iulai 1838, na valaauina ai o ia e ala mai i faaaliga e faatumuina le avanoa i le Korama a Aposetolo e Toasefululua (Mataupu Faavae ma Feagaiga 118:6). Ona ia auauna atu ai lea i se misiona i Peretania Tele mai le 1839 i le 1841. I le 1841 na siitia atu ai i Navu, Ilinoi, lea na avea ai ma sui o le Aufono a le Toalimasefulu. Mai le 1844 i le 1846, sa pulefaamalumalu ai Uitilafi i le Misiona a Peretania. I le 1846–47 na malaga atu ai i le Vanu o Sate Leki i le Teritori o Iuta. I le fa sefulu tausaga na sosoo ai na auauna ai i le tele o tofiga i le Ekalesia, e aofia ai le tusi talafaasolopito a le Ekalesia ma le peresitene o le malumalu i St. George, i le Teritori o Iuta. I le mavae ai o le maliu o Ioane Teila i le 1887, na lagolagoina ai Uitilafi o le Peresitene lona fa o le Ekalesia. Na ia mauaina le faaaliga, na faasilasilaina i le Manifeso i le 1890 (Folafolaga Aloaia 1), lea na afua ai le taofia o le faatinoga o faaipoipoga e tele i le Ekalesia. I le 1893 na ia faapaiaina ai le Malumalu o Sate Leki. Na faasilasila e Peresitene Uitilafi i le 1894 le faaaliga e faamutaina ai faamauga tau vaetamaga ma taulai atu ai i le faamauga o faaipoipoga ma sootaga o matua ma fanau. Na ia apoapoai atu i le Au Paia e saili o latou gafa “i le mamao e mafai ona latou faia ai, ma ia faamauina i o latou tama ma tina.” (Tagai i le Autu o le Talafaasolopito o le Ekalesia, “Faamauga.”) Na maliu o ia ia Setema 1898.
Mau faasino i totonu o le Mataupu Faavae ma Feagaiga
Mataupu Faavae ma Feagaiga 118, 124, 136, 138, Folafolaga Aloaia 1