Punaoa o Talafaasolopito o le Mataupu Faavae ma Feagaiga: Matini Harisi

Punaoa o Talafaasolopito o le Mataupu Faavae ma Feagaiga: Matini Harisi, Punaoa o Talafaasolopito o le Mataupu Faavae (2025)

Matini Harisi, Punaoa o Talafaasolopito o le Mataupu Faavae ma Feagaiga (2025

Matini Harisi

(1783–1875)

Na soifua a’e ia Matini Harisi i Easton, Niu Ioka. Sa ia faaipoipo atu i a Lusi Harisi i le 1808. Sa avea Matini Harisi ma faifaatoaga mauoloa i Palamaira, Niu Ioka. I le mae’a ai ona sailiili i tapuaiga Kerisiano e tele, sa masani ai o ia ma Iosefa Samita, ma iu ai ina liliu atu i le talalelei. Sa aveina atu e Harisi kopi o tusitusiga mai papatusi auro i tagata atamamai i a Fepuari 1828 ma auauna atu o se tusiupu i a Iosefa Samita a o ia faaliliuina le Tusi a Mamona mulimuli ane i lena tautotogo. Sa aafia o ia i le leiloloa ai o uluai faaliliuga o le Tusi a Mamona i a Iuni 1828 (Mataupu Faavae ma Feagaiga 3, 10). I le tausaga na sosoo ai, sa avea ai Harisi o se tasi o Molimau e Toatolu i le Tusi a Mamona (Mataupu Faavae ma Feagaiga 5). E ala i le faatauina atu o le 151 eka o lna faatoaga, sa ia totogiina ai le tau o le lolomiina o le lomiga muamua lava o le Tusi a Mamona (tagai i le Mataupu Faavae ma Feagaiga 19:26).

Sa iai Harisi i le faatulagana o Le Ekalesia a Iesu Keriso o le Au Paia i le aso 6 o Aperila 1830 ma sa papatisoina ai i lena aso. Sa ia siitia atu faatasi ma le Au Paia i Katelani Ohaio, i le 1831 ma, i le mavae ai o le valaauina e ala i faaaliga (Mataupu Faavae ma Feagaiga 52:24), sa auauna atu ai i se misiona i Misuri i le tausaga lava lena. I le 1834, sa ia auai ai i le faigamalaga a le Tolauapiga a Isaraelu i Misuri. Ma i le tete’a ai ma lana ava muamua, sa ia faaipoipo atu i a Caroline Young i le 1836 poo le 1837. Sa mulimuli ane alu ese mai le Ekalesia, peitai i le 1870 sa ia malaga atu ai i le Vanu Tele o Sate Leki i le Teritori o Iuta ma sa toe papatisoina ai.

Mau faasino i totonu o le Mataupu Faavae ma Feagaiga

Mataupu Faavae ma Feagaiga 3, 5, 10, 17, 19, 52, 58, 70, 82, 102, 104