សម្រាប់តែឌីជីថលប៉ុណ្ណោះ ៖ ពួកយុវមជ្ឈិមវ័យ
ការនៅលីវរំឭកខ្ញុំឲ្យមានការទុកចិត្តទៅលើផែនការទាំងស្រុងរបស់ព្រះដែលមានសម្រាប់ខ្ញុំ
ខ្ញុំរកឃើញអំណរ ពេលខ្ញុំលែងគិតច្រើន ហើយទុកចិត្តទៅលើផែនការទាំងស្រុងរបស់ព្រះវរបិតាសួគ៌ ។
ពេលខ្ញុំអាយុ ៣០ ឆ្នាំ មិត្តខ្ញុំសួរខ្ញុំសំណួរខ្លះៗដែលបានផ្លាស់ប្ដូរជីវិតរបស់ខ្ញុំ ។ គាត់បានសួរថា « ប្រសិនបើឯងមានលុយទាំងអស់ក្នុងពិភពលោកនេះ តើឯងនឹងធ្វើអ្វី ? » ខ្ញុំបានផ្តល់ជាចម្លើយសាមញ្ញៗ ដូចជាទិញផ្ទះមួយ មើលថែគ្រួសាររបស់ខ្ញុំ មានភាពខ្លួនទីពឹងខ្លួន ។ ល ។
រួចគាត់ក៏បានសួរជ្រៅទៅៗថា « ចុះបើឯងមានរបស់ទាំងនោះរួចអស់ហើយ ហើយមានលុយទាំងអស់ក្នុងពិភពលោកនេះ តើឯងនឹងធ្វើអ្វីទៀត ? » នោះជាពេលដែលខ្ញុំបានដឹងថា ដោយមិនគិតពីស្ថានភាពនៅលីវរបស់ខ្ញុំ ខ្ញុំមានអ្វីជាច្រើនដែលអាចផ្តល់ឲ្យទៅពិភពលោកនេះ ។ ខ្ញុំបានគិតពីរឿងដែលខ្ញុំអាចរៀន និងចែកចាយ និងពីភាពខុសគ្នា ក៏ដូចជាឥទ្ធិពលដែលខ្ញុំអាចបង្កើតបាន ។
ការផ្លាស់ប្ដូរការផ្ដោតចិត្តរបស់ខ្ញុំ
ក្ដីស្រមៃរបស់ខ្ញុំកាលពីនៅជាយុវមជ្ឈិមវ័យគឺចង់រកបានដៃគូម្នាក់ ហើយរៀបការនៅក្នុងព្រះវិហារបរិសុទ្ធ ហើយចាប់ផ្ដើមគ្រួសារមួយ ។ ខ្ញុំបានគិតថា ការណ៍នេះគឺជាគោលបំណងតែមួយគត់របស់ខ្ញុំ ។ ដូច្នេះនៅពេលវាមិនបានកើតឡើង ខ្ញុំបានឆ្ងល់ថា « ប្រសិនបើការរៀបការគឺជារឿងដ៏សំខាន់បំផុតក្នុងជីវិតនេះ ចុះតើហេតុអ្វីបានជាខ្ញុំមិនមានឱកាសនោះ ? »
ក្រោយពីមិត្តរបស់ខ្ញុំបានសួរនូវសំណួរទាំងនោះហើយ ទីបំផុតខ្ញុំបានយល់អំពីគោលបំណងដ៏ពិតនៃជីវិតនេះ ។ ខ្ញុំនៅតែជឿថា ការរៀបការ និងការមានកូនគឺសំខាន់ចំពោះផែនការដ៏អស់កល្បរបស់ព្រះវរបិតាសួគ៌សម្រាប់យើងម្នាក់ៗ ប៉ុន្ដែខ្ញុំបានដឹងថា វាមិនមែនជាផែនការទាំងស្រុងទេ ។
យើងនៅទីនេះ នៅលើផែនដីនេះ ដើម្បីរីកចម្រើន ចែកចាយសេចក្ដីពិត ធ្វើតាមព្រះយេស៊ូវគ្រីស្ទ និងត្រឡប់ទៅកាន់ព្រះវរបិតាសួគ៌វិញនៅទីបញ្ចប់ ( សូមមើល អាលម៉ា ៣៤:៣២ ) ។
ដូច្នេះ ដោយគិតដល់រឿងនេះក្នុងចិត្ត ខ្ញុំបានចាប់ផ្តើមអធិស្ឋាន ហើយទូលសូមព្រះឲ្យជួយខ្ញុំរកឃើញគោលបំណង និងកម្លាំងរបស់ខ្ញុំ ។ ការអធិស្ឋាន និងកិច្ចខំប្រឹងប្រែងរបស់ខ្ញុំផ្ទាល់ដើម្បីសាកល្បងចំណូលចិត្តថ្មីៗ និងដើម្បីបង្កើនសេចក្ដីជំនឿរបស់ខ្ញុំ ដែលទីបំផុត បានបង្ហាញពីគោលបំណងរបស់ខ្ញុំ ។ ខ្ញុំបានដឹងថា ខ្ញុំមានសេចក្ដីជំនឿយ៉ាងខ្លាំងលើព្រះយេស៊ូវគ្រីស្ទ ។ ហើយផ្នែកមួយនៃគោលបំណង និងផែនការរបស់ខ្ញុំនៅលើផែនដីនេះ គឺការជួយដល់មនុស្សដទៃទៀតឲ្យអភិវឌ្ឍន៍ និងពង្រឹងសេចក្ដីជំនឿរបស់ពួកគេទៅលើទ្រង់ផងដែរ ។ សេចក្ដីពិតនេះបាននាំឲ្យខ្ញុំមានទិសដៅដ៏ច្បាស់លាស់មួយក្នុងជីវិតរបស់ខ្ញុំ ហើយបានជួយខ្ញុំឲ្យផ្ដោតលើការធ្វើជាមនុស្សដែលទ្រង់សព្វព្រះទ័យឲ្យខ្ញុំក្លាយជា ។
ការយល់ដឹងអំពីគោលបំណងរបស់ខ្ញុំ
ពេលខ្ញុំនៅវ័យ ២០ ឆ្នាំបា្លយ ការសន្ទនាជាច្រើនរបស់ខ្ញុំវិលវល់ជុំវិញការនៅលីវ ។ ខ្ញុំផ្ដោតតែលើស្ថានភាព « ដ៏ក្រៀមក្រំ » របស់ខ្ញុំ ។ ឥឡូវនេះ ខ្ញុំបានដឹងថា វាល្អដើម្បីតម្រង់ឆ្ពោះទៅកាន់អាពាហ៍ពិពាហ៍ ប៉ុន្ដែខ្ញុំអាចដេញតាមគោលបំណង និងឱកាសផ្សេងៗទៀតក្នុងពេលទន្ទឹមគ្នានេះ ។
ប្រសិនបើអ្នកមិនប្រាកដពីអ្វីដែលអ្នកគួរតែធ្វើនាពេលនេះទេ ប្រធាន រ័សុល អិម ណិលសុន បានផ្ដល់ដំបូន្មានមួយចំនួនស្ដីពីការចាប់ផ្តើមគួចេញពីកន្លែងណា ៖
« ចូរទូលសួរព្រះវរបិតាសួគ៌របស់អ្នក នៅក្នុងព្រះនាមនៃព្រះយេស៊ូវគ្រីស្ទ ថាតើទ្រង់មានព្រះទ័យដូចម្ដេចអំពីអ្នក និង បេសកកម្មរបស់អ្នកនៅលើផែនដីនេះ ។ ប្រសិនបើអ្នកទូលសួរដោយស្មោះអស់ពីចិត្ត មិនយូរមិនឆាប់នោះព្រះវិញ្ញាណនឹងខ្សឹបប្រាប់សេចក្ដីពិតដែលផ្លាស់ប្ដូរជីវិតដល់អ្នក ។ …
ខ្ញុំសូមសន្យានឹងអ្នកថា បើអ្នកចាប់ផ្ដើមមើលឃើញតែបន្តិចអំពីអ្វីដែលព្រះវរបិតាសួគ៌ទតឃើញក្នុងអ្នក និងអ្វីដែលទ្រង់រំពឹងឲ្យអ្នកធ្វើដើម្បីទ្រង់ នោះជីវិតអ្នកនឹងមានការផ្លាស់ប្ដូរ ! » ( « Stand as True Millennials » Liahona ខែ តុលា ឆ្នាំ ២០១៦ ទំព័រ ៤៩ ) ។
ពាក្យពេចន៍ទាំងនោះមានន័យជ្រាលជ្រៅណាស់ ។
ខណៈពេលដែលខ្ញុំមានគំនិតនានាអំពីអ្វីដែលខ្ញុំចង់បានក្នុងជីវិតនេះ ( ដែលវាអស្ចារ្យណាស់ក្នុងគំនិតខ្ញុំ ! ) នោះព្រះទ្រង់ជ្រាបដឹងអ្វីៗច្រើនជាងខ្ញុំ ។ ហើយផែនការរបស់ទ្រង់នឹងនាំខ្ញុំទៅរកផ្លូវដ៏កាន់តែអស្ចារ្យ ជាងអ្វីដែលខ្ញុំបានស្រមៃសម្រាប់ខ្លួនខ្ញុំទៅទៀត ។
ការបើកចិត្តទូលាយចំពោះក្ដីសង្ឃឹមថ្មីៗ
ការសម្របសម្រួលខ្លួនខ្ញុំទៅតាមផែនការរបស់ព្រះវរបិតាសួគ៌ដែលមានសម្រាប់ខ្ញុំ គឺពិបាកនៅពេលដំបូង ។ ខ្ញុំត្រូវបើកចិត្តឲ្យទូលាយចំពោះគំនិតថ្មីៗ ចក្ខុវិស័យថ្មីៗ និងសេចក្ដីសង្ឃឹមថ្មីៗ ។ ពេលខ្លះវាឈឺចាប់ នៅពេលជីវិតមិនបានប្រែក្លាយដូចអ្វីៗដែលខ្ញុំបានគ្រោងទុក ។ ពរជ័យលោកអយ្យកោរបស់ខ្ញុំបានធ្វើការសន្យាដ៏ជាក់លាក់នានា ដែលមិនបានកើតចេញជាផ្លែផ្កាឡើយ ។ ប៉ុន្ដែខ្ញុំបានឈប់ព្រួយបារម្ភ ពេលខ្ញុំលែងគិតច្រើនពីគំនិតរបស់ខ្ញុំផ្ទាល់ ហើយសម្រេចចិត្តធ្វើការទុកចិត្តលើ ពរជ័យដែលបានសន្យាទាំងអស់របស់ខ្ញុំនឹងត្រូវបានបំពេញ—ដោយសារខ្ញុំដឹងថា វានឹងកើតឡើងតាមពេលវេលាកំណត់របស់ទ្រង់ ។
ប្រសិនបើយើងទុកចិត្ត ហើយផ្ដោតទៅលើផែនការទាំងស្រុងរបស់ព្រះវរបិតាសួគ៌ដែលមានសម្រាប់យើងនោះ យើងនឹងមានអំណរដ៏អស់កល្ប ដែលទ្រង់សន្យានឹងយើង ( សូមមើល នីហ្វៃទី២ ២:២៥ ) ។ យើងនឹងរកឃើញបេសកកម្មផ្ទាល់ខ្លួនរបស់យើង ។ យើងនឹងក្លាយជាអ្នកដែលទ្រង់សព្វព្រះទ័យឲ្យយើងក្លាយជា ។ ហើយទន្ទឹមពេលគ្នានេះ យើងនឹងត្រៀមខ្លួនយើងសម្រាប់ពរជ័យដ៏អស់កល្បទាំងអស់របស់យើង—រួមទាំងអាពាហ៍ពិពាហ៍ផងដែរ ។
ដោយសារតែការផ្លាស់ប្ដូរក្នុងទស្សនវិស័យនេះ ខ្ញុំបានរកឃើញអំណរដ៏ពិតនៅក្នុងជីវិតរបស់ខ្ញុំ ។ ខ្ញុំមិនដឹងពីចម្លើយទាំងអស់ទេ ប៉ុន្ដែទ្រង់បន្ដផ្ដល់ពន្លឺដល់ជីវិតរបស់ខ្ញុំបន្ដិចម្ដងៗ ។