ពិធីសម្ភោធបើកព្រះវិហារបរិសុទ្ធបានបើកដួងចិត្តខ្ញុំ
រីការដូ ម៉ាថាម៉ូរ៉ូស ទីក្រុងអាហ៊ូឆាផេន ប្រទេសអែលសាវ៉ាឌ័រ
ជាមួយនឹងការប្រកាសពីពិធីសម្ភោធបើកព្រះវិហារបរិសុទ្ធ ខ្ញុំបានមានអារម្មណ៍ថា ព្រះអម្ចាស់បានអញ្ជើញខ្ញុំដោយផ្ទាល់ទៅកាន់ព្រះដំណាក់របស់ទ្រង់ ។
រចនារូបភាពដោយ ប្រេដលី ខ្លាក
ខ្ញុំបានជ្រមុជទឹក កាលខ្ញុំមានអាយុ ១៥ ឆ្នាំ ។ មនុស្សជាច្រើនពុំយល់ពីជំនឿថ្មីរបស់ខ្ញុំនោះទេ ។ មនុស្សខ្លះ រួមទាំងមិត្តភក្ដិខ្ញុំ ថែមទាំងបានចំអកដល់ខ្ញុំដោយសារការសម្រេចចិត្តរបស់ខ្ញុំដើម្បីចូលព្រះវិហារ ។ ឪពុកម្ដាយខ្ញុំពុំមែនជាសមាជិកព្រះវិហារទេ ដូច្នេះខ្ញុំពុំមានការគាំទ្ររបស់ពួកគាត់ឡើយ ។
ជាលទ្ធផល វាបានក្លាយជាការលំបាកសម្រាប់ខ្ញុំដើម្បីបន្តទៅព្រះវិហារ និងបន្តរស់នៅក្នុងដំណឹងល្អ ។ ពេលខ្ញុំបានឈានដល់វ័យ ១៩ ឆ្នាំ ខ្ញុំបានឈប់ទៅព្រះវិហារតែម្ដង ។
ដប់ឆ្នាំក្រោយមក ខ្ញុំបានឮថា ព្រះវិហារបរិសុទ្ធមួយនឹងត្រូវបានសង់ឡើងនៅក្នុងប្រទេសអែលសាវ៉ាឌ័រ ។ ខ្ញុំមានការភ្ញាក់ផ្អើលដែលឮថា ព្រះដំណាក់នៃព្រះអម្ចាស់នឹងត្រូវសង់ឡើងនៅក្នុងប្រទេសរបស់ខ្ញុំ ! បួនឆ្នាំក្រោយមក ព្រះវិហារបរិសុទ្ធសានសាវ៉ាឌ័រ អែលសាវ៉ាឌ័រ ត្រូវបានបញ្ចប់ ហើយពិធីសម្ភោធបើកព្រះវិហារបរិសុទ្ធត្រូវបានប្រកាស ។ នៅពេលខ្ញុំបានដឹងថា ការសម្ភោធបើកព្រះវិហារបរិសុទ្ធនឹងផ្ដល់ឱកាសដល់ខ្ញុំឲ្យបានចូលព្រះវិហារបរិសុទ្ធ ខ្ញុំបានមានអារម្មណ៍ហាក់ដូចជា ព្រះអម្ចាស់បានអញ្ជើញខ្ញុំដោយផ្ទាល់ទៅកាន់ព្រះដំណាក់របស់ទ្រង់ ។
ថ្ងៃដែលខ្ញុំបានដើរកាត់ក្នុងព្រះវិហារបរិសុទ្ធ គឺជាថ្ងៃដ៏ល្អបំផុតមួយក្នុងជីវិតរបស់ខ្ញុំ ។ អំឡុងពិធីសម្ភោពបើក ខ្ញុំបានរៀនបន្ថែមទៀតអំពីអ្វីដែលកើតឡើងនៅខាងក្នុងព្រះវិហារបរិសុទ្ធដែលបានឧទ្ទិសឆ្លងហើយ ។ ខ្ញុំក៏បានរៀនផងដែរអំពីសេចក្ដីសញ្ញាពិសិដ្ឋនៅក្នុងព្រះវិហារបរិសុទ្ធដែលបុគ្គលទាំងឡាយធ្វើជាមួយនឹងព្រះ ។
ពេលខ្ញុំដើរកាត់ក្នុងបន្ទប់នីមួយៗក្នុងព្រះវិហារបរិសុទ្ធ ខ្ញុំទទួលអារម្មណ៍នៃវត្តមានរបស់ព្រះ ។ ខ្ញុំមានអារម្មណ៍សុខសាន្ត ។ ការទៅទស្សនាព្រះវិហារបរិសុទ្ធផ្ដល់ដល់ខ្ញុំនូវបំណងប្រាថ្នាដើម្បីត្រឡប់ទៅព្រះវិហារវិញ ហើយរស់នៅតាមដំណឹងល្អម្ដងទៀត ។ ពេលខ្ញុំបានដឹងថា ខ្ញុំអាចរួមចំណែកក្នុងកិច្ចការដ៏អស្ចារ្យរបស់ព្រះ ខ្ញុំចង់ធ្វើកិច្ចការព្រះវិហារបរិសុទ្ធសម្រាប់បុព្វការីជនរបស់ខ្ញុំ ហើយអនុវត្តបព្វជិតភាព ។
បទពិសោធន៍នៅក្នុងព្រះវិហារបរិសុទ្ធរបស់ខ្ញុំនៅថ្ងៃនោះ បានផ្លាស់ប្ដូរខ្ញុំ ។ ឥឡូវនេះ ខ្ញុំជួយដល់សមាជិកក្នុងវួដខ្ញុំរៀបចំសម្រាប់ព្រះវិហារបរិសុទ្ធ ហើយជួយពួកគេជាមួយនឹងពង្សប្រវត្តិ ដើម្បីពួកគេអាចធ្វើកិច្ចការព្រះវិហារបរិសុទ្ធសម្រាប់បុព្វការីជនរបស់ពួកគេ ។
វាមិនដែលយឺតពេលទេដើម្បីវិលត្រឡប់មកកាន់ព្រះវិហារវិញនោះ ។ វាមិនដែលយឺតពេលទេដើម្បីធ្វើការល្អនោះ ។ ជាមួយនឹងសេចក្ដីស្រឡាញ់ដ៏ឥតព្រំដែនរបស់ទ្រង់ ព្រះអម្ចាស់តែងតែគង់ជាមួយយើង ។ ព្រះវិហារបរិសុទ្ធជាកន្លែងដែលបង្រួបបង្រួមយើងជាមួយទ្រង់ ហើយអនុញ្ញាតឲ្យយើងត្រឡប់ទៅរស់នៅជាមួយទ្រង់វិញនៅថ្ងៃមួយ ។