ការទទួលបានទីបន្ទាល់មួយនៅជុំវិញពិភពលោក
អ្នកនិពន្ធរស់នៅរដ្ឋយូថាហ៍ ស.រ.អា.
នេះគឺជារឿងអំពីរបៀបដែលខ្ញុំបានចូលសាសនាចក្រ ហើយគ្រួសារខ្ញុំបានក្លាយជាអ្នកសកម្មនៅក្នុងដំណឹងល្អ ។
រចនារូបភាពដោយ ផលលីន ហ្គ្រេសុន
ខ្ញុំបានកើតនៅប្រទេសអេស្ប៉ាញ ហើយបានរស់នៅទីនោះអស់ប្រាំបីឆ្នាំ ។ យើងមិនបានទៅព្រះវិហារច្រើនទេ ដូច្នេះខ្ញុំពុំបានទទួលបុណ្យជ្រមុជទឹកពេលខ្ញុំអាយុប្រាំបីឆ្នាំនោះទេ ប៉ុន្តែខ្ញុំពិតជាចង់ជ្រមុជទឹក ។ ថ្ងៃមួយខ្ញុំបានសួរឪពុកម្ដាយខ្ញុំថាហេតុអ្វីយើងមិនទៅព្រះវិហារទៀត និងហេតុអ្វីខ្ញុំមិនទទួលបុណ្យជ្រមុជទឹក ។
កាលដែលខ្ញុំបានពន្យល់ពួកគាត់ពីបំណងប្រាថ្នារបស់ខ្ញុំដើម្បីទទួលបុណ្យជ្រមុជទឹក វាបានធ្វើឲ្យពួកគាត់រំជួលចិត្ត ហើយយើងបានចាប់ផ្ដើមទៅព្រះវិហារម្ដងទៀត ។ វាមានអារម្មណ៍ល្អ ។ ម៉ាក់របស់ខ្ញុំជាគំរូដ៏ល្អ ហើយជាអ្នកបំផុសគំនិតខ្ញុំ ។ គាត់មានទីបន្ទាល់ដ៏រឹងមាំមួយ ហើយអានព្រះគម្ពីរជាញឹកញាប់ ។
ក្រោយមក យើងបានប្ដូរទៅនៅប្រទេសវ៉េណេស៊ុយអេឡា ជាប្រទេសរបស់ប៉ាខ្ញុំ ។ យើងបានរស់នៅទីនោះពីរឆ្នាំ ហើយដោយសារតែការលំបាកផ្នែកសេដ្ឋកិច្ច យើងបានប្រឈមនឹងឧបសគ្គជាច្រើន ។ ប៉ុន្តែមានរឿងរ៉ាវល្អៗផងដែរ ។ ខ្ញុំចូលចិត្តម្ហូប ហើយខ្ញុំមានគ្រួសារនៅទីនោះ ដែលអន្ទះសាចង់ជួបខ្ញុំ ។ ពួកគាត់ជាមនុស្សដ៏រាបសា ហើយយើងបានទៅព្រះវិហារជាមួយគ្នា ហើយបានទទួលអារម្មណ៍ពីព្រះវិញ្ញាណ ។
ទោះបីជាយើងបានទៅព្រះវិហារ ហើយខ្ញុំអាចទទួលអារម្មណ៍ពីព្រះវិញ្ញាណ ខ្ញុំបានដឹងថា គ្រួសារខ្ញុំ និងខ្ញុំនៅខ្វះអ្វីមួយ ។ ខ្ញុំពិតជាមានអារម្មណ៍ថា យើងត្រូវផ្សារភ្ជាប់ជាក្រុមគ្រួសារអស់កល្បជានិច្ច ។ នៅព្រឹកថ្ងៃអាទិត្យមួយ ប៊ីស្សពបានអញ្ជើញអ្នកគ្រប់គ្នានៅក្នុងក្រុមជំនុំឲ្យអានព្រះគម្ពីរមរមនមុនដាច់ឆ្នាំ ។ ខ្ញុំបានដឹងថា ការណ៍នេះនឹងជួយឪពុកម្ដាយខ្ញុំ និងខ្ញុំរស់នៅតាមដំណឹងល្អកាន់តែពេញលេញ ។ បន្តិចម្ដងៗ កាលដែលយើងអានព្រះគម្ពីរមរមន ព្រះអង្គសង្គ្រោះបានចាប់ផ្ដើមប្រទានដល់យើងនូវការចេះដឹង និងពរជ័យបន្ថែមទៀត ហើយយើងបានបន្តអានព្រះគម្ពីរជាទៀងទាត់ ។
មិនយូរប៉ុន្មាន ខ្ញុំបានទទួលបុណ្យជ្រមុជទឹក ។ ខ្ញុំពិតជាអាចទទួលអារម្មណ៍ពីព្រះវិញ្ញាណនៅក្នុងជីវិតខ្ញុំ ហើយឪពុកម្ដាយខ្ញុំក៏បានទទួលផងដែរ ។ ទីបន្ទាល់របស់ខ្ញុំចាប់ផ្ដើមលូតលាស់បន្ថែមទៀត ។ យើងបានប្ដូរមកនៅរដ្ឋហ្លូរីដា ស.រ.អា. ហើយយើងត្រូវតែធ្វើការផ្លាស់ប្ដូរ និងការលះបង់ជាច្រើនម្ដងទៀត គឺដូចជាពេលយើងបានចាកចេញពីប្រទេសអេស្ប៉ាញអញ្ចឹង ។ ប៉ុន្តែទីបន្ទាល់របស់យើងលូតលាស់កាន់តែរឹងមាំឡើងៗ ។ យើងបានទៅព្រះវិហារជារៀងរាល់សប្ដាហ៍ ហើយបន្តអានព្រះគម្ពីរ ។
បន្ទាប់ពីកិច្ចប្រឹងប្រែងជាច្រើន និងការអានព្រះគម្ពីរជាច្រើន អធិស្ឋាន និងជ្រើសរើសត្រូវ យើងចង់ផ្សារភ្ជាប់ជាគ្រួសារដ៏អស់កល្បជានិច្ចមួយ ។ យើងបាននិយាយជាមួយប៊ីស្សពយើង ហើយទោះបីជាវាត្រូវការពេលវេលាយ៉ាងច្រើនក្តី ថ្ងៃនោះបានមកដល់ ។ យើងមានចិត្តរំភើបណាស់ក្នុងការចូលទៅក្នុងព្រះវិហារបរិសុទ្ធ ។
ខ្ញុំបានធ្វើបុណ្យជ្រមុជទឹក ពេលខ្ញុំរង់ចាំឪពុកម្ដាយខ្ញុំបញ្ចប់កិច្ចការព្រះវិហារបរិសុទ្ធសម្រាប់ខ្លួនពួកគាត់ ។ ខ្ញុំបានមានអារម្មណ៍ដូចជាខ្ញុំបានទទួលបុណ្យជ្រមុជទឹកម្ដងទៀតអញ្ចឹង ។ ខ្ញុំពិតជាសប្បាយចិត្តណាស់ ដែលខ្ញុំអាចជួយដល់មនុស្សដែលនៅម្ខាងទៀតនៃវាំងនន ។ ឥឡូវនេះគ្រួសារខ្ញុំ និងខ្ញុំទៅព្រះវិហារបរិសុទ្ធជារៀងរាល់សប្ដាហ៍ ។ ខ្ញុំធ្វើបុណ្យជ្រមុជទឹកជាទៀងទាត់ ព្រោះខ្ញុំចូលចិត្តជួយនៅកន្លែងនោះ ។ ខ្ញុំសប្បាយចិត្តខ្លាំងណាស់ ដែលខ្ញុំបានផ្សារភ្ជាប់នៅក្នុងព្រះវិហារបរិសុទ្ធនឹងឪពុកម្ដាយខ្ញុំអស់កល្បជានិច្ច ហើយមានឱកាសរស់នៅជាមួយពួកគាត់ជារៀងរហូត ។