ការបង្ហាញអំពីសេចក្តីជំនឿ
លីនី យូអ៊ីឡាអៅ
សាវៃអ៊ី សាម័រ
លីនីធ្លាប់មានការលំបាកជាមួយនឹងអារម្មណ៍ខឹង និងការខ្វះភាពអត់ធ្មត់ ។ ប៉ុន្តែនៅពេលគាត់ និងស្វាមីគាត់បានចូលសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ លីនីបានមានអារម្មណ៍ថា អារម្មណ៍ទាំងនោះបានបាត់បង់ទៅពេលដែលគាត់រស់នៅតាមដំណឹងល្អ ។
ឡេសលី នីលសុន ជាងថតរូប
ខ្ញុំបានចាប់ផ្ដើមសិក្សាដំណឹងល្អ ហើយបានរៀនសូត្រតាមរយៈការបង្រៀនរបស់សាសនាចក្រពីរបៀបដែលព្រះយេស៊ូវស្រឡាញ់កុមារ ។ ទ្រង់តែងតែមានព្រះទ័យសណ្ដោសដល់ពួកគេ ។
ខ្ញុំបានចាប់ផ្ដើមខិតខំក្លាយដូចជាព្រះយេស៊ូវ ។ ឥឡូវនេះ ខ្ញុំព្យាយាមស្រឡាញ់សមាជិកគ្រួសារខ្ញុំទាំងអស់ឲ្យខ្លាំងជាងមុន ។ ខ្ញុំចំណាយពេលជាមួយពួកគេច្រើនជាងមុន ហើយចំណាយពេលច្រើនជាងមុនដើម្បីស្គាល់ពីសេចក្ដីត្រូវការរបស់ពួកគេ ។ យើងអានព្រះគម្ពីរជាគ្រួសារ ហើយអធិស្ឋានជាមួយគ្នាជារៀងរាល់យប់ ។
ឥឡូវនេះ ដួងចិត្តរបស់ខ្ញុំទន់ភ្លន់ជាងមុនច្រើន ។ ខ្ញុំមានអារម្មណ៍នៃសេចក្តីស្រឡាញ់ និងសុខសាន្ត ព្រមទាំងភាពរីករាយកាន់តែច្រើននៅក្នុងផ្ទះយើង ពេលដែលយើងធ្វើតាមការបង្រៀនទាំងឡាយរបស់ព្រះយេស៊ូវគ្រីស្ទ ។ ខ្ញុំមានអំណរគុណចំពោះដំណឹងល្អដែលជួយឲ្យខ្ញុំរៀនពីរបៀបធ្វើជាភរិយា ម្ដាយ និងជាយាយកាន់តែល្អជាងមុន ។
កូនបងៗរបស់យើងមួយចំនួនចូលរួមសាសនាផ្សេងៗ ប៉ុន្តែយើងនៅតែសង្ឃឹមថា ពួកគេទាំងអស់គ្នានឹងចូលរួមសាសនាចក្រពិតនៅថ្ងៃមួយ ។ ស្វាមីខ្ញុំ និងខ្ញុំមានគោលដៅមួយដើម្បីទៅព្រះវិហារបរិសុទ្ធនៅឆ្នាំក្រោយ ។ ប៉ុន្តែនោះគ្រាន់តែជាគោលដៅចាប់ផ្ដើមរបស់យើងតែប៉ុណ្ណោះ ។ យើងចង់ឲ្យក្រុមគ្រួសារយើងទាំងមូលអាចចូលទៅក្នុងព្រះវិហារបរិសុទ្ធ ហើយផ្សារភ្ជាប់នឹងគ្នា ។
ដំណឹងល្អអាចផ្លាស់ប្ដូរជីវិតរបស់យើង ។ បន្ថែមលើការមានចិត្តឆេវឆាវ ខ្ញុំធ្លាប់មានការលំបាកជាមួយនឹងផ្នែកខ្លះនៅក្នុងពាក្យសម្តីនៃប្រាជ្ញាវាងវៃ ។ ប៉ុន្តែឥឡូវនេះ ការណ៍ទាំងនោះលែងជាបញ្ហាចំពោះខ្ញុំទៀតហើយ ។ ប្រសិនបើដំណឹងល្អអាចជួយខ្ញុំឲ្យក្លាយជាមនុស្សដែលប្រសើរជាងមុន ខ្ញុំដឹងថា វាអាចធ្វើដូច្នោះដែរសម្រាប់គ្រួសារខ្ញុំទាំងមូល ។
លីនី និងស្វាមីរបស់គាត់ អ៊ីអ៊ូន ទាំងពីរនាក់បានរីករាយនឹងពរជ័យនៃការរួបរួមគ្រួសារកាន់តែជិតស្និត កាលដែលពួកគាត់បានឱបក្រសោបដំណឹងល្អនៃព្រះយេស៊ូវគ្រីស្ទ ។
លីនីឱបក្រសោបចៅៗរបស់គាត់នៅគ្រប់ឱកាសទាំងអស់ ។ លីនី និងស្វាមីគាត់មានគោលដៅចង់ឃើញគ្រួសារទាំងមូលរបស់ពួកគាត់ផ្សារភ្ជាប់នៅក្នុងព្រះវិហារបរិសុទ្ធនៅថ្ងៃមួយ ។
ក្ដីស្រឡាញ់ និងភាពសុខសាន្តកាន់តែធំធេងនៅក្នុងផ្ទះ គឺគ្រាន់តែជាពរជ័យមួយក្នុងចំណោមពរជ័យទាំងឡាយដែលលីនីបានកត់សម្គាល់ឃើញតាំងពីគាត់ចូលព្រះវិហារ និងរស់នៅតាមគោលការណ៍ទាំងឡាយដែលគាត់បានរៀន ។