មានតែឌីជីថលប៉ុណ្ណោះ
អ្វីដែលពិការភាពរបស់កូនស្រីខ្ញុំបានបង្រៀនខ្ញុំអំពីព្រះគុណរបស់ព្រះ
ព្រះវរបិតាសួគ៌ទ្រង់ជ្រាបពីអ្វីដែលយើងកំពុងប្រឈមមុខ ។ ហើយទ្រង់ញាណដឹងថា យើងនឹងអាចក្លាយជាមនុស្សបែបណា ។
កែសម្រួលចេញពីការប្រជុំធម្មនិដ្ឋានសាកលវិទ្យាល័យព្រិកហាំយ៉ង់ នៅថ្ងៃទី ១០ ខែ មិថុនា ឆ្នាំ ២០១៨ ។ សម្រាប់សុន្ទរកថាទាំងមូល សូមចូលទៅគេហទំព័រ speeches.byu.edu ។
កូនស្រីទីពីររបស់ខ្ញុំ ខារ៉ូឡាញ បានកើតដោយការវះកាត់ជាបន្ទាន់ ។ ការបាត់បង់ឈាមដ៏ច្រើនលើសលុបមានន័យថាធ្វើឲ្យខ្វះអុកស៊ីសែនបញ្ជូនទៅដល់ខួរក្បាលរបស់នាង ដែលនាំឲ្យមានការខូចខួរក្បាលយ៉ាងធ្អន់ធ្ងរ ។
ដប់ប្រាំឆ្នាំក្រោយមក ខារ៉ូឡាញ នៅតែស្ថិតក្នុងកម្រិតអភិវឌ្ឍប្រហែលក្មេងអាយុបីខែ ។ នាងមិនអាចដើរ ឬវារ ឬក្រឡាប់បានឡើយ ។ នាងមិនអាចនិយាយបាន ហើយយើងមិនប្រាកដថានាងយល់បានអ្វីខ្លះនោះទេ ។
ដំណឹងល្អនោះគឺថា ខារ៉ូឡាញគឺគួរឲ្យស្រឡាញ់ខ្លាំងណាស់ ។ នាងមានស្នាមញញឹមដ៏ធំ និងសំណើចដ៏អស្ចារ្យ ។ នាងចូលចិត្តឱបថើប ខ្យល់ត្រជាក់ប៉ះមុខនាង និងឆ្នូតលើគំនូសផ្លូវជាតិធ្វើឲ្យមានសំឡេងសន្ធឹក ។ នាងធ្វើសំឡេងតូចគួរឲ្យស្រឡាញ់ « អា » និងសំឡេងឮខ្លាំង « អា៎ » —ជារឿយៗនៅពាក់កណ្ដាលយប់ ។
នៅពេលខារ៉ូឡាញមានអាយុប្រាំឆ្នាំ នាងបានភ្ញាក់ឡើងចន្លោះម៉ោង ២ ដល់ ៣ យប់ទាបភ្លឺជាច្រើនយប់ជាប់ៗគ្នា ។ នាយប់មួយក្រោយពីសំឡេងហៅឲ្យភ្ញាក់ដ៏មិនស្វាគមន៍នេះ ខ្ញុំបានសរសេរដូច្នេះ ៖
កាលខ្ញុំទើបបានប្ដូរកន្ទបនាងអំបាញ់មិញ ខ្ញុំបានច្រៀងទាំងមិនដឹងខ្លួននូវបទចម្រៀង [ ថ្នាក់កុមារ ] មួយដែលលីហ្ស៊ី ( កូនស្រីយើងម្នាក់ទៀត ) បានប្រកាសថា ឥឡូវយើងគួរតែច្រៀងបទនេះសម្រាប់មុនពេលចូលគេងរាល់យប់ ។ . . . « ព្រះប្រទានក្រុមគ្រួសារដល់យើង ដើម្បីជួយយើងឲ្យក្លាយដូចជាអ្វីដែលទ្រង់សព្វព្រះទ័យ » ។ ហើយខ្ញុំបានមើលទៅខារ៉ូឡាញ ហើយភ្លាមនោះ ពាក្យនោះបានលេចច្បាស់ក្នុងមនសិការខ្ញុំ ។
ព្រះបានប្រទានគ្រួសារមួយដល់ខ្ញុំ—រួមទាំងកូនដែលដាស់ខ្ញំនៅម៉ោង ២ យប់ទាបភ្លឺនេះ— ដើម្បីជួយខ្ញុំឲ្យក្លាយដូចជាអ្វីដែលទ្រង់សព្វព្រះទ័យ ។ . . . បទបន្ដបន្ទរថា « នេះជារបៀបដែលទ្រង់ចែកក្ដីស្រឡាញ់របស់ទ្រង់ ព្រោះគ្រួសារគឺមកពីព្រះ » ។
នាយប់នោះ ខ្ញុំបានមានអារម្មណ៍មានពរជ័យដ៏សង្ខេបមួយពីព្រះ ជាការបញ្ជាក់មួយថា ក្នុងគ្រានោះ ទ្រង់បានជ្រាបពីខ្ញុំ និងខារ៉ូឡាញ និងគ្រួសាររបស់យើងដោយផ្ទាល់ ។ ទ្រង់ស្រឡាញ់យើង ។ ហើយទ្រង់ ព្រះវរបិតារបស់ខ្ញុំបានប្រទានការលើកទឹកចិត្តខ្ញុំ តាមរយៈការបង្រៀនខ្ញុំពីមូលហេតុដែលយើងជួបនឹងឧបសគ្គបែបនោះ ៖ « ដើម្បីជួយយើងឲ្យក្លាយដូចជាអ្វីដែលទ្រង់សព្វព្រះទ័យ » ។
សំឡេង « អា៎ » ដ៏ឮរបស់ខារ៉ូឡាញក៏កើតមានញឹកញាប់នៅឯព្រះវិហារដែរ ។ ពេលនាងក្រៀមក្រំ និងស្រែកឮខ្លាំង ភរិយាខ្ញុំ ឬខ្ញុំនឹងយកនាងចេញទៅច្រកចូលទទួលភ្ញៀវ ជាកន្លែងដែលយើងរុញខារ៉ូឡាញទៅមកក្នុងរទេះពិការរបស់នាង ព្យាយាមលួងនាងដោយរុញទៅមកៗ ។
នៅថ្ងៃអាទិត្យមួយ ខ្ញុំបានមកព្រះវិហារ ហើយរុញខារ៉ូឡាញដែលមានភាពក្រៀមក្រំខ្លាំង ដោយគិតថា យើងអាចនៅបានតែម៉ោងសាក្រាម៉ង់ប៉ុណ្ណោះ ។ កាលខ្ញុំដើរទៅច្រកចូលទទួលភ្ញៀវ ហើយខារ៉ូឡាញនៅតែក្រៀមក្រំដដែល ខ្ញុំបានចាប់ផ្ដើមគិតថា តើយើងអាចនៅដល់ចប់ម៉ោងសាក្រាម៉ង់ដែរឬអត់ ។ កិច្ចខំប្រឹងប្រែងទាំងអស់របស់ខ្ញុំដើម្បីលួងនាងហាក់គ្មានបានផលឡើយ ។
ប៉ុន្ដែពេលនោះ ទំនុកតម្កើងសាក្រាម៉ង់បានបន្លឺឡើង ។ ខ្ញុំដាក់ក្បាលខ្ញុំផ្អែកថ្នមលើមុខរបស់ខារ៉ូឡាញ ហើយច្រៀងទៅនាង ។ នាងបានស្ងប់ស្ងាត់ ហើយស្ដាប់ ។ ទំនុកតម្កើងសាក្រាម៉ង់នាថ្ងៃនោះគឺ « ចូរមានគារវៈ និងរាបទាប » ( ទំនុកតម្កើង ល.រ. ១០៨ ) ដែលបានសរសេរហាក់ដូចជាព្រះអង្គសង្គ្រោះបានច្រៀង ។ និយាយដោយត្រង់ ខ្ញុំបានផ្ដោតលើខារ៉ូឡាញ មិនមែនលើទំនុកតម្កើងទេ—រហូតដល់យើងច្រៀងដល់វគ្គទីបួន ពេលខ្ញុំដឹងថាខ្លួនឯងកំពុងច្រៀងពាក្យទាំងនេះទៅកាន់កូនស្រីខ្ញុំ ៖
យើងបានស្រឡាញ់អ្នកដូចមិត្ត
ជាក្តីស្រឡាញ់គ្មានទីបញ្ចប់ ។
ខ្ញុំមើលទៅភ្នែកពណ៌ខៀវដ៏ធំរបស់ខារ៉ូឡាញ ហើយមានអារម្មណ៍ពីសេចក្ដីពិតដ៏ស្រទន់ និងផ្ទាល់ខ្លួននៃពាក្យទាំងនោះដ៏ខ្លាំង ។ ព្រះយេស៊ូវគ្រីស្ទ ដែលជាព្រះប្រោសលោះនៃពិភពលោកនេះ ស្រឡាញ់ខារ៉ូឡាញដោយ « ក្តីស្រឡាញ់គ្មានទីបញ្ចប់ » ។ ពេលនាងក្រៀមក្រំ ឬឈឺចាប់ ពេលឪពុកម្ដាយនាងមិនដឹង និងមិនអាចលួងលោមនាងបាន មានតែព្រះមួយអង្គ ដែលជាមិត្តដ៏អស់កល្បរបស់នាង ដែលដឹងពីអារម្មណ៍របស់នាង និងព្រះញាណពីរបៀបជួយនាង ។
ថ្មីៗនេះគ្រួសាររបស់យើងនិយាយគ្នាលេងពីប្រធានបទមិនសូវហ្មត់ចត់មួយ ៖ សក់របស់ខ្ញុំ—ឬក៏ការអស់សក់ ដោយសារខ្ញុំទំពែក ។ ខ្ញុំនិយាយថា នៅពេលការរស់ឡើងវិញមកដល់ នោះពួកគេនឹងមើលមិនស្គាល់ខ្ញុំដែលមានសក់រួញអង្កាញ់ៗឡើយ ។
លីហ្ស៊ីបាននិយាយបន្ដភា្លមៗថា « ខ្ញុំគិតថា យើងចាប់អារម្មណ៍ខ្លាំងជាង ពេលខារ៉ូឡាញនិយាយ » ។
យើងទាំងអស់គ្នាបានសើច ប៉ុន្ដែសេចក្ដីពិតដ៏ជ្រាលជ្រៅនេះក្នុងសម្ដីរបស់នាងបានប៉ះពាល់ចិត្តខ្ញុំ ៖ សេចក្ដីសង្គ្រោះដែលកើតមានតាមរយៈព្រះប្រោសលោះដ៏អស្ចារ្យរបស់យើងគឺរួមបញ្ចូលទាំងអស់ មានលើសពីសក់ខ្ញុំ និងការខូចខួរក្បាលរបស់ខារ៉ូឡាញ និងអ្វីៗទាំងអស់ផ្សេងទៀត ។ ព្រះគុណរបស់ព្រះយេស៊ូវគ្រីស្ទគឺអស្ចារ្យណាស់ ព្រះចេស្ដាដើម្បីព្យាបាលរបស់ទ្រង់គ្មានដែនកំណត់ឡើយ ។
អត្តសញ្ញាណដ៏អស់កល្បរបស់ខារ៉ូឡាញមិនត្រូវបានកំណត់ដោយពិការភាពរបស់នាងនៅក្នុងជីវិតនេះទេរ អនាគតដ៏ល្អស្អាត និងស្រស់បំព្រងកំពុងតែរង់ចាំនាង ដោយសារតែព្រះយេស៊ូវគ្រីស្ទ ។