« លីហៃ និងសារ៉ាយ ចាកចេញពីក្រុងយេរូសាឡិម » ដំណើររឿងព្រះគម្ពីរមរមន ( ឆ្នាំ ២០២៣ )
« លីហៃ និងសារ៉ាយ ចាកចេញពីក្រុងយេរូសាឡិម » ដំណើររឿងព្រះគម្ពីរមរមន
លីហៃ និងសារ៉ាយ ចាកចេញពីក្រុងយេរូសាឡិម
ការព្រមានរបស់ព្រះអម្ចាស់ទៅកាន់គ្រួសារ
លីហៃ និងសារ៉ាយ បានរស់នៅក្នុងក្រុងយេរូសាឡិមជាមួយកូនៗរបស់ពួកលោក ។ លីហៃបានឃើញការនិមិត្តមួយមកពីព្រះអម្ចាស់ ។ លោកបានឃើញថា ព្រះអង្គសង្គ្រោះនឹងយាងមកកាន់ពិភពលោកនេះនៅថ្ងៃណាមួយ ។ ព្រះអម្ចាស់ក៏បានបង្ហាញលោកផងដែរថា ទីក្រុងយេរូសាឡិមនឹងត្រូវបំផ្លាញចោល ។
លីហៃបានប្រាប់ប្រជាជនអំពីការនិមិត្តរបស់លោក ។ លោកបានប្រាប់ពួកគេថា ព្រះយេស៊ូវគ្រីស្ទនឹងយាងមកសង្គ្រោះពិភពលោកនេះនៅថ្ងៃណាមួយ ។
លីហៃក៏បានប្រាប់ប្រជាជនផងដែរថា ទីក្រុងយេរូសាឡិមនឹងត្រូវបំផ្លាញចោល ។ លោកបានអញ្ជើញពួកគេឲ្យប្រែចិត្ត ។
ប្រជាជនបានខឹងសម្បារ ។ ព្រះអម្ចាស់បានមានបន្ទូលទៅកាន់ លីហៃ ម្ដងទៀតនៅក្នុងសុបិន ។ លីហៃបានដឹងថា លោកនិងគ្រួសាររបស់លោកនឹងមិនមានសុវត្ថិភាពទេនៅក្នុងក្រុងយេរូសាឡិម ។ ពួកលោកត្រូវចាកចេញពីក្រុងនេះ ។
លីហៃ និងសារ៉ាយ បានគោរពតាមព្រះអម្ចាស់ ។ ពួកលោកបានចាកចេញពីទីក្រុងនេះជាមួយគ្រួសាររបស់ពួកលោក ។ លីហៃ និងសារ៉ាយ មានកូនប្រុសបួននាក់ ដែលមានឈ្មោះថា លេមិន លេមយួល សាំ និង នីហ្វៃ ។ ពួកលោកត្រូវចាកចោលផ្ទះសំបែង និងរបស់ល្អៗទាំងឡាយរបស់ពួកលោក ។
គ្រួសារនេះបានធ្វើដំណើរនៅក្នុងទីរហោស្ថាននៅក្បែរសមុទ្រក្រហម ។ លីហៃបានអរព្រះគុណដល់ព្រះអម្ចាស់ ដែលបានប្រទានពរដល់គ្រួសាររបស់លោក ។ លោកបានបង្រៀនគ្រួសាររបស់លោកឲ្យធ្វើតាមព្រះអម្ចាស់ និងរក្សាបទបញ្ញត្តិទាំងឡាយរបស់ទ្រង់ ។
លេមិន និងលេមយួល បានរអ៊ូរទាំ ។ ពួកគេបាននឹកដល់ផ្ទះរបស់ពួកគេ និងរបស់ទាំងអស់ដែលពួកគេបានចាកចោល ។ ពួកគេមិនបានយល់ពីមូលហេតុដែលព្រះអម្ចាស់បានសុំឲ្យពួកគេចាកចេញនោះទេ ។ ពួកគេមិនជឿថា ទីក្រុងដ៏ធំមួយដូចជាក្រុងយេរូសាឡិមអាចត្រូវបានបំផ្លាញចោលនោះទេ ។
លេមិន និងលេមយួល បានគិតថាលីហៃបានស្រមើស្រមៃឃើញការនិមិត្តរបស់លោក ។ ចុះបើគ្រួសាររបស់ពួកគេវង្វេងបង់នៅក្នុងទីរហោស្ថានជារៀងរហូតនោះ ?
នីហ្វៃចង់ដឹងដោយខ្លួនលោកថា អ្វីដែលលីហៃបានថ្លែងនោះគឺជាការពិត ។ លោកបានអធិស្ឋាន ហើយបានទូលសួរដល់ព្រះអម្ចាស់ ។
ព្រះអម្ចាស់បានបញ្ជូនព្រះវិញ្ញាណបរិសុទ្ធមក ដើម្បីជួយនីហ្វៃឲ្យជឿលើពាក្យសម្ដីរបស់ឪពុកលោក ។ នីហ្វៃបានជឿលើព្រះអម្ចាស់ ហើយបានចែកចាយអ្វីដែលលោកបានរៀនជាមួយនឹងបងប្រុសៗរបស់លោក ។ សាំបានស្ដាប់នីហ្វៃ ហើយបានជឿលោក ប៉ុន្ដែលេមិន និងលេមយួលមិនបានស្ដាប់នោះទេ ។