« អាលម៉ា និង អាមូលេកនៅក្នុងគុក » ដំណើររឿងព្រះគម្ពីរមរមន( ឆ្នាំ ២០២៣ )
អាលម៉ា និងអាមូលេកនៅក្នុងគុក
សេចក្តីជំនឿលើព្រះអម្ចាស់ក្នុងគ្រាលំបាក
អាលម៉ា និងអាមូលេកបានបង្រៀនដំណឹងល្អនៅក្នុងទីក្រុង អាំម៉ូណៃហា ។ មនុស្សមួយចំនួនជឿលើព្រះអម្ចាស់ ហើយបានប្រែចិត្ត ។ ប៉ុន្តែមនុស្សជាច្រើនទៀតបានខឹងអាលម៉ា និងអាមូលេក ហើយចង់បំផ្លាញពួកគេ ។ មនុស្សដែលមានកំហឹងទាំងនោះបានចងអាលម៉ា និងអាមូលេក ហើយនាំបុរសទាំងពីរនាក់ទៅជួបមេចៅក្រមក្នុងទីក្រុង ។
មេចៅក្រមមិនជឿថាប្រជាជនរបស់គាត់ត្រូវការប្រែចិត្តនោះទេ ។ ប្រជាជនខឹងសម្បានឹងអាលម៉ា និងអាមូលេក ។ ពួកគេបានបង្ខំឲ្យមនុស្សដែលជឿនូវអ្វីដែលអាលម៉ា និងអាមូលេកបានបង្រៀនចាកចេញពីទីក្រុង ។ បន្ទាប់មក ពួកគេបានបោះស្ត្រី និងកុមារទាំងឡាយដែលជឿលើព្រះអម្ចាស់ទៅក្នុងភ្លើង ។
អាមូលេកសោកស្តាយយ៉ាងខ្លាំង ពេលគាត់ឃើញមនុស្សទាំងនោះរងនូវការឈឺចាប់ ។ គាត់បានសុំអាលម៉ាឲ្យប្រើអំណាចរបស់ព្រះដើម្បីសង្គ្រោះពួកគេ ។ ប៉ុន្តែ អាលម៉ាបាននិយាយថា ព្រះវិញ្ញាណនៃព្រះនឹងមិនអនុញ្ញាតឲ្យគាត់ធ្វើដូច្នេះឡើយ ។ គាត់បានប្រាប់អាមូលេកថា ស្ត្រី និងកុមារទាំងនោះនឹងទៅនៅជាមួយព្រះអម្ចាស់ ។ ព្រះអម្ចាស់នឹងជំនុំជម្រះមនុស្សដែលបានសម្លាប់ពួកគេ ។
មេចៅក្រមបានសើចចំអកចំពោះអាលម៉ា និងអាមូលេក ដោយសារព្រះអម្ចាស់មិនបានការពារស្ត្រី និងកុមារទាំងនោះ ។ គាត់បានបញ្ជូនអាលម៉ា និងអាមូលេកទៅក្នុងគុក ។
បីថ្ងៃក្រោយមក មេចៅក្រមទៅក្នុងគុកជាមួយនឹងសង្ឃក្លែងក្លាយរបស់គាត់ ។ ពួកគេបានសួរសំណួរជាច្រើន ។ ប៉ុន្តែអាលម៉ា និងអាមូលេក មិនឆ្លើយនឹងពួកគេទេ ។
មេចៅក្រម និងពួកសង្ឃរបស់គាត់បានធ្វើរឿងអាក្រក់ដាក់អាលម៉ា និងអាមូលេក ។ ពួកគេក៏មិនបានផ្តល់អាហារ ឬទឹកដល់អាលម៉ា និងអាមូលេកដែរ ។ ពួកគេបានសើចចំអកចំពោះអ្វីដែលអាលម៉ា និងអាមូលេកបានបង្រៀន ។
អាលម៉ា និងអាមូលេកបានរងទុក្ខអស់រយៈពេលជាច្រើនថ្ងៃ ។ មេចៅក្រមបានមកម្តងទៀតជាមួយនឹងសង្ឃក្លែងក្លាយរបស់គាត់ ។ គាត់បានប្រាប់អាលម៉ា និងអាមូលេកថា ប្រសិនបើពួកគេមានអំណាចរបស់ព្រះ នោះពួកគេគួរតែអាចផ្តាច់ខ្សែពួរដែលចងពួកគេបាន ។ បន្ទាប់មកគាត់នឹងជឿពួកគេ ។
អាលម៉ា និងអាមូលេកបានទទួលអារម្មណ៍នៃព្រះចេស្តានៃព្រះ ។ ពួកគេបានក្រោកឈរ ។ អាលម៉ាមានសេចក្ដីជំនឿទៅលើព្រះអម្ចាស់ ហើយទូលសូមព្រះចេស្តាដើម្បីផ្តាច់ចំណងនោះ ។
អាលម៉ា និងអាមូលេកបានផ្តាច់ចំណង ។ មេចៅក្រម និងសង្ឃក្លែងក្លាយរបស់គាត់មានការភ័យខ្លាច ។ ពួកគេព្យាយាមរត់ចេញ ប៉ុន្តែផ្ទៃដីបានចាប់ផ្តើមញ័ររញ្ជួយ ។
ជញ្ជាំងគុកបានរលំលើមេចៅក្រម និងពួកសង្ឃរបស់គាត់ហើយពួកគេបានស្លាប់ ។ ប៉ុន្តែព្រះអម្ចាស់បានថែរក្សាឲ្យអាលម៉ា និងអាមូលេកឲ្យមានសុវត្ថិភាព ។ នៅពេលប្រជាជនឮសម្លេង ពួកគេបានរត់ទៅមើលអ្វីដែលកំពុងកើតឡើង ។ មានតែអាលម៉ា និងអាមូលេកប៉ុណ្ណោះដែលបានដើរចេញពីគុក ។ ប្រជាជនភ័យខ្លាចនឹងអាលម៉ា និងអាមូលេកជាខ្លាំងហើយនាំគ្នារត់គេចខ្លួន ។