« បងប្អូនប្រុសនីហ្វៃ និង លីហៃ » ដំណើររឿងព្រះគម្ពីរមរមន ( ឆ្នាំ ២០២៣ )
បងប្អូនប្រុសនីហ្វៃ និង លីហៃ
បានឮសំឡេងពីស្ថានសួគ៌
នីហ្វៃ និងលីហៃជាបងប្អូននឹងគ្នាដែលចង់ឲ្យមនុស្សគ្រប់គ្នាដឹងអំពីដំណឹងល្អនៃព្រះយេស៊ូវគ្រីស្ទ ។ សាសន៍នីហ្វៃ និងសាសន៍លេមិនបានធ្វើសង្រ្គាម ប៉ុន្តែបងប្អូនប្រុសនៅតែបង្រៀនមនុស្សទាំងពីរក្រុមនេះ ។ ថ្ងៃមួយ នៅពេលពួកគេធ្វើដំណើរទៅបង្រៀនប្រជាជន កងទ័ពសាសន៍លេមិនម្នាក់បានចាប់ពួកគេដាក់គុក ។
ហេលេមិន ៣:២០–២១, ៣៧; ៤:៤–៥, ១៤;៥:៤–២១
ជាច្រើនថ្ងៃក្រោយមក កងទ័ពបានមកគុកដើម្បីសម្លាប់នីហ្វៃ និងលីហៃ ។
មុននឹងនរណាម្នាក់អាចធ្វើបាបនីហ្វៃ និងលីហៃ រង្វង់ភ្លើងបានលេចឡើងនៅជុំវិញពួកគេ ។ ភ្លើងមិនបានឆេះពួកគេទេ ។ ផ្ទុយទៅវិញ ព្រះបានការពារសុវត្ថិភាពពួកគេ ។ បន្ទាប់មក ផែនដីបានរញ្ជួយ ។ វាមានអារម្មណ៍ដូចជាជញ្ជាំងគុកនឹងរលំ ។ មិនយូរប៉ុន្មាន ពពកខ្មៅងងឹតបានគ្របដណ្ដប់អ្នកផ្សេងទៀតនៅក្នុងគុក ។ ប្រជាជនភ័យខ្លាចយ៉ាងខ្លាំង ។
មានសំឡេងមួយចេញមកពីលើពពកងងឹត ។ វាជាសំឡេងស្ងាត់ៗដូចជាសំឡេងខ្សឹប ប៉ុន្តែមនុស្សបានទទួលអារម្មណ៍នេះក្នុងចិត្ត ។ វាជាសំឡេងរបស់ព្រះ ។ ព្រះបានប្រាប់ឲ្យពួកគេប្រែចិត្ត ។
ផែនដី និងគុកកាន់តែញ័ររញ្ជួយ ។ សំឡេងនោះបានបន្លឺឡើងម្ដងទៀត ហើយប្រាប់ប្រជាជនឲ្យប្រែចិត្ត ។ មនុស្សមិនអាចកម្រើកបានទេដោយសារតែពពក និងការភ័យខ្លាចរបស់ពួកគេ ។
បុរសម្នាក់ក្នុងហ្វូងមនុស្សមានឈ្មោះថា អ័មីណាដាប់ ។ គាត់ធ្លាប់ជាសមាជិកនៃសាសនាចក្ររបស់ព្រះ ។ គាត់បានឃើញថាមុខរបស់នីហ្វៃ និងលីហៃចាប់ផ្ដើមភ្លឺចែងចាំង ។ ពួកគេមើលទៅដូចជាទេវតា ។ វាហាក់ដូចជាពួកគេកំពុងនិយាយទៅកាន់នរណាម្នាក់នៅស្ថានសួគ៌ ។ អ័មីណាដាប់បានប្រាប់មនុស្សគ្រប់គ្នាឲ្យមើលទៅនីហ្វៃ និងលីហៃ ។
ប្រជាជនបានសួរអ័មីណាដាប់ ថាតើពួកគេអាចធ្វើអ្វីបាន ដើម្បីកម្ចាត់ពពកខ្មៅងងឹតនោះ ។ អ័មីណាដាប់បានចែកចាយពីអ្វីដែលគាត់បានដឹងអំពីព្រះ និងព្រះយេស៊ូវ ។ គាត់បានប្រាប់ប្រជាជនឲ្យប្រែចិត្ត ឲ្យមានសេចក្តីជំនឿលើព្រះយេស៊ូវ ហើយអធិស្ឋានទៅព្រះ ។ ប្រជាជននោះបានស្ដាប់តាមអ័មីណាដាប់ ។ ពួកគេបានអធិស្ឋានរហូតដល់ភាពងងឹតបានរសាត់បាត់ទៅ ។
ភ្លើងពីព្រះបានហ៊ុមព័ទ្ធមនុស្សម្នាទាំងអស់ ហើយពួកគេមិនបានឆេះទេ ។ ប្រជាជនបានពោរពេញដោយព្រះវិញ្ញាណបរិសុទ្ធ ហើយរីករាយយ៉ាងខ្លាំង ។ ពួកគេបាននិយាយដំណើររឿងដ៏អស្ចារ្យ ។ សំឡេងនោះបានបន្លឺឡើងម្ដងទៀត ។ វាបានប្រាប់ពួកគេឲ្យមានភាពសុខសាន្ត ដោយសារតែសេចក្តីជំនឿរបស់ពួកគេលើព្រះយេស៊ូវ ។ ទេវតាបានយាងមកជួបប្រជាជន ។
នីហ្វៃ លីហៃ និងមនុស្សទាំអស់បានចាកចេញពីគុក ។ ពួកគេបានប្រាប់មនុស្សជាច្រើននៅទូទាំងដែនដីនូវអ្វីដែលពួកគេបានឃើញ និងបានឮនាថ្ងៃនោះ ។ សាសន៍លេមិនភាគច្រើនបានជឿ ហើយជ្រើសរើសដើរតាមព្រះយេស៊ូវ ។ ពួកគេឈប់ប្រយុទ្ធនៅក្នុងសង្គ្រាម ។ ផ្ទុយទៅវិញ ពួកគេបានជួយមនុស្សឲ្យមានជំនឿលើព្រះយេស៊ូវ ហើយប្រែចិត្ត ។