« អាលម៉ា អាមូលេក និង ស៊ីអែសរ៉ុម » ដំណើររឿងព្រះគម្ពីរមរមន ( ឆ្នាំ ២០២៣ )
អាលម៉ា អាមូលេក និង ស៊ីអែសរ៉ុម
ការជ្រើសរើសដើម្បីជឿលើ និងគោរពតាមព្រះ
អាលម៉ាបានឃើញថា សមាជិកជាច្រើនក្នុងសាសនាចក្រមិនបានគោរពតាមបទបញ្ញត្តិរបស់ព្រះទេ ។ ដូច្នេះអាលម៉ាបានចេញពីទីក្រុងមួយទៅទីក្រុងមួយ ដើម្បីបង្រៀនព្រះបន្ទូលរបស់ព្រះ ។ មនុស្សជាច្រើនបានប្រែចិត្ត ។ បន្ទាប់មក អាលម៉ាបានមកដល់ទីក្រុងមួយដែលមានឈ្មោះថា អាំម៉ូណៃហា ។ ប្រជាជននៅទីនោះមិនបានស្តាប់តាមលោកទេ ។ ពួកគេស្ដោះទឹកមាត់ដាក់លោក ហើយបានបណ្ដេញលោកចេញពីទីក្រុង ។
អាលម៉ាមានអារម្មណ៍សោកសៅ កាលលោកបានចាកចេញពីទីក្រុងនេះ ។ លោកបានព្រួយបារម្ភអំពីប្រជាជននេះ ។ បន្ទាប់មក មានទេវតាមួយអង្គបានមកជួបលោក ។ ទេវតានោះបានមានបន្ទូលថា អាលម៉ាអាចរីករាយបាន ដោយសារលោកបានគោរពតាមព្រះ ។ ទេវតាបានមានបន្ទូលប្រាប់អាលម៉ាឲ្យត្រឡប់ទៅកាន់ទីក្រុងនេះវិញ ហើយព្រមានប្រជាជននេះ ។ ប្រសិនបើពួកគេមិនព្រមប្រែចិត្តទេ នោះពួកគេនឹងត្រូវបំផ្លាញចោល ។ អាលម៉ាបានត្រឡប់ទៅវិញយ៉ាងលឿន ។
នៅពេលអាលម៉ាបានមកដល់ទីក្រុង នោះលោកឃ្លានយ៉ាងខ្លាំង ។ លោកបានតមអាហារអស់ជាច្រើនថ្ងៃមកហើយ ។ អាលម៉ាបានសូមអាហារពីបុរសម្នាក់ដែលមានឈ្មោះថា អាមូលេក ។
អាមូលេកបានប្រាប់អាលម៉ាអំពីការនិមិត្តមួយ ដែលលោកបានឃើញ ។ នៅក្នុងការនិមិត្តនោះ មានទេវតាមួយអង្គបានប្រាប់អាមូលេកថា អាលម៉ាគឺជាព្យាការីរបស់ព្រះ ។ អាមូលេកចង់ជួយដល់អាលម៉ា ។
អាមូលេកបានអញ្ជើញអាលម៉ាឲ្យមកផ្ទះ ហើយបានឲ្យអាហារលោកបរិភោគ ។ អាលម៉ាបានស្នាក់នៅផ្ទះរបស់អាមូលេក អស់រយៈពេលជាច្រើនថ្ងៃ ។ ព្រះបានប្រទានពរដល់អាមូលេក និងគ្រួសាររបស់លោក ។ ក្រោយមក ព្រះបានមានបន្ទូលប្រាប់អាលម៉ា និងអាមូលេក ថាឲ្យទៅប្រាប់ប្រជាជននៅក្នុងទីក្រុងនេះឲ្យប្រែចិត្ត ។ អាលម៉ា និងអាមូលេក បានគោរពតាម ។ ព្រះបានប្រទានព្រះចេស្ដារបស់ទ្រង់ដល់ពួកលោក ដើម្បីជួយពួកលោកឲ្យបង្រៀន ។
មនុស្សម្នាក់ក្នុងចំណោមប្រជាជននេះ ដែលបានស្ដាប់ឮពួកលោកបង្រៀន មានឈ្មោះថា ស៊ីអែសរ៉ុម ។ គាត់គឺជាមនុស្សឆ្លាតវៃ ហើយចង់បោកប្រាសអាលម៉ា និងអាមូលេក ។ ស៊ីអែសរ៉ុមបានប្រាប់អាមូលេកថា គាត់នឹងឲ្យប្រាក់ជាច្រើនដល់លោក ប្រសិនបើលោកនិយាយថា មិនមានព្រះពិតនោះទេ ។ គាត់ចង់ឲ្យអាមូលេកកុហក ដើម្បីកុំឲ្យប្រជាជនជឿនូវអ្វីដែលអាមូលេក និងអាលម៉ាបានបង្រៀន ។
អាលម៉ា ១០:២៩–៣២; ១១:២១–២៥; ១២:៤–៦
ប៉ុន្តែ អាមូលេកនឹងមិនកុហកអំពីព្រះឡើយ ។ លោកបាននិយាយថា មានព្រះពិតមែន ។ អាមូលេក និងអាលម៉ា ស្គាល់គំនិតរបស់ស៊ីអែសរ៉ុម ។ ស៊ីអែសរ៉ុមអស្ចារ្យក្នុងចិត្តជាខ្លាំង ហើយបានសួរពួកលោកនូវសំណួរជាច្រើន ។ ពួកលោកបានបង្រៀនស៊ីអែសរ៉ុមថា ព្រះមានផែនការមួយសម្រាប់មនុស្សទាំងអស់គ្នា ។ ស៊ីអែសរ៉ុមបានជឿអ្វីដែលអាលម៉ា និងអាមូលេក បានបង្រៀនអំពីព្រះ និងព្រះយេស៊ូវគ្រីស្ទ ។
អាលម៉ា ១១:២៣–៤៦; ១២:១–១៨, ២៤–៣៤; ១៤:៦–៧; ១៥:៦–៧
ស៊ីអែសរ៉ុមបានសោកស្ដាយយ៉ាងខ្លាំងចំពោះកិច្ចការអាក្រក់ជាច្រើនដែលគាត់បានធ្វើ ។ គាត់បានធ្លាក់ខ្លួនឈឺ ។ អាលម៉ា និងអាមូលេក បានទៅសួរសុខទុក្ខគាត់ ។ អាលម៉ាបាននិយាយថា ស៊ីអែសរ៉ុមអាចជាសះស្បើយបាន ដោយសារតែសេចក្ដីជំនឿរបស់ ស៊ីអែសរ៉ុមលើព្រះយេស៊ូវ ។ អាលម៉ាបានទូលសូមព្រះឲ្យព្យាបាលគាត់ ។ ស៊ីអែសរ៉ុមបានក្រោកលោតកញ្ឆេង ។ គាត់បានជាសះស្បើយហើយ ! គាត់បានទទួលបុណ្យជ្រមុជទឹក ហើយបានបង្រៀនប្រជាជនអស់មួយជីវិតរបស់គាត់ ។