« ផ្ទះថ្មីនៅលើដែនដីសន្យា » ដំណើររឿងព្រះគម្ពីរមរមន ( ឆ្នាំ ២០២៣ )
« ផ្ទះថ្មីនៅលើដែនដីសន្យា » ដំណើររឿងព្រះគម្ពីរមរមន
ផ្ទះថ្មីនៅលើដែនដីសន្យា
ពួកសាសន៍នីហ្វៃ និងពួកសាសន៍លេមិន
គ្រួសាររបស់លីហៃ និងសារ៉ាយ បានបន្ដរីកចម្រើនឡើងនៅលើដែនដីសន្យា ។ កូនៗរបស់ពួកគាត់មានកូនរបស់ពួកគេផ្ទាល់ ។ លីហៃមានវ័យកាន់តែចាស់ ។ មុនពេលលោកស្លាប់ លោកបានផ្ដល់ពរជ័យដល់សមាជិកក្នុងគ្រួសាររបស់លោក ។ លោកបានប្រាប់ពួកគេថា នៅពេលពួកគេកាន់តាមបទបញ្ញត្តិទាំងឡាយរបស់ព្រះ នោះព្រះអម្ចាស់នឹងជួយដល់ពួកគេ ។
បន្ទាប់ពីលីហៃបានស្លាប់ទៅ នីហ្វៃបានដឹកនាំគ្រួសារ ។ លោកបានប្រាប់ពួកគេឲ្យគោរពតាមព្រះអម្ចាស់ ។ លេមិន និងលេមយួល បានខឹងសម្បារ ។ ពួកគេចង់សម្លាប់នីហ្វៃ ដើម្បីឲ្យពួកគេអាចដឹកនាំគ្រួសារជំនួសវិញ ។
ព្រះអម្ចាស់បានមានបន្ទូលប្រាប់នីហ្វៃឲ្យចាកចេញទៅជាមួយគ្រួសាររបស់លោក និងអ្នកផ្សេងណាដែលចង់ធ្វើតាមព្រះអម្ចាស់ ។ ពួកគេបានធ្វើដំណើរអស់រយៈពេលជាច្រើនថ្ងៃ ហើយបានរកឃើញកន្លែងថ្មីមួយដើម្បីរស់នៅ ។
អស់អ្នកដែលបានទៅជាមួយនឹងនីហ្វៃ ត្រូវបានហៅថា ពួកសាសន៍នីហ្វៃ ហើយអស់អ្នកដែលបន្ដនៅ ត្រូវបានហៅថា ពួកសាសន៍លេមិន ។ ពួកសាសន៍នីហ្វៃបានសូមឲ្យនីហ្វៃដឹកនាំពួកគេ ។ ពួកគេបានខិតខំធ្វើការងារណាស់ ។ ពួកគេបានធ្វើស្រែចម្ការ ចិញ្ចឹមសត្វជាច្រើន និងបានសង់ព្រះវិហារបរិសុទ្ធមួយ និងអគារផ្សេងៗទៀត ។ ពួកសង្ឃ និងគ្រូបង្រៀនបានបង្រៀនពួកគេអំពីព្រះអម្ចាស់ ហើយប្រជាជនបានសប្បាយរីករាយ ។