Գրքեր և դասեր
Գլուխ 42. Իսրայելի տան հավաքումը

Գլուխ 42

Իսրայելի տան հավաքումը

The Old Testament prophet Israel (Jacob) with his sons gathered around him. One of the sons (Joseph) is kneeling before his father. Israel has his hand on the son's head as he prepares to give him a priesthood blessing.

Իսրայելի տունը Աստծո ուխտյալ ժողովուրդն է

  • Ի՞նչ պատասխանատվություններ ունեն Աստծո ուխտյալ մարդիկ աշխարհի ազգերի հանդեպ:

Հակոբը մեծ մարգարե էր, որը Քրիստոսի ժամանակից հարյուրավոր տարիներ առաջ էր ապրել: Քանի որ Հակոբը հավատարիմ էր, Տերը նրան տվեց Իսրայել հատուկ անունը, որը նշանակում է՝ «նա, ով հաղթում է Աստծո հետ» կամ «թող Աստված հաղթի» (Bible Dictionary, “Israel,” 708): Հակոբը տասներկու որդի ուներ: Այդ որդիները և նրանց ընտանիքները հայտնի դարձան որպես Իսրայելի տասներկու ցեղեր կամ Իսրայելցիներ (տես Ծննդոց ԽԹ.28):

Հակոբը Աբրահամի թոռն էր: Տերը հավիտենական ուխտ կապեց Աբրահամի հետ, որը նորոգվեց Իսահակի հետ և Հակոբի ու նրա որդիների հետ (տես այս գրքի գլուխ 15-ը, տես նաև այս գրքի նկարը, որտեղ պատկերված է Հակոբը, որ օրհնում է իր որդիներին): Աստված խոստացել է, որ Իսրայելցիները կլինեն Իր ուխտյալ ժողովուրդը այնքան ժամանակ, քանի դեռ նրանք հնազանդվում են Նրա պատվիրաններին (տես Երկրորդ Օրինաց ԻԸ.9–10): Նրանք օրհնություն կլինեն աշխարհի բոլոր ազգերին՝ նրանց տանելով ավետարանը և քահանայությունը (տես Աբրահամ 2.9–11): Այդպիսով, նրանք կպահեն իրենց ուխտը Տիրոջ հետ, և Նա կպահի Իր ուխտը նրանց հետ:

Իսրայելի տունը ցրվեց

Կրկին ո կրկին Տիրոջ մարգարեները զգուշացրել են Իրայելի տանը, թե ինչ կպատահի, եթե նրանք ամբարիշտ լինեն: Մովսեսը մարգարեացավ. «Եվ Եհովան քեզ պիտի ցրուէ բոլոր ազգերի մեջ երկրիս մեկ ծայրիցը մինչև մյուս ծայրը» (Երկրորդ Օրինաց ԻԸ.64):

Չնայած այդ զգուշացմանը, Իսրայելցիները մշտապես խախտում էին Աստծո պատվիրանները: Նրանք կռվեցին միմյանց հետ և բաժանվեցին երկու թագավորության՝ Հյուսիսային թագավորություն, որը կոչվեց Իսրայելի թագավորություն, և Հարավային թագավորություն, որը կոչվեց Հուդայի թագավորություն: Իսրայելի տասներկու ցեղերից տասը ապրում էր Հյուսիսային թագավորությունում: Պատերազմի ժամանակ նրանց թշնամիները հաղթեցին նրանց և գերության տարան: Նրանցից ոմանք հետագայում փախան հյուսիսային երկրներ և կորան աշխարհում:

Հյուսիսային թագավորության գերությունից մոտ 100 տարի անց, Հարավային թագավորությունը գրավվեց: Մայրաքաղաք Երուսաղեմը կործանվեց Ք.Ա.586թ., և Իսրայելի մնացած երկու ցեղերի շատ անդամներ գերության մատնվեցին: Ավելի ուշ, այդ ցեղերի որոշ անդամներ վերադարձան և վերակառուցեցին Երուսաղեմը: Նախքան Երուսաղեմի կործանվելը, Լեքին և նրա ընտանիքը, որոնք Իսրայելի տան անդամներ էին, հեռացան քաղաքից և բնակություն հաստատեցին Ամերիկաներում:

Քրիստոսի ժամանակից հետո, Երուսաղեմը կրկին կործանվեց, այս անգամ Հռոմեացի զինվորների կողմից: Հրեաները ցրվեցին աշխարհով մեկ: Այսօր Իսրայելցիները գտնվում են աշխարհի բոլոր երկրներում: Այդ մարդկանցից շատերը չգիտեն, որ իրենք Իսրայելի հնագույն տան հետնորդներն են:

  • Ի՞նչ օգուտներ են եկել Աստծո զավակներին Նրա ուխտյալ ժողովրդի աշխարհով մեկ ցրվելու հետևանքով:

Իսրայելի տունը պետք է հավաքվի

  • Ինչո՞ւ է Տերը ցանկանում, որ Իր ժողովուրդը հավաքվի:

  • Ինչպե՞ս կհավաքվի Իսրայելի տունը:

Տերը խոստացել է, որ Իր ուխտյալ ժողովուրդը մի օր կհավաքվի. «Ես պիտի ժողովեմ իմ հոտի մնացորդը այն ամեն երկիրներիցը, ուր որ նորանց աքսորեցի» (Երեմիա ԻԳ.3):

Աստված հավաքում է Իր զավակներին միսիոներական աշխատանքի միջոցով: Երբ մարդիկ գալիս են Հիսուս Քրիստոսի գիտելիքին, ստանալով փրկության արարողությունները և պահելով դրանց հետ կապված ուխտերը, նրանք դառնում են «ուխտի զավակներ» (3 Նեփի 20.26): Նա Իր զավակներին հավաքելու կարևոր պատճառներ ունի: Նա հավաքում է նրանց, որպեսզի նրանք կարողանան սովորել ավետարանի ուսմունքները և պատրաստվեն հանդիպելու Փրկչին, երբ Նա կրկին կգա: Նա հավաքում է նրանց, որպեսզի նրանք կառուցեն տաճարներ և սուրբ արարողություններ կատարեն նախնիների համար, ովքեր մահացել են առանց այդ հնարավորությունն ունենալու: Նա հավաքում է նրանց, որպեսզի նրանք կարողանան ամրացնել միմյանց և միավորվեն ավետարանով՝ պաշտպանություն գտնելով աշխարհի անիրավ ազդեցություններից: Նա նաև հավաքում է նրանց, որպեսզի նրանք պատրաստվեն ավետարանով կիսվելու մյուսների հետ:

Իսրայելի տան հավաքման աշխատանքը ղեկավարելու զորությունն ու իշխանությունը տրվեց Ջոզեֆ Սմիթին Մովսես մարգարեի միջոցով, որը հայտնվեց 1836թ. Կիրթլանդի Տաճարում (տես ՎևՈւ 110.11): Այդ ժամանաից ի վեր, յուրաքանչյուր մարգարե կրել է Իսրայելի տան հավաքման բանալիները, և այս հավաքումը Եկեղեցու աշխատանքի կարևոր մասն է եղել: Այժմ ուխտյալ մարդիկ հավաքվում են ընդունելով վերականգնված ավետարանը, ծառայելով Աբրահամի, Իսահակի և Հակոբի Աստծուն (տես Երկրորդ Օրինաց Լ.1–5):

Իսրայելցիները պետք է հավաքվեն նախ հոգևոր ձևով, ապա ֆիզիկապես: Նրանք հավաքվել են հոգևոր ձևով՝ միանալով Հիսուս Քրիստոսի Վերջին Օրերի Սրբերի Եկեղեցուն կապելով և պահելով սրբազան ուխտեր: Այս հոգևոր հավաքումը սկսվել է Մարգարե Ջոզեֆ Սմիթի ժամանակից սկսած և առ այսօր շարունակվում է ամբողջ աշխարհում: Եկեղեցու նորադարձները Իսրայելցիներ են՝ արյունով կամ ընդունելով: Նրանք պատկանում են Աբրահամի և Հակոբի ընտանիքին (տես Աբրահամ 2.9–11; Գաղատացիս Գ.26–29):

Նախագահ Ջոզեֆ Ֆ. Սմիթն ասել է. «Շատ ազգերի ներկայացուցիչներ կան …Եկեղեցում: … Նրանք եկել են, որովհետև Տիրոջ Հոգին իջել է նրանց վրա, … ստանալով հավաքման հոգին, հանուն ավետարանի նրանք թողել են ամեն ինչ» (Doctrines of Salvation, comp. Bruce R. McConkie, 3 vols. [1954–56], 3:256; շեղագիրը բնագրից):

Իսրայելի ֆիզիկական հավաքում նշանակում է՝ ուխտյալ մարդիկ «կժողովվեն տուն՝ դեպի իրենց ժառանգության հողերը և կհաստատվեն բոլոր իրենց խոստումի երկրներում» (2 Նեփի 9.2): Եփրեմի և Մանասեի ցեղերը կհավաքվեն Ամերիկաներում: Հուդայի ցեղը կվերադառնա Երուսաղեմ քաղաք և դրա շրջակայքը: Կորած տաս ցեղերը Եփրեմի ցեղից կստանան իրենց խոստացված օրհնությունները (տես ՎևՈւ 133.26–34):

Երբ Եկեղեցին առաջին անգամ հաստատվեց, Սրբերին հրահանգվեց հավաքվել Օհայոյում, ապա Միսսուրիում, ավելի ուշ՝ Սոլթ Լեյքի Հովտում: Ինչևէ, այսօր մեր օրերի մարգարեները ուսուցանել են, որ Եկեղեցու անդամները պետք է Աստծո արքայությունը կառուցեն իրենց երկրներում: Երեց Ռասել Մ. Նելսոնն ասել է. «Եկեղեցի գալու ընտրությունը ոչ թե ֆիզիկական տեղանքի, այլ անձնական պարտավորվածության հարց է: Մարդիկ կարող են «բերվել Տիրոջ իմացությանը», [3 Նեփի 20.13] առանց իրենց հայրենիքից հեռանալու: Իրոք, Եկեղեցու վաղ օրերին դարձի գալ հաճախ նշանակում էր նաև գաղթել: Իսկ այժմ հավաքումը տեղի է ունենում յուրաքանչյուր պետության մեջ: … Բրազիլացի Սրբերի համար հավաքման վայրը Բրազիլիան է, Նիգերիայի Սրբերի համար հավաքման վայրը՝ Նիգերիան, Կորեացի Սրբերի համար հավաքման վայրը՝ Կորեան, և այսպես շարունակ: Սիոնը «սրտով մաքուրներն են» [ՎևՈւ 97.21] Սիոնը այնտեղ է, որտեղ արդարակյաց Սրբերն են» (in Conference Report, Oct. 2006, 85; or Ensign, Nov. 2006, 81):

Իսրայելի ֆիզիկական հավաքումը չի ավարտվի մինչև Փրկչի Երկրորդ Գալուստը և կշարունակվի Հազարամյակում (տես Ջոզեֆ Սմիթ—Մատթեոս 1.37): Այնուհետև Տիրոջ խոստումը կկատարվի.

«Ահա, օրերը կգան, ասում է Տերը, որ այլևս չի ասուիլ, թե՝ Կենդանի է Տերը, որ Իսրայելի որդկանցը վեր հանեց Եգիպտոսի երկրիցը,

Այլ թե՝ Կենդանի է Տերը, որ հանեց Իսրայելի որդկանցը հյուսիսի երկրիցը, և այն բոլոր երկրներիցը, ուր որ նրանց աքսորել էր. և ես պիտի ետ դարձնեմ նրանց դեպի իրանց երկիրը, որ տվել եմ իրանց հայրերին» (Երեմիա ԺԶ.14–15):

  • Ինչպե՞ս եք դուք հոգևոր ձևով հավաքվել որպես Տիրոջ ուխտյալ ժողովրդից մեկը:

  • Ինչպե՞ս եք դուք մասնակցել ուրիշների հավաքմանը:

Լրացուցիչ սուրբ գրություններ