Գլուխ 47

Վեհացում

Մեր առաջընթացի ծրագիրը

Երբ մենք ապրում էինք մեր Երկնային Հոր հետ, Նա մեզ մեր առաջադիմելու համար մի ծրագիր բացատրեց: Մենք կարող էինք դառնալ Նրա պես վեհացած էակ: Այդ ծրագիրը պահանջում էր, որ մենք բաժանվեինք Նրանից և երկիր գայինք: Այդ բաժանումը անհրաժեշտ էր, որպեսզի ստուգվեր, արդյոք մենք կհնազանդվենք մեր Հոր պատվիրաններին, չնայած որ մենք այլևս Նրա ներկայության մեջ չէինք լինելու: Ըստ այդ ծրագրի, երբ երկրային կյանքն ավարտվեր, մենք պետք է դատվեինք և վարձահատույց լինեինք ըստ մեր հավատի և հնազանդության աստիճանի:

Սուրբ գրություններից մենք սովորում ենք, որ երկնքում կան փառքի երեք թագավորություններ: Պողոս Առաքյալը հիշատակել է, որ նա ճանաչում էր մի մարդու, որը «հափշտակուեցավ մինչև երրորդ երկինքը» (Բ Կորնթացիս ԺԲ.2): Պողոսը անվանել է երկնքի երկու արքայությունները՝ արեգակի (սելեստիալ) և լուսնի (թերեստրիալ) (տես Ա Կորնթացիս ԺԵ.40–42): Սելեստիալը ամենաբարձրն է, իսկ թերեստրիալը՝ երկրորդը: Վերջին օրերի հայտնության միջոցով մենք սովորում ենք, որ երրորդ թագավորությունը թելեստիալ թագավորությունն է (տես ՎևՈւ 76.81): Մենք նաև սովորում ենք, որ կա երեք երկինք կամ աստիճաններ սելեստիալ թագավորության մեջ (տես ՎևՈւ 131.1):

Վեհացում

• Ի՞նչ է վեհացումը:

Վեհացումը հավերժական կյանքն է՝ այն կյանքը, ուր Աստված է ապրում: Նա ապրում է մեծ փառքի մեջ: Նա կատարյալ է: Նա ունի ողջ գիտելիքն ու իմաստությունը: Նա հոգևոր զավակների Հայրն է: Նա արարիչն է: Մենք կարող ենք մեր Երկնային Հորը նմանվել: Սա է վեհացումը:

Եթե ապացուցում ենք Տիրոջ հանդեպ մեր հավատարմությունը, մենք կապրենք երկնային սելեստիալ թագավորության բարձրագույն աստիճանում: Մենք վեհացած կդառնանք, որպեսզի հավերժական ընտանիքներով ապրենք մեր Երկնային Հոր հետ: Վեհացումը մեծագույն պարգևն է, որ Երկնային Հայրը կարող է տալ Իր զավակներին (տես ՎևՈւ 14.7):

Վեհացման օրհնությունները

• Նշեք մի քանի օրհնություններ, որոնք կտրվեն նրանց, ովքեր վեհացում կստանան:

Մեր Երկնային Հայրը կատարյալ է, և Նա հպարտանում է այն փաստով, որ Իր զավակները կարող են Իր նման դառնալ: Նրա գործն ու փառքն է՝ «իրականացնել մարդու անմահությունն ու հավերժական կյանքը» (Մովսես 1.39):

Նրանք, ովքեր վեհացում են ստանում սելեստիալ արքայությունում Հիսուս Քրիստոսի հանդեպ հավատով, հատուկ օրհնություններ կստանան: Տերը խոստացել է. «Բոլոր բաները նրանցն են» (ՎևՈւ 76.59): Վեհացած մարդիկ ստանում են հետևյալ օրհնությունները:

1. Նրանք հավերժ կապրեն Երկնային Հոր և Հիսուս Քրիստոսի ներկայությամբ (տես ՎևՈւ 76.62):

2. Նրանք կդառնան աստվածներ (տես ՎևՈւ 132.20–23):

3. Նրանք հավերժ կմիավորվեն իրենց արդարակյաց ընտանիքի անդամների հետ և կկարողանան ունենալ հավերժական աճ:

4. Նրանք կստանան լիակատար ուրախություն:

5. Նրանք կունենան այն ամենը, ինչ մեր Երկնային Հայրը և Հիսուս Քրիստոսն ունեն՝ ողջ զորությունը, փառքը, իշխանությունը և գիտելիքը (տես ՎևՈւ 132.19–20): Նախագահ Ջոզեֆ Ֆիլդինգ Սմիթը գրել է. «Հայրը խոստացել է Որդու միջոցով, որ իր ողջ ունեցածը կտրվի նրանց, ովքեր հնազանդ են Իր պատվիրաններին: Նրանք կավելանան գիտելիքով, իմաստությամբ և զորությամբ, գնալով շնորհից շնորհ, մինչև որ կատարյալ օրվա լիությունը կփայլատակի նրանց վրա» (Doctrines of Salvation, comp. Bruce R. McConkie, 3 vols. [1954–56], 2:36; շեղագիրը բնագրից):

Վեհացման պահանջները

Վեհացման համար պահանջները այժմ պետք է կատարել (տես Ալմա 34.32–34): Նախագահ Ջոզեֆ Ֆիլդինգ Սմիթն ասել է. «Որպեսզի վեհացում ձեռք բերենք, մենք պետք է ընդունենք ավետարանը և դրա բոլոր ուխտերը, ստանձնենք Տիրոջ առաջարկած պարտականությունները, քայլենք լույսի և ճշմարտության հասկացողության մեջ, և «ապրենք Աստծո բերանից դուրս եկող ամեն խոսքով» (Doctrines of Salvation, 2:43):

Որպեսզի վեհանանք, մենք նախ պետք է հավատանք Հիսուս Քրիստոսին, իսկ հետո հավատքով համբերենք մինչև մեր կյանքի վերջ: Նրա հանդեպ մեր հավատքը պետք է այնպես լինի, որ մենք ապաշխարենք մեր մեղքերից և հնազանդվենք Նրա պատվիրաններին:

Նա պատվիրում է մեզ բոլորիս ստանալ որոշակի արարողություններ.

1. Մենք պետք է մկրտվենք:

2. Մենք պետք է ձեռնադրվելով հաստատվենք Հիսուս Քրիստոսի Եկեղեցու անդամ և ստանանք Սուրբ Հոգու պարգևը:

3. Եղբայրները պետք է ստանան Մելքիսեդեկյան Քահանայություն և մեծարեն քահանայության իրենց կոչումները:

4. Մենք պետք է տաճարային օժտում ստանանք:

5. Մենք պետք ամուսնանանք հավերժության համար այս կամ հաջորդ կյանքում:

Բացի անհրաժեշտ արարողությունները ստանալը, Տերը պատվիրում է մեզ բոլորիս, որպեսզի մենք՝

1. Սիրենք Աստծուն և մեր մերձավորին:

2. Պահենք պատվիրանները:

3. Ապաշխարենք մեր կատարած սխալներից:

4. Փնտրենք մեր մահացած ազգականներին և նրանց համար ավետարանի փրկող արարողությունները ստանանք:

5. Որքան հնարավոր է կանոնավոր հաճախենք Եկեղեցու մեր հավաքներին, որպեսզի կարողանանք նորոգել մեր մկրտության ուխտերը՝ հաղորդությունը ճաշակելով:

6. Սիրենք մեր ընտանիքի անդամներին և ամրապնդենք նրանց Տիրոջ ուղու վրա:

7. Ամեն օր ընտանիքով և անհատապես աղոթենք:

8. Ավետարանը մյուսներին ուսուցանենք՝ խոսքով և օրինակով:

9. Ուսումնասիրենք սուրբ գրությունները:

10. Լսենք և հնազանդվենք Տիրոջ մարգարեների ոգեշնչված խոսքերին:

Ի վերջո, մեզանից յուրաքանչյուրը պետք է ստանա Սուրբ Հոգին և սովորի հետևել Նրա առաջնորդությանը մեր անձնական կյանքում:

• Ինչպե՞ս են արարողություններն ու ուխտերը պատրաստում մեզ վեհացմանը:

• Ինչպե՞ս է առ Հիսուս Քրիստոս հավատքը օգնում մեզ հնազանդվել պատվիրաններին:

• Ինչո՞ւ պետք է սովորենք հետևել Սուրբ Հոգու հրահանգներին, որպեսզի վեհացում ստանանք:

Երբ հավատարիմ լինենք և համբերենք մինչև վերջ

• Ի՞նչ է տեղի ունենում, երբ մենք համբերում ենք մինչև վերջ, լինելով Քրիստոսի հավատարիմ աշակերտները:

Տերն ասել է. «Եթե պահեք իմ պատվիրանները և համբերեք մինչև վերջ, դուք կունենաք հավերժական կյանք, պարգև, որը մեծագույնն է Աստծո բոլոր պարգևներից» (ՎևՈւ 14.7): Նախագահ Ջոզեֆ Ֆիլդինգ Սմիթն ասել է. «Եթե մենք շարունակենք Աստծով, այսինքն՝ պահենք նրա պատվիրանները, երկրպագենք նրան և ապրենք նրա ճշմարտությունով, այնուհետև կգա ժամանակը, երբ մենք կցողվենք ճշմարտության լիությամբ, որը ավելի ու ավելի կպայծառանա մինչև որ կդառնա կատարյալ օր» (Doctrines of Salvation, 2:36):

Մարգարե Ջոզեֆ Սմիթն ուսուցանել է. «Երբ բարձրանում եք աստիճանով, դուք պետք է սկսեք ներքևից, և քայլ առ քայլ բարձրանաք, մինչև կհասնեք գագաթին: Նույնը վերաբերում է ավետարանի սկզբունքներին, դուք պետք է սկսեք առաջինից, և առաջ գնաք, մինչև կսովորեք վեհացման բոլոր սկզբունքները: Սակայն հրաշալի կլինի, որ մինչև վարագույրի այն կողմ անցնելը [մահանալը], սովորեիք այդ ամենը: Ամեն ինչ չէ, որ հնարավոր է հասկանալ այս աշխարհում, մեր փրկության և վեհացման մասին սովորելու մեծ աշխատանք կկատարվի նույնիսկ գերեզմանից այն կողմ» (Teachings of Presidents of the Church: Joseph Smith [2007], 268):

Ջոզեֆ Սմիթն ուսուցանել է. «Ավետարանի առաջին սկզբունքն է՝ հաստատապես իմանալ Աստծո Բնավորությունը: … Նա ինչ-որ ժամանակ մեզ նման մարդ է եղել, …Աստված, մեր բոլորի Հայրը, ապրել է երկրի վրա, ինչպեսև ինքը՝ Հիսուս Քրիստոսը» (Teachings of the Prophet Joseph Smith, sel. Joseph Fielding Smith [1976], 345–46):

Մեր Երկնային Հայրը գիտի մեր փորձությունները, մեր թուլությունները և մեր մեղքերը: Նա կարեկցանք և ողորմածություն ունի մեր հանդեպ: Նա ցանկանում է, որ մենք հաջողություն ունենանք, ինչպես Նա է ունեցել:

Պատկերացրեք այն ուրախությունը, որ մեզանից յուրաքանչյուրը կապրի, երբ վերադառնա մեր Երկնային Հոր մոտ, եթե մենք կարողանանք ասել. «Հայր, ես ապրեցի Քո կամքի համաձայն: Ես հավատարիմ եմ եղել և պահել եմ Քո պատվիրանները: Ես երջանիկ եմ կրկին տուն գալու համար»: Այն ժամանակ Նա մեզ կասի. «Լավ …քիչ բաների վրա հավատարիմ էիր, ես քեզ շատ բաների վրա կդնեմ. մտիր քո տիրոջ ուրախությունը» (Մատթեոս ԻԵ.23):

• Վերանայեք Մատթեոս ԻԵ.23: Մտածեք, թե ինչպես կզգաք, եթե լսեք Տիրոջը, որը կասի ձեզ այդ խոսքերը:

Ուսուցիչներին. Երբ դասարանի կամ ընտանիքի անդամներին ժամանակ եք տալիս խորհելու ավետարանի ճշմարտությունների, իրենց կյանքի կամ Երկնայի Հոր և Հիսուս Քրիստոսի հանդեպ իրենց սիրո մասին, դուք նրանց հնարավորություն եք տալիս Սուրբ Հոգու կողմից ուսուցանվելու համար:

Լրացուցիչ սուրբ գրություններ

• ՎևՈւ 132.3–4, 16–26, 37 (վեհացմանը պատկանելը)

• ՎևՈւ 131.1–4 (հավերժական ամուսնությունը վեհացման բանալի է)

• ՎևՈւ 76.59–70 (բացատրվում են սելեստիալ փառքի օրհնությունները)

• ՎևՈւ 84.20–21 (աստվածության զորությունը դրսևորվում է քահանայության արարողությունների միջոցով)