Գրքեր և դասեր
Գլուխ 40. Տաճարային աշխատանք և ընտանեկան պատմություն

Գլուխ 40

Տաճարային աշխատանք և ընտանեկան պատմություն

The east spires of the Salt Lake Temple with the Angel Moroni and clouds in the sky.

Երկնային Հայրը ցանկանում է, որ Իր զավակները վերադառնան Իր մոտ

Հիսուս Քրիստոսի Քավությունը հավաստիացնում է մեզանից յուրաքանչյուրին, որ մենք հարություն կառնենք և հավերժ կապրենք: Սակայն եթե մենք պետք է ապրենք հավերժ մեր ընտանիքների հետ Երկնային Հոր ներկայությամբ, մենք պետք է անենք այն ամենը, ինչ Փրկիչը պատվիրում է մեզ: Սա ներառում է մկրտվելը, հաստատվելը և տաճարային արարողությունները ստանալը:

Որպես Հիսուս Քրիստոսի Վերջին Օրերի Սրբերի Եկեղեցու անդամներ, մենք յուրաքանչյուրս մկրտվել ենք և հաստատվել պատշաճ քահանայության իշխանություն կրողի կողմից: Մեզանից յուրաքանչյուրը նաև կարող է գնալ տաճար, ստանալու այնտեղ կատարվող քահանայության փրկող արարողությունները: Սակայն Աստծո զավակներից շատերը չեն ունեցել այդ հնարավորությունները: Նրանք ապրել են մի ժամանակ կամ մի վայրում, երբ ավետարանը մատչելի չի եղել նրանց համար:

Երկնային Հայրը ցանկանում է, որ Իր բոլոր զավակները վերադառնան և ապրեն Իր հետ: Նրանց համար, ովքեր մահացել են առանց մկրտվելու կամ տաճարային արարողությունների, Նա միջոց է տրամադրել դա կատարելու համար: Նա խնդրել է մեզ տաճարում արարողություններ կատարել մեր նախնիների համար:

Տիրոջ Տաճարներ

  • Ինչո՞ւ են տաճարները կարևոր մեր կյանքում:

Հիսուս Քրիստոսի Վերջին Օրերի Սրբերի Եկեղեցու Տաճարները Տիրոջը նվիրագործված հատուկ շինություններ են: Եկեղեցու արժանի անդամները կարող են գնալ այնտեղ, որպեսզի ստանան սուրբ արարողությունները և ուխտեր կապեն Աստծո հետ: Մկրտության պես, այդ արարողություններն ու ուխտերը անհրաժեշտ են մեր փրկության համար: Դրանք պետք է կատարվեն Տիրոջ տաճարներում:

Մենք նաև տաճար ենք գնում ավելին սովորելու Երկնային Հոր և Նրա Որդու՝ Հիսուս Քրիստոսի մասին: Մենք ավելի լավ ենք հասկանում կյանքում մեր նպատակը, և Երկնային Հոր և Հիսուս Քրիստոսի հետ մեր հարաբերությունը: Մեզ ուսուցանվում է մեր նախամահկանացու գոյության, երկրային կյանքի նշանակության և մահից հետո մեր կյանքի մասին:

Տաճարային արարողությունները ընտանիքները հավերժ միասին են կնքում

  • Ի՞նչ է նշանակում կնքվել:

Բոլոր տաճարային արարողությունները կատարվում են քահանայության զորությամբ: Երկրի վրա այդ զորությամբ կատարված արարողությունները կնքվում են կամ կապվում են երկնքում: Փրկիչն ուսուցանեց Իր Առաքյալներին. «Այն որ կապես երկրի վրա, կապուած կլինի երկնքում» (Մատթեոս ԺԶ.19; տես նաև ՎևՈւ 132.7):

Միայն տաճարում կարող ենք մենք որպես ընտանիք հավերժ միասին կնքվել: Տաճարային ամուսնությունը տղամարդուն և կնոջը հավերժ միացնում է որպես ամուսին և կին, եթե նրանք պատվում են իրենց ուխտերը: Մկրտությունը և մյուս բոլոր արարողությունները պատրաստում են մեզ այդ սուրբ իրադարձությանը:

Երբ տղամարդը և կինը ամուսնանում են տաճարում, նրանց երեխաները, որոնք ծնվում են դրանից հետո, նույնպես դառնում են նրանց հավերժական ընտանիքի մասը: Քաղաքացիական ամուսնությամբ պսակված զույգերը կարող են այդ օրհնությունները ստանալ՝ պատրաստվելով և պատրաստելով իրենց երեխաներին տաճար գնալու և միմյանց հետ կնքվելու համար: Ծնողները, որոնք երեխաներ են որդեգրում, կարող են օրինապես իրենց կնքել այդ երեխաներին:

  • Ի՞նչ պետք է զույգն անի, որպեսզի կնքման զորությունը արդյունավետ գործի իրենց ամուսնության մեջ:

Մեր նախնիները մեր օգնության կարիքն ունեն

  • Ի՞նչ պատասխանատվություններ մենք ունենք մեր նախնիների հանդեպ, ովքեր մահացել են առանց քահանայության արարողությունները ստանալու:

Մարիո Կանամելան ամուսնացել է Մարիա Վիտայի հետ 1882թ.: Նրանք ապրել են Տրիպանիում, Իտալիա, որտեղ ընտանիք են ստեղծել և հրաշալի երկար տարիներ ապրել միասին: Մարիոն և Մարիան չէին լսել Հիսուս Քրիստոսի վերականգնված ավետարանի ուղերձը իրենց կյանքի ընթացքում: Նրանք չէին մկրտվել: Նրանք հնարավորություն չեն ունեցել տաճար գնալու և որպես հավերժական ընտանիք միասին կնքվելու: Մահով նրանց ամուսնությունը ավարտվեց:

Մոտ մեկ դար հետո մեծ վերամիավորում տեղի ունեցավ: Մարիոյի և Մարիայի հետնորդները գնացին Լոս Անջելես Տաճար, որտեղ ծոռը և նրա կինը ծնկի իջան զոհասեղանի մոտ և որպես փոխանորդներ ծառայեցին Մարիոյի և Մարիայի կնքման համար: Արցունքները պատեցին նրանց աչքերը, երբ նրանք կիսեցին Մարիոյի և Մարիայի ուրախությունը:

Մեր նախնիներից շատերը նրանց շարքում են, ովքեր մահացել են երկրի վրա չլսելով ավետարանի մասին: Նրանք այժմ ապրում են հոգևոր աշխարհում (տես այս գրքի գլուխ 41): Այնտեղ նրանց ուսուցանվում է Հիսուս Քրիստոսի ավետարանը: Նրանք, ովքեր ընդունել են ավետարանը, սպասում են տաճարային արարողություններին, որ պետք է իրենց համար կատարվեն: Տաճարում մեր նախնիների համար այդ արարողությունները կատարելիս մենք կարող ենք կիսել այդ ուրախությունը:

  • Ինչպե՞ս է մահացածների համար փրկության վարդապետությունը ցույց տալիս Աստծո արդարադատությունը, կարեկցանքը և ողորմածությունը:

  • Ի՞նչ փորձառություններ եք դուք ունեցել ձեր նախնիների համար տաճարային աշխատանք կատարելիս:

Ընտանեկան պատմություն—Ինչպես ենք մենք սկսում օգնել մեր նախնիներին

  • Որո՞նք են ընտանեկան պատմության աշխատանքը կատարելու կարևոր քայլերը:

Վերջին Օրերի Սրբերին քաջալերվում է մասնակցել ընտանեկան պատմության միջոցառումներին: Այդ միջոցառումների շնորհիվ մենք սովորում ենք մեր նախնիների մասին, և որ մենք կարող ենք արարողություններ կատարել նրանց համար: Ընտանեկան պատմությունը ներառում է երեք հիմնական քայլեր.

  1. Գտնել մեր նախնիներին:

  2. Պարզել, թե որ նախնիները տաճարային արարողությունների կարիքն ունեն:

  3. Հավաստիանալ, որ արարողությունները կատարվել են նրանց համար:

Հիմնականում ծխերն ու ճյուղերը ունեն ընտանեկան պատմության խորհրդատուներ, որոնք կարող են պատասխանել հարցերին և մեզ ուղղել մեզ համար անհրաժեշտ աղբյուրներին: Եթե ծուխը կամ ճյուղը չունի ընտանեկան պատմության խորհրդատու, եպիսկոպոսը կամ ճյուղի նախագահը կարող են ուղղություն տալ:

Գտնել մեր նախնիներին

Մեր նախնիների համար տաճարային արարողություններ կատարելու համար մենք պետք է գտնենք նրանց անունները: Շատ հրաշալի աղբյուրներ կան այսօր մատչելի, որոնք կարող են օգնել մեզ գտնել մեր նախնիների անունները:

Մեր նախնիների մասին տեղեկություն հավաքելու լավ միջոց է պարզել, թե ինչ մենք ունենք մեր տներում: Մենք կարող ենք ունենալ ծննդյան, ամուսնության կամ մահվան վկայականներ: Մենք կարող ենք նաև գտնել ընտանեկան Աստվածաշունչ, մահախոսական, ընտանեկան պատմություններ կամ օրագրեր ու մատյաններ: Ինչպես նաև, մենք կարող ենք հարցնել մեր բարեկամներին, թե ինչ տեղեկություն իրենք ունեն: Մեր տանը մեր նախնիներից ունեցած տեղեկությունը հավաքելուց հետո, մենք կարող ենք փնտրել այլ աղբյուրներում, օրինակ FamilySearch.org կայքում: Մենք կարող ենք նաև այցելել Եկեղեցու տեղական ընտանեկան պատմության կենտրոններից մեկը:

Ինչ կիմանանք, կախված կլինի, թե ինչ տեղեկություն է մեզ մատչելի: Մենք կարող ենք ունենալ միայն մի փոքր ընտանեկան տեղեկություն և հնարավոր է միայն ունենանք մեր ծնողների և տատիկների, պապիկների անունները: Եթե մենք արդեն ունենք ընտանեկան գրառումների մի մեծ հավաքածու, հնարավոր է կարողանանք պարզել տարբեր սերունդների մեր նախնիների անունները:

Մենք կարող ենք գրանցել մեր հավաքած տեղեկությունը ընտանեկան խմբի գրառումների վրա և տոհմաբանական աղյուսակներում:

Պարզեք, թե որ նախնիները տաճարային արարողությունների կարիքն ունեն:

Տաճարային արարողություններ են կատարվել մահացածների համար Եկեղեցու վաղ օրերից ի վեր: Հետևաբար, մեր նախնիների համար որոշ արարողություններ հնարավոր է արդեն կատարվել են: Որպեսզի պարզենք, թե որ նախնիները տաճարային արարողությունների կարիքը ունեն, մենք կարող ենք նայել երկու տեղ: Մեր անձնական ընտանեկան գրառումներում հնարավոր է տեղեկություն լինի կատարված արարողությունների վերաբերյալ: Եթե ոչ, Եկեղեցին գրանցում է տաճարում կատարված բոլոր արարողությունները: Ձեր ծխի կամ ճյուղի ընտանեկան պատմության խորհրդատուն կարող է օգնել ձեզ այդ հարցում:

Հավաստիացեք, որ արարողությունները կատարվել են

Մեր նախնիներից շատերը հոգևոր աշխարհում հնարավոր է անհամբեր սպասում են իրենց տաճարային արարողություններին: Երբ գտնում ենք այդ նախնիների անունները, մենք պետք է արագ կազմակերպենք այդ աշխատանքը նրանց համար:

Ընտանեկան պատմության աշխատանքի օրհնություններից մեկը գալիս է տաճար գնալու և մեր նախնիների համար արարողություններ կատարելու արդյունքում: Մենք պետք է պատրաստվենք տաճարային երաշխավորագիր ստանալուն, որպեսզի հնարավորության դեպքում կարողանանք կատարել այդ աշխատանքը: Եթե մեր երեխաները 12 տարեկան կամ ավել են, նրանք կարող են կիսել այդ օրհնությունները՝ մկրտվելով և հաստատվելով իրենց նախնիների համար:

Եթե մեզ համար հնարավոր չէ տաճար գնալ և արարողություններին մասնակցել, տաճարը կկազմակերպի արարողություններ կատարելը՝ Եկեղեցու այլ անդամների միջոցով:

  • Ինչպե՞ս է Տերը օգնել ձեզ կամ ձեր ընտանիքի անդամներին տեղեկություն գտնել ձեր նախնիների մասին:

Ընտանեկան Պատմության լրացուցիչ հնարավորությունները

  • Նշեք մի քանի պարզ ուղիներ, թե ինչպես կարող է բազմաթիվ այլ պարտականություններ ունեցող մարդը ընտանեկան պատմության աշխատանքին մասնակցել:

Նախնիների համար տաճարային արարողություններ կատարելուց բացի, մենք կարող ենք շատ այլ միջոցներով օգնել նրանց, ովքեր հոգևոր աշխարհում են: Մենք պետք է փնտրենք Հոգու առաջնորդությունը, երբ աղոթքով մտածում ենք, թե ինչ կարող ենք անել: Մեր պայմաններից կախված մենք կարող ենք կատարել հետևյալը.

  1. Որքան հնարավոր է հաճախակի գնալ տաճար: Մեզ համար տաճար գնալուց հետո, մենք կարող ենք փրկող արարողություններ կատարել մյուսների համար, որոնք սպասում են հոգևոր աշխարհում:

  2. Կատարել հետազոտություն, որպեսզի գտնենք նախնիների անուններ, որոնց ամենադժվարն է գտնել: Ընտանեկան պատմության խորհրդատուները կարող են մեզ հղել տարբեր աղբյուրների:

  3. Օգնություն Եկեղեցու ցուցչային ծրագրից: Այդ ծրագրով, անդամները պատրաստում են տոհմաբանական տեղեկություն Եկեղեցու ընտանեկան պատմության համակարգչային ծրագրերում օգտագործելու համար: Այդ ծրագրերը մեզ համար հեշտացնում են մեր նախնիներին գտնելը:

  4. Ընտանիքի պատմության տեղեկություն տրամադրեք Եկեղեցու ներկայիս համակարգչային ծրագրերին ընտանեկան պատմության համար: Այս ծրագրերը պարունակում են ողջ աշխարհի մարդկանց կողմից տրամադրված տոհմաբանություններ: Դրանք թույլ են տալիս մարդկանց կիսվել իրենց ընտանիքի տեղեկությամբ: Ընտանեկան պատմության խորհրդատուները կարող են ավելի շատ տեղեկություն տրամադրել Եկեղեցու համակարգչային ծրագրերի վերաբերյալ:

  5. Մասնակցեք ընտանեկան կազմակերպություններում: Մենք կարող ենք շատ ավելին կատարել մեր նախնիների համար, երբ աշխատենք ընտանիքի մյուս անդամների հետ միասին:

  • Մտածեք, թե ինչ կարող եք անել, որպեսզի առավելագույնս մեծացնեք ձեր մասնակցությունը տաճարային և ընտանեկան պատմության աշխատանքում:

Լրացուցիչ սուրբ գրություններ