“எலியாவும் பாகாலின் ஆசாரியர்களும்,” பழைய ஏற்பாட்டு கதைகள் (2022)
“எலியாவும் பாகாலின் ஆசாரியர்களும்,” பழைய ஏற்பாட்டு கதைகள்
1 இராஜாக்கள் 18
எலியாவும் பாகாலின் ஆசாரியர்களும்
கர்த்தருடைய தீர்க்கதரிசிக்கு எதிராக கள்ள ஆசாரியர்கள்
இஸ்ரவேல் ராஜ்யம் தண்ணீரில்லாமல் தொடர்ந்து துன்பப்பட்டது. ஆகாப் ராஜா, பாகால் என்ற பொய்யான கடவுளைப் பின்பற்றும்படி மக்களிடம் சொன்னான்.
ஆகாபைச் சந்திக்க எலியா தீர்க்கதரிசியை கர்த்தர் அனுப்பினார். எலியா எல்லா மக்களையும் ஒரு மலையின் உச்சிக்கு அழைத்தான். உண்மையான தேவன், கர்த்தரா அல்லது பாகாலா என்று பார்க்க ஒரு சவாலுக்கு அவன் ராஜாவையும் அவனுடைய ஆசாரியர்களையும் அழைத்தான்.
எலியா சவாலை விளக்கினான். அவனும் ஆசாரியர்களும் ஒரு பலிபீடத்தின் மீது ஒரு காளையை பலியிடுவார்கள், ஆனால் அவர்கள் தாங்களே நெருப்பைக் கொளுத்த மாட்டார்கள். அதற்கு பதிலாக, ஆசாரியர்கள் பாகாலிடம் நெருப்பைப் பற்றவைக்க ஜெபிப்பார்கள். பின்னர் எலியா ஒரு நெருப்பைப் பற்றவைக்க கர்த்தரிடம் ஜெபிப்பான். உண்மையான தேவன் மட்டுமே நெருப்பைப் பற்ற வைப்பார் என்பதை எலியா அறிந்திருந்தான்.
பாகாலின் ஆசாரியர்கள் காலை முதல் நண்பகல் வரை தங்கள் கடவுளிடம் ஜெபம் செய்தார்கள், ஆனால் எதுவும் நடக்கவில்லை. எலியா அவர்களைக் கேலி செய்து, அவர்களின் கடவுள் பாகால் தூங்குகிறான் என்று கூறினான்.
1 இராஜாக்கள் 18:26–27 பார்க்கவும்.
ஆசாரியர்கள் கோபமடைந்து, பலிபீடத்தின் மீது குதித்து, மாலைவரை கூச்சலிட்டனர். தங்கள் கடவுள் பதிலளிப்பார் என்று அவர்கள் நம்பினார்கள், ஆனால் இன்னும் நெருப்பு பற்றவில்லை.
அது எலியாவின் முறை. அவன் கர்த்தருக்கு ஒரு பலிபீடத்தைக் கட்டினான், பலிபீடத்தைச் சுற்றி ஒரு அகழி தோண்டினான், பலியை தயார் செய்தான்.
எலியா நான்கு பீப்பாய்கள் தண்ணீரை நிரப்பி தனது பலிபீடத்தின் விறகு மீது மூன்று முறை ஊற்றும்படி மக்களைக் கேட்டான். தண்ணீர் விறகையும் பலிபீடத்தையும் நனைத்தது. அது முழு அகழியையும் நிரப்பியது.
1 இராஜாக்கள் 18:33–37 பார்க்கவும்.
உண்மையான தேவனின் சக்தியைக் காட்டும்படி எலியா இறைவனிடம் பிரார்த்தனை செய்தான். கர்த்தரின் நெருப்பு வந்து பலி, விறகு, கற்கள் மற்றும் தண்ணீரை பட்சித்தது. எலியாவின் தேவன் உண்மையான தேவன் என்று மக்கள் அறிந்தார்கள். வறட்சி முடிவுக்கு வரும்படி எலியா ஜெபித்தான், கர்த்தர் மழையை அனுப்பினார்.