Pasiuna sa Materyal sa Magtutudlo sa Ang Mahangtoron nga Pamilya (Religion 200)

Welcome sa kurso sa Ang Mahangtoron nga Pamilya! Salamat sa pagdawat sa kahigayonan sa pagtabang sa mga young adult nga moduol ngadto kang Jesukristo pinaagi sa pagtuon sa doktrina sa pamilya diha sa plano sa Langitnong Amahan. Kini nga kurikulom gidesinyo aron sa pagtabang kanimo nga mopasiugda og mga kasinatian nga nakasentro ni Kristo ug nagtutok sa tigkat-on alang sa imong mga estudyante nga mogiya kanila ngadto sa mas lawom nga pagkakabig ngadto sa Manluluwas.

Unsa ang gitinguha nga mga sangpotanan niini nga kurso?

Ang Tumong sa Seminaries and Institutes of Religion namahayag:

Ang atong katuyoan mao ang pagtabang sa kabatan-onan ug mga young adult nga makasabot ug makasalig sa mga pagtulon-an ug sa Pag-ula ni Jesukristo, makasarang sa mga panalangin sa templo, ug makaandam sa ilang mga kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit. (Pagtudlo ug Pagkat-on sa Ebanghelyo: Usa ka Tamdanan nga Basahon [Handbook] alang sa mga Magtutudlo ug sa mga Lider sa Seminaries and Institutes of Religion [2012], 1)

Sa pagtuman sa Tumong sa Seminaries and Institutes of Religion, kini nga kurso gidesinyo aron sa pagtabang sa mga estudyante

• mopasabot sa importante nga tahas sa pamilya diha sa plano sa Langitnong Amahan sa kaluwasan,

• moanalisar sa mga pangutana nga may kalabotan sa pamilya ug sa mga butang nga adunay mahangtoron nga panglantaw,

• molihok inubanan sa hugot nga pagtuo diha kang Jesukristo kon moatubang og personal ug pamilya nga mga hagit ug mga pagpamugos sa katilingban,

• mogamit sa mga pagtulon-an ni Jesukristo sa ilang mga paningkamot sa paghimo ug pagtuman og sagrado nga mga pakigsaad ug sa pagpalig-on sa mga relasyon sa pamilya, ug

• mopalambo sa ilang kapasidad sa pagtuman sa sagrado nga mga responsibilidad diha sa kinabuhi sa pamilya ug mahimong mas sama sa Langitnong Amahan ug ni Jesukristo.

Giunsa man paghimo kini nga manwal?

Ang mga sulod [content] niini nga manwal gidesinyo aron sa pagtabang sa mga estudyante nga makabaton og makahuluganon, makapalig-on nga mga kasinatian sa gawas ug sa sulod sa lawak klasehanan. Ang matag leksiyon gilangkoban og materyal sa pagpangandam sa klase ug materyal sa magtutudlo. Kini nga mga materyal gidesinyo aron sa pagtabang sa mga estudyante nga mahunahunaon nga mangandam, mohimo og mas lawom nga pagkat-on, ug molihok sa mga paagi nga motabang kanila nga mahimong mas sama sa Langitnong Amahan ug ni Jesukristo.

Si Elder Kim B. Clark, kanhi sa Seventy, nagtudlo unsa ang kinahanglan nga buhaton sa estudyante (ug sa magtutudlo) aron makat-on og maayo:

Kon tinud-anay kamong magtinguha nga makat-on og maayo, kon ang inyong kasingkasing ug hunahuna andam modawat sa pagkat-on, ug kon lih[o]kon ninyo kana nga tinguha, ang Ginoo mopanalangin kaninyo. Kon buhaton ninyo ang inyong bahin—mag-ampo diha sa hugot nga pagtuo, mangandam, magtuon, aktibong moapil, ug mobuhat sa inyong labing maayo—ang Espiritu Santo motudlo kaninyo, mopalambo sa inyong kapasidad sa pagbuhat sa unsay inyong nakat-[o]nan, ug motabang kaninyo nga mamahimo kon unsay gusto sa Ginoo nga kamo mamahimo. (“Pagkat-on alang sa Tibuok Kalag,” Liahona, Ago. 2017, 33-34)

Materyal sa Pagpangandam sa Klase

Ang materyal sa pagpangandam sa klase gituyo aron tun-an nimo ug sa imong mga estudyante agig pagpangandam alang sa klase. Naglakip kini sa mga pagtulon-an gikan sa mga kasulatan ug sa mga lider sa Simbahan ingon usab sa seksiyon sa “Gusto pa ba Mo og Dugang?” nga naghatag sa dugang nga mga kapanguhaan nga may kalabotan sa hilisgotan sa leksiyon.

Ang materyal sa pagpangandam sa klase naglakip usab og mga pangutana ug mga kalihokan nga makatabang sa mga estudyante sa pagpalawom sa ilang pagkat-on ug mahimong mas andam sa pag-apil sa klase. Pananglitan, diha sa materyal sa pagpangandam alang sa leksiyon 10, “Ang Bag-o ug Walay Kataposan nga Pakigsaad sa Kaminyoon,” ang mga estudyante hatagan og oportunidad nga tun-an ang mga pagtulon-an gikan sa mga kasulatan ug sa mga lider sa Simbahan mahitungod sa pakigsaad sa mahangtoron nga kaminyoon ug sa ordinansa sa pagsilyo. Ang mga estudyante dapiton dayon sa pagbuhat sa mosunod nga kalihokan:

Materyal sa Magtutudlo

Ang matag leksiyon gidesinyo alang sa 50 ka minuto nga gidugayon sa klase. Alang sa mga klase nga magtigom makausa sa usa ka semana sulod sa 90 minutos o daghang minuto, ikaw giawhag sa pagtingob sa duha ka leksiyon.

Diha sa pasiuna sa materyal sa magtutudlo alang sa matag leksiyon, imong makita ang usa ka paghulagway sa gitinguha nga mga sangpotanan sa leksiyon. Kini nga pasiuna gisundan sa gisugyot nga mga ideya sa pagtudlo nga maghatag og estruktura sa leksiyon, sulod [content], mga tabang sa panaghisgotan, ug mga ideya sa paggamit.

Samtang imong tun-an ang materyal sa magtutudlo, bantayi kon sa unsang paagi kini makapaaghat sa mga estudyante sa pagpangandam. Ang mosunod nga panudlo gikan sa leksiyon 10 mao ang usa ka ehemplo:

Pinaagi sa kanunay nga paghisgot sa pagpangandam sa mga estudyante, ikaw makatabang kanila nga mobati sa kaimportante sa pagpangandam alang sa matag klase ug makatabang kanila nga makat-on pag-ayo.

Pamalandong agig Pagpangandam sa Pagtudlo Niini nga Kurso

Susama sa unsay buhaton nimo ug sa imong mga estudyante sa dili pa magklase, paggahin og higayon sa pagpamalandong samtang ikaw mangandam sa pagtudlo niini nga kurso. Una motan-aw sa usa o duha ka leksiyon aron mapamilyar sa pagpangandam sa klase ug sa mga materyal sa magtutudlo. Bantayi kon giunsa pagdesinyo kini nga mga materyal aron magamit og dungan samtang ikaw mangandam sa pagtudlo. Dayon pamalandongi ang mosunod nga mga pangutana: Unsa ang pipila ka mga paagi nga mahimo nakong madasig ang mga estudyante sa pagtuon sa materyal sa pagpangandam alang sa matag leksiyon? Unsa ang akong mabuhat aron maapil ang mga estudyante diha sa klase nga tingali wala magtuon sa materyal sa pagpangandam?

Pahinumdom: Kon ang mga estudyante nakaandam alang sa mga panaghisgotan sa klase, imong makita nga ikaw mas dali nga makapadayon sa klase ngadto sa lawom, makahuluganon nga mga panaghisgotan sa doktrina ug mga baroganan kalabot sa mahangtoron nga pamilya. Kini magtugot og dugang nga panahon sa klase sa pagsusi unsaon nimo ug sa imong mga estudyante paggamit ang mga kamatuoran nga ilang nakit-an diha sa mga leksiyon.

Unsaon nako aron epektibong makapangandam sa pagtudlo?

Ang Langitnong Amahan motabang nimo samtang mangandam ka ug magtudlo sa Iyang mga anak. Ang imong mga paningkamot nga makugihong magtuon sa mga kasulatan ug magsunod sa ebanghelyo makatabang kanimo aron mahimong kwalipikado alang sa paggiya sa Espiritu diha sa imong pagpangandam sa pagtudlo.

Samtang tun-an nimo ang pagpangandam sa klase ug ang mga materyal sa magtutudlo alang sa matag leksiyon, pag-ampo alang sa tabang sa Ginoo nga masabtan ang mga panginahanglan sa imong mga estudyante. Si Elder Jeffrey R. Holland sa Korum sa Napulog Duha ka Apostoles mitudlo:

Magpabilin nga bukas—ilabi na gayod sa Espiritu. Paggahin og igong kapailin-ilinan sa inyong plano sa leksiyon. Kon gikinahanglan nga inyong pamub-an og gamay ang usa ka leksiyon aron sa paghatag sa inyong pagpamatuod ug makapasiugda og panaghisgotan kabahin sa kasamtangang isyu, palihog buhata kon giaghat ug gisultihan sa Espiritu nga kini angay. …

… Hinumdomi nga ang usa ka estudyante dili usa ka sudlanan nga pun-on; ang usa ka estudyante usa ka kalayo nga pasigahon. (“Angels and Astonishment” [pagpamulong nga gihatag atol sa Church Educational System training broadcast, Hunyo 12, 2019], broadcasts.ChurchofJesusChrist.org)

Ilabi na kon imong tingbon ang duha ka leksiyon alang sa usa ka tagal sa klase, ikonsiderar ang mga panginahanglan sa imong mga estudyante, ug tinguhaa ang direksyon gikan sa Espiritu. Ang paghimo niining mga butanga makatabang nimo sa pagtino unsa nga mga bahin sa materyal sa magtutudlo ang gamiton sumala sa pagkasulat niini ug hain nga mga bahin ang ipahiangay aron makahatag og mas makahuluganon nga mga kasinatian sa pagkat-on alang sa imong mga estudyante. Kini mahimong maglakip sa pagtino kon unsa nga mga bahin sa materyal sa magtutudlo ang hatagan ug gibug-aton ug unsa ang i-summarize.

Tingali makatabang kanimo ang pagpangutana sa imong kaugalingon sa mosunod nga mga pangutana isip kabahin sa imong pagpangandam sa pagtudlo sa matag leksiyon:

• Nag-ampo ba ako aron makadawat sa giya sa Espiritu Santo ug sa pagsabot sa mga panginahanglan sa akong mga estudyante? Sa unsang paagi nako matino kon unsa nga sulod [content] sa leksiyon ang labing mahinungdanon ngadto kanila? Unsaon nako pagpakita og gugma alang kanila?

• Mibati ba ako nga adunay igo nga kahibalo diha sa materyal sa pagpangandam sa klase, lakip sa mga kasulatan, ug sa materyal sa magtutudlo? Aduna bay bisan unsang butang nga kinahanglan nakong ipahiangay aron matubag ang mga panginahanglan sa akong mga estudyante?

• Unsaon nako pagtabang ang mga estudyante aron makatutok sa Manluluwas ug makakat-on gikan sa Espiritu Santo niini nga leksiyon?

• Unsaon nako sa pagdapit nga magkugi sa pagkat-on ug pagtabang sa mga estudyante nga hingpit nga moapil sa leksiyon? Unsaon nako sa pagsiguro nga sila adunay panahon nga ilang gikinahanglan sa paghimo og personal nga mga plano sa paggamit sa unsay ilang nakat-onan?

• Unsaon nako sa paghimo og kahimtang sa pagkat-on diin ang mga estudyante mobati nga nahisakop? Unsaon nako sa pagtabang kanila nga mobati nga gihatagan og bili, gidawat, ug luwas nga mopaambit ug makat-on sa usag usa? (Tan-awa sa Doktrina ug mga Pakigsaad 88:78, 122.)

Unsaon nako sa pagpahiangay sa mga leksiyon alang niadtong may mga kakulangan?

Samtang mangandam ka sa pagtudlo, pagmahunahunaon sa mga estudyante nga adunay piho nga mga panginahanglan. Ipahiangay ang mga kalihokan ug mga ekspektasyon aron sa paglakip kanila ug pagtabang kanila nga magmalamposon. Alang sa dugang nga impormasyon, konsultaha ang mga kapanguhaan diha sa Disabilities page sa disabilities.ChurchofJesusChrist.org.

Sa unsa nga paagi nga ang mga estudyante makadawat og credit alang niini nga kurso?

Aron makadawat og credit ngadto na sa paggradwar sa institute, ang mga estudyante gikinahanglan nga

• magtuon sa materyal sa pagpangandam sa dili mominos sa 75 porsyento sa mga leksiyon,

• motambong og 75 porsyento sa mga klase nga gipahigayon, ug

• mokompleto sa usa sa upat ka mga kasinatian sa pagkat-on:

  1. Magtipig og journal sa pagtuon.

  2. Morekord sa mga tubag sa tanan nga mga pangutana ug mga kalihokan diha sa materyal sa pagpangandam (hinumdomi nga ang mga estudyante dili kinahanglan nga mosumiter sa ilang journal sa pagtuon o mga tubag nganha kanimo; sa kataposan sa semester, ipakita lamang nila kanimo unsay ilang nakompleto).

  3. Mosulat sa mga tubag sa tulo ka mugbo nga mga pangutana.

  4. Modesinyo ug mokompleto og ilang kaugalingon nga proyekto sa pagkat-on (nga adunay pagtugot sa magtutudlo) nga may kalabotan sa sulod [content] sa kurso. (Pangita og dugang nga mga detalye sa Pagpalambo sa mga Kasinatian sa Pagkat-on sa Institute nga pahina sa ChurchofJesusChrist.org.)

Irekord ang Inyong mga Hunahuna

Ikonsiderar ang matang sa kasinatian nga imong gilaoman nga mabatonan sa imong mga estudyante niini nga kurso. Ilista ang pipila sa imong mga hunahuna o mga impresyon mahitungod kon sa unsang paagi nga nagplano ka nga makatabang nila nga makabaton og makahuluganon nga kasinatian sa pagkat-on.

Gusto pa og Dugang? (Mahimong sundon o dili)

Unsa ang ubang mga kapanguhaan nga makatabang nako aron mahimong magtutudlo nga gikinahanglan sa Ginoo nga ako mamahimo?

Agig dugang sa pag-apil sa mga miting sa pagbansay sa magtutudlo uban sa imong coordinator o lokal nga faculty, ikonsiderar ang pagrebyo sa mosunod nga mga kapanguhaan:

• Ang Kapanguhaan sa Pagbansay [Training Resource] alang sa Bag-ong Magtutudlo makatabang kanimo nga makasabot sa katuyoan ug pilosopiya sa pagtudlo sa mga Seminary ug mga Institute ingon man usab sa pagtabang kanimo sa pagbansay sa mga kahanas sa pagtudlo.

• Ang Pagtudlo ug Pagkat-on sa Ebanghelyo nga tamdanan nga basahon maoy usa ka mahinungdanon nga kapanguhaan alang sa pagsabot sa proseso sa pagtudlo sa ebanghelyo ug sa pagkat-on unsaon aron mahimong malamposon sa lawak klasehanan.

• Ang kapanguhaan nga Pagtudlo sumala sa Pamaagi sa Manluluwas nagpaambit og mga baroganan aron sa pagtabang sa mga tigtudlo sa ebanghelyo nga motudlo nga mas sama sa Manluluwas.