Leksiyon 5 Materyal sa Magtutudlo

Atong Mortal nga Kasinatian ug ang Gasa sa Pisikal nga Lawas

Didto sa kinabuhi nga wala pa dinhi sa yuta, kita “midawat sa plano sa [Dios] nga naghatag og higayon sa Iyang mga anak nga makaangkon og pisikal nga lawas ug makaangkon og yutan-on nga kasinatian sa paglambo ngadto sa kahingpitan” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Niini nga leksiyon ang mga estudyante dapiton sa pagpasabot sa katuyoan sa atong mortal nga kinabuhi ug unsaon sa atong pisikal nga mga lawas pagtabang kanato sa pag-uswag nga mahimong sama sa Dios. Maghunahuna usab ang mga estudyante kon unsa ang ilang mahimo sa pagpalambo sa ilang kaugalingong mga relasyon sa pamilya pinaagi sa pagbuntog sa kinaiyanhong tawo ug mahimo nga mas sama ni Jesukristo.

Pagpalambo sa Atong Pagtudlo ug Pagkat-on

Awhaga ang mga paninguha sa mga estudyante sa paggamit sa mga kamatuoran sa ebanghelyo pinaagi sa pag-follow up. Ang kataposang mga tumong sa pagkat-on sa ebanghelyo mao ang pagkakabig ngadto sa Langitnong Amahan ug ni Jesukristo ug mahimong sama Kanila. Ang pagkab-ot niini nga mga tumong nagkinahanglan nga kita mogamit sa unsay atong nakat-onan. Makatabang ang mga magtutudlo sa mga estudyante sa ilang mga paninguha sa paggamit sa ilang nakat-onan pinaagi sa angay nga pagsunod sa mga pagdapit nga gihatag diha sa mga leksiyon. Ang mga estudyante kinahanglan nga dili hangyoon sa pagpakigbahin sa bisan unsa nga personal kaayo. Kon ang mga estudyante dili motanyag og bisan unsa nga mga tubag, ang mga magtutudlo makadapit sa mga estudyante sa pagpamalandong diha sa unsay ilang gibati o gisulat sa miaging mga leksiyon ug sa pag-awhag kanila sa paglihok. Pipila lamang ka minuto sa oras sa klase ang kinahanglan nga igahin sa pag- follow up sa mga estudyante.

Mubo nga Sulat: Sa matag leksiyon hinoon, ang mga estudyante gidapit sa paggamit sa ilang nakat-onan sa lain-laing mga paagi. Sama pananglit, sa leksiyon 4 ang mga estudyante naghunahuna kon unsaon nga sila makahimo sa ilang mga pamilya nga mas importante sa ilang mga kinabuhi. Mahimo nimong hangyoon ang mga estudyante sa pagrebyo sa mga panghunahuna nga ilang narekord ug mamalandong sa ilang mga paninguha sa paglihok diha sa unsay ilang gibati. Dayon hunahunaa ang pagdapit og usa o duha ka estudyante kinsa komportable sa pagpakigbahin sa unsay ilang nasinati samtang ilang nasulayan nga mas maayo ang pagpuyo niini nga pagtulon-an. Mahimo nimong himoon kini og usa ka praktis sa pag-follow up sa umaabot nga mga leksiyon ingon nga ikaw mobati nga giaghat.

Mga Sugyot alang sa Pagtudlo

Ang atong pisikal nga mga lawas ug mortal nga mga kasinatian mga kinahanglanon kanato sa pagbaton og kinabuhing dayon.

Ipakita ang mosunod nga sitwasyon (hunahunaa ang pagpahiangay niini ingon nga gikinahanglan aron mas kalabot ngadto sa imong mga estudyante).

Ang imong kauban sa trabaho, si Dmitry, mahigalaon ug makalingaw nga ikauban. Nagtuo siya sa pagbaton og “paglingaw-lingaw nga panahon.” Nagpuyo siya alang sa kakulbahinam ug kalipay. Motambong siya og mga party inig tapos sa semana, nga kasagaran naglakip og pipila ka bino o paggamit sa droga. Dili siya minyo apan aktibo sa sex. Kasagaran siyang moingon sama sa, “Kon maayo ang pagbati, buhata kini” o “Kausa ka ra mabuhi.” Naghunahuna siya nga ikaw nagpuyo og usa ka istrikto ug laay nga kinabuhi tungod kay ikaw nagsunod sa moral nga mga sumbanan sa Simbahan. Bag-ohay siyang nangutana kanimo, “Nganong dili ka moapil og daghang kalingawan ug magpahimulos sa kinabuhi?”

Dapita ang mga estudyante sa paghisgot uban sa usa ka pares o sa usa ka gamay nga grupo kon unsay ilang itubag ngadto sa pangutana ni Dmitry. Awhaga ang mga estudyante sa paghunahuna kon unsaon sa mga kamatuoran mahitungod sa atong pisikal nga mga lawas ug ang katuyoan sa atong mortal nga mga kinabuhi nga gitudlo sa seksiyon 1 sa materyal sa pagpangandam makaabag sa ilang tubag. Human sa igo nga panahon, dapita ang pipila ka estudyante sa pagpakigbahin sa ilang mga tubag. Dayon isulat ang mosunod nga kamatuoran diha sa pisara: Ang atong pisikal nga mga lawas ug mga kahimtang sa mortalidad nag-andam kanato nga mahimong sama sa Dios.

• Sa unsang paagi nga ang pagbaton og usa ka pisikal nga lawas ug pagsinati sa mga kahimtang sa mortalidad nag-andam kanato nga mahimong sama sa Dios? (Hunahunaa ang pagdapit sa mga estudyante sa pagrebyo sa mga pamahayag nila ni Elder D. Todd Christofferson ug David A. Bednar sa seksiyon 1 sa materyal sa pagpangandam. Samtang ang mga estudyante nakigbahin og mga panabot, pangutana og mga follow up nga mga pangutana sa pagtabang kanila paglig-on sa ilang pagsabot.)

Pinaagi ni Jesukristo kita makabuntog sa kinaiyanhon nga tawo.

Isulat ang mosunod nga hugpong sa mga pulong diha sa pisara: Ang Kinaiyanhon nga Tawo. Dapita ang duha ka estudyante sa pagbasa og kusog sa Alma 41:11 ug 1 Mga Taga-Corinto 2:14. Hangyoa ang klase sa pagsunod, mangita sa mga hugpong sa mga pulong nga naghulagway sa kinaiyanhon nga tawo. Ilista diha sa pisara ang mga tubag sa mga estudyante. Dapita ang mga estudyante sa pagrebyo sa pamahayag ni Elder Bednar diha sa seksiyon 2 sa materyal sa pagpangandam aron sa pagpangita og dugang nga mga kinaiya nga idugang ngadto sa lista diha sa pisara.

• Pagpili og usa sa mga kinaiya sa kinaiyanhon nga tawo nga gilista diha sa pisara. Unsaon niana nga kinaiya pag-apekto sa usa ka panag-date o pamilya nga relasyon?

Isulat kini nga hugpong sa mga pulong diha sa pisara: Ang Lalaki o Babaye nga Giusab ni Jesukristo. Dapita ang mga estudyante sa pagbasa sa Mosiah 3:19 ug pangitaa ang unsaon nga kita makabuntog sa kinaiyanhon nga tawo.

• Sa unsang paagi ang Espiritu Santo ug ang Manluluwas nagtabang kanato sa pagbuntog sa kinaiyanhon nga tawo? (Ang mga estudyante mahimong makigbahin sa mga tubag susama sa mosunod nga baroganan: Samtang kita motugyan ngadto sa mga pagdani sa Balaang Espiritu, si Jesukristo motabang kanato sa pagsalikway sa kinaiyanhon nga tawo ug mahimong usa ka santos pinaagi sa Iyang Pag-ula. Mahimo usab ninyong gamiton ang mga pamahayag nila ni Elder Bednar ug Bishop Gérald Caussé sa seksiyon 3 sa materyal sa pagpangandam sa pagtabang sa mga estudyante sa pagsabot niini nga baroganan.)

Hunahunaa ang pagpangutana og usa o dugang pa sa mosunod nga mga pangutana sa pagtabang sa mga estudyante sa paglig-on sa ilang pagsabot:

• Sa unsang paagi kini nga baroganan nagtabang sa usa ka tawo kinsa tingali nagbati sama og siya dili makausab o dili makapugong sa mga kagana ug mga kalit nga mga aghat sa kinaiyanhong tawo?

• Unsa ang pipila ka mga butang ang Manlulwas nakasabot mahitungod sa mga hagit sa usa ka pisikal nga lawas?

• Unsa ang imong nakat-onan mahitungod sa Manluluwas gikan sa giunsa Niya pagtabang kanimo sa “pagsalikway” o sa pagbuntog sa kinainyahon nga tawo ug mahimong mas sama Kaniya? Giunsa sa Balaang Espiritu pagtabang kanimo niini nga mga paninguha?

Sa pagtabang sa mga estudyante sa paggamit og mga kamatuoran, ipakita ang mga pangutana sama sa mosunod ug dapita ang mga estudyante sa pagrekord sa ilang mga hunahuna ug mga panumdoman. (Ang pipila sa mga estudyante mahimong gusto nga modugang ngadto sa ilang mga tubag gikan sa “Irekord ang Imong mga Hunahuna” nga kalihokan diha sa kataposan sa seksiyon 3 sa materyal sa pagpangandam.)

• Hain sa Kristohanong mga hiyas nga gihulagway diha sa Mosiah 3:19 ang akong gikinahanglan nga mapalambo pa sa hingpit?

• Unsa pa ang akong buhaton sa pagsalig og hingpit diha sa Manluluwas ug sa impluwensya sa Balaang Espiritu sa pagtabang kanako sa pagsalikway sa kinaiyanhon nga tawo ug sa pagpalambo niining Kristohanon nga hiyas?

• Unsa nga impluwensya ang mahimo niini nga kausaban diha sa akong mga relasyon sa pamilya?

Awhaga ang mga estudyante sa ilang mga paninguha sa pagbuntog sa ilang mga kahuyang ug mahimong mas sama sa Manluluwas. Hunahunaa ang pagpamatuod nga ang Ginoo mopanalangin kanila uban sa gahom sa pagpalambo sa Iyang mga hiyas ug sa pagpausbaw sa ilang mga relasyon sa pamilya.

Alang sa Sunod nga Higayon

Dapita ang mga estudyante sa pagpamalandong sa unsay ilang nahibaloan mahitungod sa doktrinal nga importansya sa kaminyoon tali sa usa ka lalaki ug usa ka babaye diha sa plano sa Dios. Awhaga ang mga estudyante samtang sila nagtuon sa leksiyon 6 sa pagpaningkamot sa paglig-on sa ilang pagsabot niini nga doktrina ug unsa ang kahulogan niini alang kanila isip mga disipulo ni Jesukristo.