Leksiyon 14 Materyal sa Magtutudlo

Pagpanalipod sa Paggamit sa Pornograpiya

Ang Langitnong Amahan ug si Jesukristo makapanalipod kanato batok sa nagkaylap nga impluwensya sa pornograpiya. Niini nga leksiyon, ang mga estudyante pagadapiton sa pagtino kon unsay ilang mabuhat sa pagdawat niining balaanong pagtabang. Mohunahuna usab ang mga estudyante kon unsaon nila sa pagpaninguha sa gahom sa Ginoo sa pag-ayo gikan sa mga epekto sa paggamit sa pornograpiya.

Mga Sugyot alang sa Pagtudlo

Ang pagsabot sa atong balaanong pagkatawo ug katuyoan nagtabang kanato sa pagbatok sa pornograpiya.

Pagpalambo sa Atong Pagtudlo ug Pagkat-on

Pagbaton og usa ka positibo ug malaomon nga espiritu diha sa leksiyon. Ang espiritu diha diin ikaw ug ang imong mga estudyante naghisgot sa mga pagtulon-an sa ebanghelyo makaimpluwensya sa kinaiya ug kasinatian sa pagkat-on sa ubang mga estudyante. Kini importante ang paghisgot sa mga hilisgotan sama sa pornograpiya sa paagi nga nag-ila sa kaseryoso niini sa walay paghatag og kaulaw. Ang espiritu sa leksiyon makatabang niadtong kansang mga kinabuhi nadaot sa epekto sa pornograpiya nga mobati og paglaom diha sa makaayo nga gahom ni Jesukristo.

Ipakita ang mosunod nga pamahayag ug pangutana, ug dapita ang mga estudyante sa pagtubag:

Ang paggamit og pornograpiya nagkadaghan. Unsa nga mga rason ang ihatag sa pipila ka mga tawo sa paghatag og katarongan sa paggamit sa pornograpiya?

(Ang mga estudyante mahimong mosugyot og pipila sa mosunod: Kini naandan; dili ako makapugong niini; dili kini makapasakit ni bisan kinsa pa; natural kini; kini kalingawan lamang; ang pipila ka pagtuon nagsugyot nga kini makatabang sa sekswal nga paglambo ug suod nga mga relasyon.)

• Unsa ang gitudlo sa Ginoo mahitungod sa pagbatok sa pornograpiya? (Mahimo nga imong itudlo ang mga estudyante ngadto sa mga pagtulon-an sa seksiyon 1 sa materyal sa pagpangandam. Isip kabahin sa panaghisgotan, mahimo nga imong dapiton ang usa ka estudyante sa pagbasa og kusog sa Mateo 5:28 o Doktrina ug mga Pakigsaad 63:16.)

• Unsa ang makadaot nga mga epekto ang pornograpiya aduna diha niadtong kinsa naggamit niini ug diha sa ilang mga pamilya?

Ipakita ang mosunod nga pamahayag nga gihimo ni Elder Tad R. Callister samtang siya nagserbisyo diha sa Kapangulohan sa Seventy:

Diha sa usa ka bag-ohay nga pagbansay nga sesyon alang sa mga General Authority, dihay pangutana: “Sa unsa nga paagi kita makatabang niadtong nakigbisog sa pornograpiya?”

Mibarog si Elder Russell M. Nelson ug mitubag, “Tudloi sila bahin sa ilang pagkatawo ug sa ilang katuyoan.” (“Our Identity and Our Destiny” [debosyonal sa Brigham Young University Education Week, Ago. 14, 2012], speeches.byu.edu)

Isulat ang mosunod nga kamatuoran diha sa pisara: Ang pagsabot sa atong balaanong pagkatawo ug katuyoan makatabang kanato sa pagbatok og gamit sa pornograpiya.

• Sa unsang paagi nga ang pagsabot sa atong kaugalingon ug sa uban nga balaanong pagkatawo ug katuyoan nagtabang kanato sa pagbatok og gamit sa pornograpiya? Unsa ang atong mabuhat aron mas masabtan og maayo ang atong pagkatawo ug katuyoan?

• Unsa ang ubang mga baroganan, mga praktis, o kapanguhaan ang nakatabang kanimo sa pagpanalipod sa imong kaugalingon gikan sa pornograpiya? (Isip kabahin niini nga panaghisgotan, hunahunaa ang pagdapit sa mga estudyante sa pagdrowing sa unsay ilang nakat-onan gikan sa seksiyon 2 sa materyal sa pagpangandam.)

Makaayo si Jesukristo sa mga indibidwal gikan sa mga epekto sa pornograpiya.

Kon mahimo, ipakita ang hulagway sa babaye nga gitalinugo nga nagkab-ot ngadto sa Manluluwas, makita diha sa seksiyon 3 sa materyal sa pagpangandam. Dapita ang usa ka estudyante sa pag-istorya og balik sa kasinatian niini nga babaye ingon nga narekord diha sa Lucas 8:43–48.

• Kon ikaw pa ang diha sa sitwasyon niini nga babaye, unsay imong pagabation human sa daghang mga tuig sa pakigbisog?

• Unsay makat-onan niadtong kinsa nagtinguha nga mamaayo gikan sa mga epekto sa pornograpiya gikan sa ehemplo niini nga babaye? (Mahimong moila ang mga estudyante og usa ka baroganan nga susama sa mosunod: Samtang kita makugihon nga moduol ngadto sa Ginoo diha sa hugot nga pagtuo, Siya makatabang kanato nga mamaayo gikan sa mga epekto sa paggamit sa pornograpiya.)

• Nganong importante ang pagduol ngadto ni Jesukristo diha sa atong mga paningkamot nga mabuntog ang paggamit sa pornograpiya o ang sakit nga nahimo sa usa ka tawo nga naggamit sa pornograpiya?

Hunahunaa ang pagdapit sa usa ka estudyante sa pagbasa og kusog sa pamahayag ni Presidente Russell M. Nelson nga makita sa seksiyon 3 sa materyal sa pagpangandam.

• Unsa nga kalainan ang mahimo kon ang usa ka tawo andam sa pagbuhat sa bisan unsay gikinahanglan nga mamaayo sa Ginoo?

Mahimo nimong ipasabot nga kita makatinguha og mapailubong pagtabang sa uban kinsa nagsagubang sa mga epekto sa pornograpiya ug makalantaw sa ilang panaw sa Kristohanong mga paagi. Pagdungan og basa sa mosunod nga pamahayag ni Presidente Dallin H. Oaks sa Unang Kapangulohan:

Karon usa ka mubong paglakbit kalabot niadtong nangatanggong sa pornograpiya. Kitang tanan nagkinahanglan sa Pag-ula ni Jesukristo. Kadtong nanlimbasog sa pornograpiya nagkinahanglan sa atong kalooy ug gugma samtang sila nagsunod sa gikinahanglan nga mga baroganan ug mga lakang sa pagkaayo. Palihog ayaw sila ipanghimaraot. Dili sila mga daotan o walay paglaom. Sila mga anak nga mga lalaki ug babaye sa atong mahigugmaong Langitnong Amahan. Pinaagi sa tukma ug hingpit nga paghinulsol, sila mamahimong limpyo, putli ug takos sa matag pakigsaad ug mga panalangin sa templo nga gisaad sa Dios. (“Nagpaayo gikan sa Pagkalit-ag sa Pornograpiya,” Liahona, Okt. 2015, 50)

Han-aya ang mga estudyante ngadto sa ginagmay nga mga grupo. Pagpili og usa ka lider alang sa matag grupo, ug hatagi ang matag lider og usa ka kopya sa mosunod nga handout. Tudloi ang mga estudyante sa pagsunod sa mga direksyon diha sa handout.

Pagtabang sa Usa ka Tawo nga Mamaayo gikan sa mga Epekto sa Pornograpiya

Materyal sa Magtutudlo sa Ang Mahangtorong Pamilya—Leksiyon 14

Pagrebyo og dungan sa mosunod nga mga sitwasyon, ug pagpili og usa nga pagahisgotan:

1. Usa ka kauban sa kwarto misalig sa pagsulti nga sila mao pa gyod ang pagkahuman og tan-aw sa pornograpiya sa unang higayon.

2. Ang hinigugma nga lalaki sa usa ka higala misulti kaniya sa miaging gabii nga siya nakigbisog sa paggamit sa pornograpiya.

3. Ang usa ka higala kanunay nagtan-aw og pornograpiya ug nagsulay sa paghunong sa iyang kaugalingon sa makadaghang mga higayon apan wala molampos, bisan pa sa pagbati nga iyang nahimo na ang hapit tanan nga iyang mahimo sa paghunong.

4. Usa ka higala mipakigbahin kanimo nga ang iyang bana nakigbisog sa pornograpiya ug wala siya makahibalo kon unsaon niya pagtabang kaniya. Kini nakadaot sa ilang kaminyoon ug gibati niya ang pagkahugno.

Hisgoti ang mosunod nga mga pangutana:

• Hunahunaa nga kini nga tawo moduol kanimo alang sa panabang. Naggamit sa unsay imong nakat-onan gikan sa pagtuon sa materyal sa pagpangandam ug sa “Gusto og Dugang Pa?” nga seksiyon, unsa nga tambag ang imong ihatag niini nga tawo?

• Sa unsang paagi kini nga tawo makakuha sa panabang sa Ginoo niini nga kahimtang?

© 2022 pinaagi sa Intellectual Reserve, Inc. All rights reserved.

Pagtabang sa Usa ka Tawo nga Mamaayo gikan sa mga Epekto sa Pornograpiya

Human sa igong panahon, dapita ang usa o duha ka estudyante sa pagpakigbahin kon unsay ilang nakat-onan o gibati sa panahon sa ilang panaghisgotan sa grupo.

Hunahunaa ang paghatag sa mga etudyante og panahon sa pagpamalandong ug pagrekord sa ilang mga tubag ngadto sa usa sa mosunod nga mga pangutana:

• Unsa ang akong mabuhat sa pagkab-ot sa gahom sa Ginoo sa pagpanalipod gikan sa pornograpiya ug sa pagdawat sa Iyang panabang nga mamaayo gikan sa mga epekto niini?

• Sa unsa nga paagi ako makatabang sa mahigugmaong paagi sa usa ka tawo kinsa nakigbisog gikan sa mga epekto sa pornograpiya?

Taposa ang leksiyon pinaagi sa panghimatuod sa mga estudyante sa pagkatinuod sa mga baroganan nga giila dinhi sa leksiyon.

Alang sa Sunod nga Higayon

Mahimong imong pakit-on ang mga estudyante sa kalihokan sa panaghisgotan sa kataposan sa seksiyon 1 sa materyal sa pagpangandam alang sa sunod nga leksiyon ug moawhag kanila sa pagsugod og hunahuna mahitungod kon kinsa kaha ang ilang ikasulti alang niini nga kalihokan.