Leksiyon 4 Materyal sa Magtutudlo

Ang Pamilya Sentro sa Plano sa Langitnong Amahan

Ang pamilya sentro sa plano sa atong Langitnong Amahan alang sa atong mahangturong padulngan. Dinhi niini nga leksiyon, ang mga estudyante adunay oportunidad sa pagpasabot kon giunsa sa Paglalang sa yuta, sa Pagkapukan ni Adan ug Eva, ug sa Pag-ula ni Jesukristo pagtugot alang sa mahangturong mga pamilya nga malalang ug mouswag. Ang mga estudyante dapiton usab sa pagtimbang-timbang sa ilang personal nga mga paninguha sa pagmugna ug sa paglig-on sa ilang kaugalingong mahangtoron nga pamilya.

Mga Sugyot alang sa Pagtudlo

Ang Paglalang sa yuta ug ang Pagkapukan ni Adan ug ni Eva mitugot alang sa mga pamilya nga malalang ug motubo.

Pagpalambo sa Atong Pagtudlo ug Pagkat-on

Paghan-ay og may kalabotan ug katuyoan. Ang pagsugod og usa ka leksiyon uban sa may kalabotan nga pangutana, sitwasyon, o problema makagiya sa mga estudyante sa pag-apil sa leksiyon ug sa pagpaninguha og dugang nga kahibalo. Kini makatabang usab kanila sa pagkakita kon giunsa sa mga pagtulon-an sa mga kasulatan ug sa mga lider sa Simbahan karon sa paghatag og mga tubag ug direksyon nga makagiya kanila sa mga sitwasyon sa tinuod nga kinabuhi. Kon ang mga estudyante makakita sa kalabotan sa unsay ilang gitun-an diha sa ilang kaugalingong mga sitwasyon ug mga kahimtang, sila sa kinatibuk-an mas maawhag sa pagkat-on ug paggamit sa mga pagtulon-an sa ebanghelyo.

Han-aya ang mga estudyante sa gagmay nga mga grupo, ug pagtudlo og lider sa kada grupo. Ipakita o hatagi og kopya ang matag grupo sa mosunod nga sitwasyon ug mga pangutana. (Hunahunaa kon unsaon ninyo sa pagpahiangay niini nga sitwasyon ingon nga gikinahanglan aron mas mahimong may kalabotan ngadto sa inyong kultura ug sa mga kinabuhi sa inyong mga estudyante.)

Samtang nagsiksik sa online alang sa usa ka assignment sa klase, nakakita si Rachel og pipila ka mga artikulo nga milantugi nga ang “tradisyonal nga pamilya” (usa ka minyo nga lalaki ug babaye nga may mga anak) wala na kinahanglana sa katilingban. Sa panahon sa klase pipila ka adlaw ang milabay, nakaamgo si Rachel nga siya nag-inusara sa pagpaninguha og depensa sa importansya sa tradisyonal nga pamilya. Daghan sa iyang kauban sa klase mibutang og gamay o walay paghatag og prayoridad sa kaminyoon o sa pagbaton og mga anak. Ngadto kanila, ang kaminyoon ug mga anak babag sa indibidwal nga katumanan sa usa ka tawo. Kini nga kasinatian nagbiya ni Rachel uban sa pipila ka wala matubag nga mga pangutana ug mga pagbati.

• Ngano kaha ang pipila ka mga tawo mibati niini nga paagi mahitungod sa kaminyoon ug pamilya?

• Unsa ang inyong nakat-onan mahitungod sa mga pamilya ug sa plano sa Langitnong Amahan nga makatabang ni Rachel? (Kon gikinahanglan, mahimong rebyohon ninyo ang seksiyon 1 sa materyal sa pagpangandam sa pagtabang sa panaghisgotan.)

Human ang mga estudyante dihay igo nga panahon sa paghisgot sa sitwasyon, dapita sila sa paglista diha sa pisara og pipila sa mga kamatuoran nga ilang gipanagsultihan. Pagtukod diha niini nga mga kamatuoran sa tibuok nga leksiyon.

Mahimo nimong dapiton ang usa ka estudyante sa pagsulti o pagbasa sa Moises 1:39 ug dayon hangyoa ang klase sa pagpasabot unsay gitudlo niini nga bersikulo mahitungod sa mga katuyoan sa plano sa Langitnong Amahan. Kon gikinahanglan, pangutan-a ang mga estudyante kon unsaon nila sa pagpatin-aw ang “kinabuhing dayon” ug giunsa niana nga katuyoan kalabut ngadto sa pamilya. (Tan-awa ang unang seksiyon sa materyal sa pagpangandam alang sa tabang sa pagpatin-aw.)

Hunahunaa ang pagpakita sa mga hulagway nga nagrepresentar sa Paglalang ug sa Pagkapukan ni Adan ug ni Eva. Dapita ang mga estudyante sa pagrebyo sa Doktrina ug mga Pakigsaad 49:15–17 ug 2 Nephi 2:22–23. Dayon ipangutana ang mosunod:

• Giunsa pagtabang sa Paglalang sa yuta pagtuman sa mahangturon nga mga katuyoan sa Langitnong Amahan alang sa Iyang mga anak? (Ang tubag sa mga estudyante mahimong susama sa mosunod: Ang yuta gilalang sa paghatag og dapit diin ang mga anak sa Dios mahimong matawo ngadto sa mga pamilya ug mag-uswag og dungan.)

• Giunsa sa Pagkapukan ni Adan ug ni Eva pagtabang og dugang pa sa mga katuyoan sa Amahan ug tugotan ang yuta nga “makatuman sa tuyo [o katuyoan] sa paglalang niini”? (Doktrina ug mga Pakigsaad 49:16). (Ang mga estudyante mahimong mohatag og lain-laing mga tubag, lakip ang pagpahayag og usa ka kamatuoran nga sama niini: Tungod sa Pagkapukan, si Adan ug Eva mahimong manganak ug ang ilang kaliwat makauswag ngadto sa kinabuhing dayon.)

• Unsaon nga ang pagsabot niining mga katuyoan sa Paglalang ug sa Pagkapukan makaimpluwensya sa atong mga paningkamot sa pagprayoridad ug sa pagtukod sa atong kaugalingong mahangturong mga pamilya?

Pinaagi sa Iyang Pag-ula, si Jesukristo naghimo sa mahangturong mga pamilya nga posible.

Hunahunaa ang paghisgot og daklit sa mosunod nga pangutana isip usa ka klase:

• Unsa ang tahas sa Manluluwas ug sa Iyang Pag-ula sa paghimo sa mahangturong mga pamilya nga posible? (Hunahunaa ang pagrebyo sa 2 Nephi 9:6–8, 10, 18 sa pagtabang sa mga estudyante sa pag-ila nga pinaagi sa Pag-ula, naghatag si Jesukristo sa dalan alang sa tanan nga mga anak sa Langitnong Amahan sa pagbuntog sa sala ug sa kamatayon.)

Ipakita ang mosunod nga pamahayag ni Presidente M. Russell Ballard, sa Korum sa Napulog Duha ka Apostoles:

Ang gikinahanglan gayod aron makonektar kining tanan—diin ang plano sa Dios ug ang atong padulngan mag-agad ug maglihok—mao ang atong Manluluwas, si Jesukristo. Ang maulaon Niyang sakripisyo naghimong posible sa tanang butang, lakip, apan dili limitado, sa mahigugmaon, mapinanggaon, ug mahangturong kaminyoon ug pamilya. (M. Russell Ballard, “The Opportunities and Responsibilities of CES Teachers in the 21st Century” [usa ka gabii kauban sa General Authority, Peb. 26, 2016], ChurchofJesusChrist.org)

Dapita ang mga estudyante sa pagribyu kon unsa ang ilang gisulat agi og tubag ngadto sa mga pangutana sa kataposan sa seksiyon 2 sa materyal sa pagpangandam. (Kon gikinahanglan, hatagi ang mga estudyante og panahon sa pagrekord o pagdugang sa ilang mga tubag.) Dapita ang pipila ka mga estudyante sa pagpakigbahin sa unsay ilang gisulat. Hunahunaa ang pagpakigbahin usab sa imong mga pagbati.

Sa pagtabang sa mga estudyante sa paglihok sa unsay ilang nakat-onan karong adlawa, pagpili og usa o duha sa mosunod nga mga ideya––bisan hain mahimong labing makatabang alang sa imong mga estudyante.

Hangyoa ang usa ka estudyante sa pagbasa og kusog sa pamahayag ni Elder Robert D. Hales sa seksiyon 3 sa materyal sa pagpangandam.

• Sa unsang mga paagi kamo makakita ni Satanas nga nagtrabaho sa pag-atake sa mga kaminyoon ug mga pamilya sa atong panahon?

Dapita ang mga estudyante sa paggahin og usa ka minuto o duha sa paghunahuna og mga paagi nga si Satanas tingali naninguha sa pag-atake sa ilang kaugalingong mga kaminyoon ug mga pamilya (sa karon ug sa umaabot). Awhaga sila sa pagpamalandong usab ug sa pagrekord sa ilang mga pagbati mahitungod kon unsaon ang pagbaton og mahangturong panglantaw makatabang kanila sa pagprayoridad ug pagpanalipod sa ilang mga pamilya.

Hatagi ang mga estudyante og panahon sa pagpamalandong pa sa mosunod nga mga pangutana gikan sa seksiyon 3 sa materyal sa pagpangandam ug sa pagrekord og mga panghunahuna nga ilang madawat:

• Unsaon ninyo paghimo sa inyong pamilya nga mas importante sa inyong kinabuhi?

• Unsaon ninyo pagdapit sa gahom sa Ginoo nganha sa inyong mga paninguha sa pagmugna o paglig-on sa inyong kaugalingong mahangtoron nga pamilya?

Human sa igong panahon, dapita ang pipila ka mga estudyante kinsa andam sa pagpakigbahin sa pagbuhat sa mao. Awhaga ang mga estudyante sa pagbuhat sa unsay ilang gibati.

Alang sa Sunod nga Higayon

Hunahunaa ang pagrebyo sa daklit uban sa mga estudyante unsay ilang nakat-onan sa unang upat ka mga leksiyon sa kurso. Mahimo kang mosugyot nga sa sunod nga panahon nga kamo mag-abot, mohatag ka kanila og higayon sa pagpakigbahin unsay ilang kanunay nga gigamit nga maayo uban sa ilang pamilya o sa uban. Dapita ang mga estudyante samtang sila nag-andam alang sa sunod nga klase nga maghunahuna sa mabinantayong paagi mahitungod kon unsaon sa mga pagpili nga ilang himoon sa ilang kaugalingong pisikal nga mga lawas mahimong makaapekto sa ilang mga pamilya ug sa plano sa Dios alang kanila.