Leksiyon 7 Materyal sa Magtutudllo

Ang Mahangtoron nga Kinaiyahan ug Katuyoan sa Pagkalalaki ug Pagkababaye [Gender]

Ang atong pagkalalaki ug pagkababaye [gender] naestablisar sa atong premortal nga kinabuhi ug importante sa pagtuman sa plano sa atong Langitnong Amahan alang sa atong kaluwasan ug kahimayaan sa mga pamilya. Niini nga leksiyon, ang mga estudyante adunay oportunidad sa pagpasabot sa unsa nga paagi nga ang plano sa Dios makatabang nato nga makasabot sa mahangtoron nga kaimportante sa atong pagkalalaki ug pagkababaye [gender]. Kini nga leksiyon makahatag usab og giya alang sa mga estudyante nga tingali adunay mga pangutana kalabot sa pagkalalaki ug pagkababaye [gender].

Mga Sugyot alang sa Pagtudlo

Ang pagkalalaki ug pagkababaye [gender] usa ka importante nga kinaiya sa indibidwal nga pagkatawo ug katuyoan.

Pahinumdom: Mahimo nimong isulti uban sa mga estudyante ang pagkasensitibo niini ug sa ubang mga hilisgotan niini nga kurso ug pahinumdoman ang mga estudyante nga moapil sa mga panaghisgotan sa klase uban ang Kristohanon nga gugma, kasensitibo, ug pagsabot. Pagmatngon nga dili mogamit og doktrina sa paagi nga modapit sa espiritu sa pag-akusar ug panghimaraot. Hinoon, sunda ang ehemplo sa Manluluwas samtang ikaw magtudlo sa paagi nga makahatag og pagsabot, paglaom, ug pagkaayo.

Dapita ang mga estudyante sa paghanduraw nga sila ang magtutudlo sa usa ka Sunday School alang sa klase sa mga 14 anyos kinsa adunay mga pangutana mahitungod sa pagkalalaki ug pagkababaye [gender]. Ang usa ka estudyante nangutana, “Ngano nga importante man ang pagkalalaki ug pagkababaye [gender]?”

Dapita ang mga estudyante sa pagrebyo sa seksiyon 1 sa materyal sa pagpangandam nga magpares o sa gagmay nga mga grupo ug sa pagkonsiderar unsaon nila sa pagtubag niini nga pangutana base sa mga pagtulon-an sa Simbahan. Human makahatag og panahon alang sa panaghisgotan, dapita ang pipila ka estudyante sa pagpakigbahin unsaon nila sa pagtubag.

Samtang mopaambit ang mga estudyante sa ilang mga tubag, mahimo nimong rebyohon pagdungan ang Genesis 1:26–27, ang parapo sa “Ang Pamilya: Usa ka Pamahayag ngadto sa Kalib[o]tan” (ChurchofJesusChrist.org), ug ang ikaduhang pamahayag ni Elder David A. Bednar nga makita sa seksiyon 1 sa materyal sa pagpangandam. Mahimo nimong tabangan dayon ang mga estudyante nga mangita sa mga kamatuoran sama sa mosunod: Ang pagkalalaki ug pagkababaye [gender] usa ka mahinungdanon nga kinaiya sa tagsa-tagsa sa kinabuhi sa wala pa dinhi sa yuta, sa pagkamortal, ug sa walay katap[o]san nga pag-ila ug katuyoan. Sa balaanong plano, ang lalaki ug babaye gituyo nga mahimong katimbang, mokompleto, ug mohingpit sa usag usa. (Pahinumdomi ang mga estudyante nga “ang gipasabot nga kahulogan sa pagkalalaki o pagkababaye [gender] diha sa pamahayag sa pamilya mao ang biyolohikanhong sekso nga natawhan” [Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 38.6.23]. Kining sama nga kahulogan sa pagkalalaki ug pagkababaye [gender] gisugyot sa kinatibuk-an niining materyal sa magtutudlo gawas kon gisulti.)

Pagpalambo sa Atong Pagtudlo ug Pagkat-on

Tabangi ang mga estudyante nga makasabot sa doktrina ug mga baroganan. Samtang ang mga estudyante mas lawom nga makasabot sa doktrina ug mga baroganan, sila mas makahuloganon nga makagamit niini. Human maila ang mga baroganan ug doktrina, tabangi ang mga estudyante nga makakita niini gikan usa ka mahangtoron nga panglantaw. Pangutana nga makagiya sa mga estudyante ngadto sa mas klaro nga pagsabot sa mga katuyoan sa Langitnong Amahan nga naglibot nga doktrina. Awhaga ang mga estudyante sa paghunahuna ug sa pagpasabot sa unsa nga paagi kini nga mga kamatuoran magamit sa ilang mga kinabuhi karon.

Mahimo nimong gamiton ang pipila sa mosunod nga mga pangutana o mga kalihokan aron matabangan ang mga estudyante nga mapalawman ang ilang pagsabot sa mga kamatuoran nga ilang nakit-an:

• Sa unsa nga paagi nga ang plano sa kaluwasan makatabang nimo nga makasabot nga ang “pagkalalaki ug pagkababaye [gender] usa ka mahinungdanon nga kinaiya sa tagsa-tagsa sa kinabuhi sa wala pa dinhi sa yuta, sa pagkamortal, ug sa walay katap[o]san nga pag-ila ug katuyoan”? (“Ang Pamilya: Usa ka Pamahayag ngadto sa Kalib[o]tan”).

• Sa unsa nga mga paagi nga ang lalaki ug babaye nga mga espiritu nagkompleto ug naghingpit sa usag usa? (Tan-awa ang mga pamahayag ni Elder David A. Bednar ug Elder Dale G. ug Sister Ruth L. Renlund diha sa seksiyon 1 sa materyal sa pagpangandam.) Unsa nga mga ehemplo ang imong nakita sa katugbang nga mga kapasidad sa mga lalaki ug sa mga babaye sa pagtuman sa plano sa atong Langitnong Amahan?

• Dapita ang mga estudyante sa paglista sa pipila ka naandan nga mga kinaiya [stereotypes] sa tradisyon ug kultura nga alang sa mga lalaki o sa mga babaye. Hain niini ang dili alang sa atong mahangtoron nga pagkatawo ug katuyoan diha sa plano sa Dios? Unsa nga mga elemento sa atong gender isip lalaki o babaye ang importante sa atong mahangtoron nga pagkatawo ug katuyoan?

Ikonsiderar ang pagpaambit kon sa unsa nga paagi ang imong kinabuhi napanalanginan pinaagi sa pagbaton og mahangtoron nga panglantaw sa pagkalalaki ug pagkababaye [gender] ug sa unsa nga paagi kana nga panglantaw nakaapekto sa imong pagkatawo ug katuyoan.

Ang Ginoo makagiya ug makasuporta niadtong kinsa adunay mga pagbati sa kalainan sa gender [gender incongruence] o adunay laing mga pangutana kalabot sa pagkalalaki ug pagkababaye [gender].

Pahinumdomi ang mga estudyante nga ang seksiyon 2 ug 3 sa materyal sa pagpangandam mitubag sa mga sirkumstansiya diin ang mga indibidwal adunay mga pagbati sa kalainan tali sa ilang biyolohikanhong sekso ug sa pag-ila sa ilang matang sa gender [gender identity], nga magpaila nga usa ka transgender, o tingali adunay laing mga pangutana kalabot sa pagkalalaki ug pagkababaye [gender].

• Unsa nga piho nga mga pagtulon-an gikan sa mga seksiyon 2 ug 3 sa materyal sa pagpangandam ang labing makahuloganon kaninyo? (Kon gikinahanglan, hatagi ang mga estudyante og panahon sa pagrebyo sa seksiyon 2 ug 3 sa materyal sa pagpangandam.)

• Sa unsa nga paagi nga kita mas mahunahunaon ug sensitibo kon maghisgot og pagkalalaki ug pagkababaye [gender] ngadto sa uban ug kon mokonsiderar sa komplikado nga mga reyalidad sa uban nga atong nailhan o makontak?

Pahinumdomi ang mga estudyante nga ang Simbahan mihatag og mga kapanguhaan sa pagsuporta sa mga indibidwal kinsa nakasinati og mga pagbati sa kalainan sa gender [gender incongruence] diha sa “Transgender” nga seksiyon sa ChurchofJesusChrist.org.

Isip usa ka paagi aron matabangan ang mga estudyante nga mogamit sa mga baroganan nga gitudlo niini nga leksiyon, mahimo nimong basahon ug hisgotan ang mosunod nga senaryo isip usa ka klase (ipahaom ang sitwasyon kon angay aron labing makatubag sa mga panginahanglan sa imong mga estudyante):

Si Alexandra kanunay mobati nga dili komportable atol sa mga panagsultihanay mahitungod kon unsay gikonsiderar sa mga tawo nga tradisyonal nga mga kinaiya sa mga lalaki ug mga babaye. Wala niya batia nga siya adunay daghan nga mga hiyas nga gikonsiderar nga binabaye. Siya usab adunay daghan nga personal nga mga interes nga mas habig sa mga interes sa pipila sa mga lalaki nga iyang nailhan. Kon ang mga panagsultihanay bahin sa pagkalalaki ug pagkababaye [gender] mahisgotan diha sa simbahan, siya naghunahuna kon siya ba gayod mobagay uban sa laing mga babaye. Siya nagtuo ni Jesukristo ug misalig sa gahom sa Iyang Pag-ula, apan siya wala makasiguro unsaon Niya pagtabang kaniya. Sa kataposan, si Alexandra gusto gayod nga masayod kon ang iyang kinaiya makapahimo niya sa pagtuman sa iyang balaan nga potensyal isip usa ka anak nga babaye sa Dios.

Mahimo usab ikaw nga mangutana sama sa mosunod aron matabangan ang mga estudyante nga maghisgot sa senaryo:

• Kon si Alexandra mangayo og panabang ninyo, unsay inyong itambag nga iyang buhaton aron makaangkon og mas klaro nga pagsabot sa iyang mahangtoron nga pagkatawo ug katuyoan?

• Unsa ang inyong mapaambit ni Alexandra mahitungod kon sa unsa nga paagi nga ang plano sa Dios nakatabang kaninyo nga makasabot sa inyong mahangtoron nga pagkatawo ug katuyoan isip usa ka lalaki o babaye?

• Sa unsa nga paagi nga si Alexandra mahimong kusog diha sa Simbahan sa Ginoo?

Tingali makatabang sa pagtapos sa inyong panaghisgotan mahitungod ni Alexandra pinaagi sa paghatag og gibug-aton nga kadtong kinsa adunay mga pangutana mahitungod sa ilang pagkalalaki ug pagkababaye [gender] o kinsa nakasinati og mga pagbati sa kalainan sa gender [gender incongruence] makatagamtam sa tanang mga panalangin sa kahangtoran ug pagkamiyembro diha sa Simbahan sa Manluluwas kon sila motuman sa ilang mga pakigsaad ug maglikay gikan sa pagpausab sa ilang gender. Mahimo nimong rebyohon uban sa mga estudyante ang pasidaan ni Presidente Oaks diha sa seksiyon 3 mahitungod sa pagbutang og label sa atong kaugalingon diha sa publiko sa mga paagi nga makahatag og limitasyon sa atong abilidad sa pagkab-ot sa atong mahangtoron nga mga tumong.

Sa pagtapos sa leksiyon, dapita ang mga estudyante sa pagrekord unsay ilang buhaton sa pagpakita og gugma, kapuangod, ug pagkahisakop ni bisan kinsa nga adunay mga pagbati nga nalahi tali sa ilang biyolohikanhon nga sekso ug sa matang sa ilang gender [gender identity], kinsa nagpaila isip transgender, o kinsa adunay laing mga pangutana kalabot sa pagkalalaki ug pagkababaye [gender].

Mahimo nimong ipaambit ang imong pagpamatuod nga bisan og kita wala makasabot sa tanan mahitungod sa kalainan sa gender [gender incongruence] o sa ubang mga hilisgotan kalabot sa pagkalalaki ug pagkababaye [gender], ang Manluluwas nakasabot. Siya makagiya ug makasuporta niadtong kinsa moduol ngadto Kaniya.

Alang sa Sunod nga Higayon

Awhaga ang mga estudyante sa pagbasa ug pagkonsiderar pag-ayo sa materyal sa pagpangandam diha sa sunod nga leksiyon bahin sa pagkaibog sa managsama og sekso. Mahimo nimong dapiton ang mga estudyante sa pagpangita og mga paagi aron mas makasabot sa pagkaibog sa managsama og sekso ug sa pagkonsiderar unsaon nila sa paghisgot niini uban ang pagtahod ug pagkasensitibo.