Leksiyon 21 Materyal sa Magtutudlo

Pag-amuma sa mga Anak diha sa Gugma

“Ang mga ginikanan adunay sagrado nga katungdanan sa pag-amuma sa ilang mga anak sa paghigugma ug pagkamatar[o]ng” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Niini nga leksiyon ang mga estudyante maghisgot og mga kamatuoran nga makatabang nila nga matuman ang ilang sagrado nga katungdanan isip mga ginikanan sa paghigugma sa ilang mga anak. (Ang sunod nga leksiyon magpokus bahin sa pag-amuma sa mga anak diha sa pagkamatarong.) Ang mga estudyante dapiton usab sa pagtino kon sa unsang paagi nga sila makahimo sa paghigugma ug pagserbisyo sa ilang mga pamilya sa mas Kristohanon nga paagi.

Mga Sugyot alang sa Pagtudlo

Ang mga ginikanan kinahanglang moamuma sa ilang mga anak diha sa gugma.

Ikonsiderar ang pagsugod sa klase pinaagi sa pagpangutana sa mga estudyante kon unsa ang mga butang nga ilang nakita nga gibuhat sa ilang mga ginikanan o sa ubang mga ginikanan nga ila usab nga buhaton kon mag-amuma na unya sila sa ilang kaugalingong mga anak. Human sa pagpaambit sa pipila ka estudyante, awhaga ang klase sa pagpangita sa mga kamatuoran niini nga leksiyon ug sa sunod nga leksiyon nga mahimo nilang sundon kon mahimo na silang mga ginikanan.

Ipakita ang mosunod nga pamahayag gikan sa pamahayag bahin sa pamilya: Ang mga ginikanan adunay sagrado nga katungdanan sa pag-amuma sa ilang mga anak sa paghigugma.

Mahimo nimong ipangutana ang mosunod nga mga pangutana aron matabangan ang mga estudyante nga mapalawman ang ilang pagsabot niini nga kamatuoran:

• Unsa ang pipila ka paagi nga imong mapakita ang imong gugma alang sa imong mga anak? (Ikonsiderar ang pagrebyo sa mga pamahayag mahitungod sa panahon ug maayo nga mga kalihokan sa paglingaw-lingaw gikan sa mga lider sa Simbahan diha sa seksiyon 1 sa materyal sa pagpangandam.)

• Sa unsang paagi nga napanalangingan ka pinaagi sa paggahin og panahon, pagtrabaho, ug pag-apil sa maayo nga mga kalihokan sa paglingaw-lingaw uban sa imong mga ginikanan?

Ipasabot nga ang pag-amuma sa mga anak diha sa gugma naglakip sa tukma nga pagdisiplina nila kon gikinahanglan. Bahina ang klase ngadto sa ginagmay nga mga grupo, ug pagtudlo og usa ka lider alang sa matag grupo. Hatagi ang mga lider sa grupo og mga kopya sa mosunod nga handout, ug tudloi sila sa pagsunod sa direksiyon nga gihatag. (Mahimo nimong ipahiangay ang mga sitwasyon nga mahimo kining mas mohaom ngadto sa imong mga estudyante.)

Pagdisiplina sa mga Anak diha sa Pamaagi sa Ginoo

Materyal sa Magtutudlo sa Ang Mahangtoron nga Pamilya—Leksiyon 21

Dapita ang mga sakop sa grupo sa paghunahuna nga mga ginikanan sila. Hangyoa sila sa pagpili og usa sa mosunod nga mga sitwasyon nga hisgotan og dungan:

1. Sa imong pag-abot sa balay gikan nag-grocery uban sa imong mga anak, nakit-an nimo ang imong sais anyos nga anak nga babaye nga nagkaon og kendi nga iyang kinawat gikan sa tindahan.

2. Ang imong 14 anyos nga anak nga lalaki kanunayng modaugdaog sa iyang 9 anyos nga manghod nga lalaki. Kanunay kini nga mahitabo kon wala ka. Ang anak nga gidaugdaog miduol nimo nga naghilak ug misumbong nimo nga ang iyang igsoon misulti na usab niya og bati nga mga butang.

3. Naghulat ka sa imong 17 anyos nga anak nga babaye nga mopauli gikan nga nagkuyog sa iyang mga higala. Sa dihang miabot na siya, lapas na kini sa iyang curfew.

Hangyoa ang imong grupo nga hisgotan ang mosunod nga mga pangutana samtang ipasabot nila ang sitwasyon nga ilang gipili:

• Sa unsang paagi nga ang imong nakat-onan gikan sa seksiyon 2 sa materyal sa pagpangandam makagiya nimo sa pagdisiplina sa imong mga anak? (Kon kinahanglanon, dapita ang mga sakop sa imong grupo nga rebyohon og kadali ang seksiyon 2.)

• Unsa kaha ang mahitabo sa imong pagpakigsultihanay sa imong anak? Unsa kaha ang mga sangpotanan nga imong ihatag alang sa binuhatan sa imong anak?

• Sa unsang paagi nga ang tukma nga pagdisiplina sa anak usa ka buhat sa gugma? (Tan-awa sa Doktrina ug mga Pakigsaad 95:1.)

© 2022 pinaagi sa Intellectual Reserve, Inc. All rights reserved.

Pagdisiplina sa mga Anak diha sa Pamaagi sa Ginoo

handout sa magtutudlo

Kon mahuman na ang mga estudyante sa kalihokan, dapita ang pipila sa pagpaambit sa unsay ilang gihisgotan diha sa ilang mga grupo. Isip kabahin sa hisgotanan, ipasabot og maayo ang mosunod nga kamatuoran: Aron makasunod sa balaanong sumbanan sa pagkadisipulo, kita kinahanglan gayod nga nadasig pinaagi sa gugma (tan-awa sa pamahayag ni Elder D. Todd Christofferson diha sa seksiyon 2 sa materyal sa pagpangandam).

Kon gikinahanglan, pangutan-a ang klase kon sa unsang paagi nga ang pamaagi sa Ginoo sa pagdisiplina mahimong lahi kay sa pagdisiplina sa mga anak nga naandan na sa pipila ka kultura o mga pamilya.

• Kanus-a ka nakakita og usa ka tawo nga midisiplina og usa ka anak sa mahigugmaong paagi? Unsay nakat-onan nimo gikan niana nga kasinatian?

Pagpalambo sa Pagtudlo ug Pagkat-on

Dapita ang mga estudyante sa pagpamalandong. Ang pagpamalandong nagpasabot sa paghunahuna og maayo mahitungod sa usa ka butang. Mahimo kining mapalambo pinaagi sa pag-ampo. Samtang ang mga estudyante makakat-on sa pagpamalandong, ang Espiritu sa kasagaran mopadayag og kamatuoran ngadto nila ug motudlo nila kon unsay kinahanglan nilang makat-onan ug mabatyagan.

Ipakita ang mosunod nga mga instruksiyon ug mga pangutana, ug hatagi ang mga estudyante og pipila ka minuto sa pagpamalandong niini (mahimo usab nilang irekord ang pipila sa ilang mga hunahuna):

• Paghunahuna og mga higayon nga gikorihian ka sa Ginoo o ang Espiritu Santo miaghat nimo nga mag-usab sa ubang paagi. Unsay imong makat-onan mahitungod sa pagdisiplina sa mga anak gikan niana nga mga kasinatian? Kanus-a nga imong mahinumdoman nga ang Langitnong Amahan mipahayag sa Iyang gugma alang nimo sa higayon nga ikaw nagkinahanglan niini?

Dapita ang pipila ka estudyante sa pagpaambit sa ilang mga hunahuna diha sa klase.

Ang mga ginikanan kinahanglan nga motudlo sa ilang mga anak sa paghigugma ug pagserbisyo sa usag usa.

Dapita ang usa ka estudyante sa pagbasa og kusog sa Mosiah 4:14–15.

• Unsa ang sagrado nga mga katungdanan nga gipasabot og maayo ni Hari Benjamin? (Human sa pagtubag sa mga estudyante, ipakita ang mosunod nga pamahayag gikan sa pamahayag bahin sa pamilya: Ang mga ginikanan adunay sagrado nga katungdanan sa pagtudlo sa ilang mga anak sa paghigugma ug pag-alagad sa usag usa.)

• Giunsa ka pagtudlo sa imong mga ginikanan sa paghigugma ug pagserbisyo sa imong mga igsoon o sa uban pang mga sakop sa pamilya?

Pahinumdomi ang mga estudyante nga gidapit sila sa paghunahuna og higayon nga ang Manluluwas mahigugmaong miserbisyo sa usa ka tawo ug dayon isulat kon unsaon nila sa paghigugma ug pagserbisyo sa usa ka sakop sa pamilya niini o sa laing Kristohanon nga paagi (tan-awa sa seksiyon 3 sa materyal sa pagpangandam). Dapita ang pipila ka estudyante sa pagpaambit sa unsay ilang gisulat. (Ikonsiderar usab ang pagpaambit sa imong kaugalingong kasinatian.)

Ipakita ang mosunod nga mga pangutana, ug dapita ang mga estudyante nga irekord ang ilang mga hunahuna kalabot sa pangutana nga sa ilang pamati mas may kalabotan ngadto nila:

• Unsaon nimo pagsunod ang ehemplo ug mga pagtulon-an sa Langitnong Amahan sa pag-amuma sa imong mga anak karon o sa umaabot diha sa gugma?

• Unsa ang usa ka Kristohanon nga paagi nga imong mahimo sa paghigugma ug pagserbisyo sa igsoon, imong mga ginikanan, o laing sakop sa pamilya niining semanaha?

Ikonsiderar ang pagtapos sa klase pinaagi sa pagdapit sa usa ka estudyante sa pagpaambit sa iyang pagpamatuod bahin sa kaimportante sa paghigugma sa mga sakop sa pamilya o pinaagi sa pagpaambit sa imong pagpamatuod bahin niining baroganan sa ebanghelyo. Pahinumdomi ang mga estudyante nga bisan pa man kon sa unsang paagi sila gipadako, makapili sila sa pag-amuma sa ilang mga anak diha sa gugma ug makatudlo nila sa paghigugma ug pagserbisyo sa usag usa.

Alang sa Sunod nga Higayon

Mahimo nimong pangutan-on ang mga estudyante inig human sa klase o pinaagi sa mensahe human niana sa mosunod nga mga pangutana nga ikonsiderar samtang mag-andam sila alang sa sunod nga klase:

• Unsa nga espirituhanong mga kasinatian ang natabang sa imong mga ginikanan nga imong nasinati samtang nagdako? Unsa nga espirituhanong mga kasinatian ang gilaoman nimo nga masinati sa imong mga anak sa umaabot?