Leksiyon 16 Materyal sa Magtutudlo

Pagbaton og Kalipay sa Kinabuhi sa Pamilya pinaagi ni Jesukristo

“Ang kalipay sa kinabuhi sa pamilya mahimong maangkon kon gitukod diha sa mga pagtulon-an ni Ginoong Jesukristo” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Niini nga leksiyon, ang mga estudyante mosusi kon unsaon nga sila makatukod og pundasyon sa ilang personal nga kinabuhi ug pamilya diha kang Jesukristo ug sa Iyang mga pagtulon-an. Sila dapiton sa pagtino og mga babag nga tingali makapugong nila sa paghimo niini ug mga paagi sa pagbuntog niini.

Mga Sugyot alang sa Pagtudlo

Ang pagtukod sa atong personal nga kinabuhi ug pamilya diha sa pundasyon ni Jesukristo mopanalipod ug mopalig-on kanato.

Ikonsiderar ang pagpakita sa nag-uban nga hulagway sa Philadelphia Pennsylvania Temple. Pahinumdomi ang mga estudyante sa katuyoan sa pundasyon sa gambalay (tan-awa sa seksiyon 1 sa materyal sa pagpangandam).

Philadelphia Pennsylvania Temple

Basaha og dungan ang mosunod nga pamahayag ni Elder Donald L. Hallstrom, diin iyang gihulagway ang mga paningkamot nga gihimo sa mga inhenyero aron makatukod og lig-ong pundasyon alang sa Philadelphia Pennsylvania Temple.

Elder Donald L. Hallstrom

Kini nga istruktura mahimong … anaa ubos sa makagun-ob nga kahanginan ug makaguba nga tubig sa ilawom sa yuta. Kining delikado nga mga kahimtang, kon dili masusi, mahimong makadaot ug gani makahugno niining maanindot nga edipisyo.

Nahibalo nga kining mga pwersa dili kapugngan nga moataki sa templo, ang mga inhenyero midesinyo, ug ang mga kontraktor mikubkob, og lungag nga 32 ka pye (10 m) ang gilawmon ubos sa tibuok nga tiilan sa istruktura. Ang lungag gibutangan og karaang granite sa Pennsylvania aron makahatag og dili matarog nga pundasyon sa pagatukoron niini. Ang konkreto nga mga footing ug mga pundasyon ipatapot dayon ngadto sa gihanig nga granite gamit ang mga pang-angkla sa bato aron makasugakod bisan sa grabe nga hangin ug kusog nga tubig sa ilawom sa yuta. Ang mga angkla gibarinahan og 50 ngadto sa 175 ka pye (15 ngadto sa 53 m) ngadto sa granite. …

Mihatag ko og ingon ka detalyado nga impormasyon aron motudlo niini nga punto: dili sama sa istruktura sa gambalay (nga temporaryo), sa pagtukod sa atong walay kataposan (ug, manghinaot kami, mahangtoron) nga mga kinabuhi, usahay mohatag kita og gamay ra gayod nga pagtagad sa paghan-ay ug pagtukod sa atong mga pundasyon. Mao nga, kita makit-an dayon, ug daling maigo, sa makadaot nga mga pwersa. (“Jesus Christ: Our Firm Foundation,” Ensign, Abr. 2016, 58)

Dapita ang mga estudyante sa paghunahuna niini nga deskripsyon sa pundasyon sa templo samtang inyong rebyohon og dungan ang Helaman 5:12.

• Unsay gitudlo niini nga bersikulo mahitungod kon ngano nga ang mga indibidwal ug mga pamilya kinahanglang motukod og espirituhanong pundasyon diha kang Jesukristo? (Tabangi ang mga estudyante sa pagtino og baroganan sama sa mosunod: Kon ang mga indibidwal ug mga pamilya motukod sa ilang pundasyon diha kang Jesukristo, si Satanas walay gahom sa paglaglag nila.)

• Unsa ang pipila sa komon nga “mapintas nga mga hangin, … mga pana diha sa mga alimpulos, … ulan nga yelo ug … mapintas nga [mga] unos” nga gidala sa kaaway batok sa mga pamilya sa atong panahon karon?

• Unsa ang pipila ka paagi nga ang mga indibidwal ug mga pamilya makatukod sa ilang pundasyon diha kang Jesukristo? (Isip kabahin sa panaghisgotan, ikonsiderar ang pagdapit sa mga estudyante sa pagpaambit sa unsay ilang nakat-onan gikan sa mga pamahayag ni Elder David A. Bednar ug Elder Hallstrom, ingon man sa kalihokan nga “Irekord ang Imong mga Hunahuna” diha sa seksiyon 1 sa materyal sa pagpangandam.)

• Unsa nga mga kasinatian nga nasinati nimo ug sa imong pamilya diin ang pagtukod og pundasyon diha kang Jesukristo nakatabang sa pagsugakod ug pagbuntog sa lainlaing matang sa mga unos?

Ang pagsunod sa mga pagtulon-an ni Jesukristo naghatag og kalipay sa kinabuhi sa pamilya.

Ipakita ang mosunod nga pamahayag gikan sa pamahayag bahin sa pamilya: “Ang kalipay sa kinabuhi sa pamilya mahimong maangkon kon gitukod diha sa mga pagtulon-an ni Ginoong Jesukristo” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org).

Pagpalambo sa Atong Pagtudlo ug Pagkat-on

I-awhag ang pagpaapil sa estudyante. Pangita og mga paagi sa pag-awhag sa tanan nga mga estudyante nga moapil diha sa klase. Matag estudyante adunay talagsaong kaagi, mga interes, mga gilaoman, ug mga hagit nga makadugang sa iyang mga ideya ug mga pangutana. Ang managlahi nga mga panglantaw makapanalangin sa uban diha sa klase sa personal nga mga paagi. Ang pagpaminaw og maayo samtang ang mga estudyante moapil makatabang nimo sa pagsusi sa ilang mga panginahanglan ug mga kabalaka.

Dapita ang mga estudyante sa pagpakli sa tudling sa kasulatan nga ilang makit-an nga naglangkob og pagtulon-an ni Jesukristo nga nakahatag nila og kalipay diha sa ilang personal nga kinabuhi o pamilya samtang sila migamit niini. (Tan-awa sa seksiyon 2 sa materyal sa pagpangandam. Mahimo nimong hatagan ang mga estudyante og pipila ka minuto sa pagtino og usa ka tudling.)

Bahina ang klase ngadto sa gagmay nga mga grupo. Dapita ang mga estudyante sa pagpaambit sa ilang mga tudling sa kasulatan, uban sa ilang mga tubag ngadto sa mosunod nga pangutana (mahimo nimong ipakita o isulat ang pangutana diha sa pisara):

• Sa unsang paagi nga ang pagsunod niini nga pagtulon-an sa ebanghelyo makapanalangin sa usa ka indibidwal, kaminyoon, o pamilya?

Human sa igong panahon, ikonsiderar ang pagdapit sa pipila ka estudyante sa pagpaambit diha sa klase sa unsay ilang nakat-onan sa ilang panaghisgot diha sa grupo.

Dapita ang mga estudyante nga hilom nga morebyo sa 4 Nephi 1:1, 11–13, 15–18, nga mangita og mga pulong o mga hugpong sa mga pulong nga nagpakita sa mga pagtulon-an sa Manluluwas nga gipili niining mga tawo nga sundon. Dapita ang mga estudyante sa pagpaambit sa unsay ilang nakit-an.

• Unsa nga mga panalangin ang madawat sa pamilya samtang sila magkaubang maningkamot sa pagsunod sa mga pagtulon-an sa Manluluwas? Asa nimo nakita ang mga pananglitan niini nga mga matang sa mga panalangin?

• Unsa ang pipila sa mga paagi nga ang kaaway mosulay sa pagpugong kanato gikan sa pagdawat niini nga mga panalangin? (Kon gikinahanglan, dapita ang mga estudyante sa pagrebyo sa mga pananglitan diha sa seksiyon 3 sa materyal sa pagpangandam.)

Ipakita ang mosunod nga pamahayag ni Elder Bradley D. Foster, kinsa kanhi nagserbisyo isip usa ka sakop sa Seventy:

Elder Bradley D. Foster

Ang pagkalinga dili kinahanglan nga da[o]tan aron molamp[o]s. (“Si Mama Misulti Kanako,” Liahona, Mayo 2010, 99)

• Unsa ang pipila sa mga makabalda nga tingali dili gayod kaayo daotan apan makapugong nato sa lig-ong pagkatukod diha kang Jesukristo ug sa Iyang mga pagtulon-an? Unsa ang imong nahimo aron maminosan o mawagtang ang usa o daghan pa niini nga mga makabalda sa imong kinabuhi?

• Unsa nga mga panalangin ang mawala sa mga tawo kon ang ilang pundasyon natukod diha sa butang sama sa tradisyon sa kultura, paglingawlingaw, o kuwarta?

Ikonsiderar ang mga paagi nga makatabang ka sa mga estudyante nga makahuloganong molihok sa unsay ilang nakat-onan niini nga leksiyon. Pananglitan, mahimo nimong hatagan ang mga estudyante og pipila ka minuto sa pagrebyo sa pamahayag ni Elder Gary E. Stevenson ug sa kalihokan sa “Molihok” sa seksiyon 3 sa materyal sa pagpangandam. Dayon dapita ang mga estudyante sa pagsulat og bisan unsang dugang pa nga mga hunahuna nga gusto nilang isulat nga may kalabotan sa ilang tumong o plano.

Mahimo nimong taposon pinaagi sa pagpaambit sa imong pagpamatuod bahin sa kalipay nga imong nasinati sa imong personal nga kinabuhi ug pamilya samtang nagtukod ka sa imong pundasyon diha kang Jesukristo ug sa Iyang mga pagtulon-an.

Alang sa Sunod nga Higayon

Dapita ang mga estudyante sa pagkonsiderar kon kanus-a sila nakakita og bana ug asawa nga nagtinabangay isip magkatugbang nga kauban. Mahimo usab silang maghunahuna og mga higayon nga sila nakasaksi og mga magtiayon nga wala magtinabangay isip magkatugbang nga kauban tungod sa pipila ka hinungdan. Awhaga ang mga estudyante sa pagtuon sa materyal alang sa sunod nga leksiyon nga maghunahuna niini nga mga pananglitan ug sa pagtino kon unsa nga matang sa panag-uban ang gusto nilang maangkon sa ilang kaugalingong kaminyoon.