Leksiyon 9 Materyal sa Magtutudlo

Paghiusa sa mga Pamilya alang sa Kahangtoran

Ang pagdawat og mga ordinansa sa templo alang sa atong mga kaugalingon ug alang sa atong namatay nga mga katigulangan naghatag kanato og gahom ug nagtabang kanato sa pagtukod sa atong kaugalingon nga mahangtorong pamilya. Ang family history ug templo nga serbisyo mahinungdanon usab sa pagtabang sa atong Langitnong Amahan sa paghiusa sa Iyang pamilya. Agi og resulta niini nga leksiyon, ang mga estudyante makahimo sa pagpasabot sa pipila ka mga panalangin nga atong madawat pinaagi sa templo ug family history nga serbisyo. Ang mga estudyante dapiton usab sa pagtino og mga paagi nga sila makasugod o makapadayon sa ilang mga paningkamot sa pagdiskobre sa ilang namatay nga mga katigulangan ug makapahigayon og mga ordinansa alang kanila diha sa templo.

Mga Sugyot alang sa Pagtudlo

Nagtinguha ang Langitnong Amahan sa paghatag og gahom ug kalig-on sa Iyang mga anak.

Hunahunaa ang pagsugod sa leksiyon pinaagi sa pagpakita sa mosunod nga pangutana ug sa pagdapit sa mga estudyante sa paglista sa ilang mga tubag diha sa pisara:

Isip mga young adult sa kalibotan karon, unsang espirituhanong gahom o mga panalangin ang inyong labing gikinahanglan ug ngano?

Dapita ang usa ka estudyante sa pagbasa og kusog ang ikatulong parapo sa pamahayag sa pamilya (tan-awa sa “Ang Pamilya: Usa ka Pamahayag ngadto sa Kalib[o]tan,”ChurchofJesusChrist.org). Hangyoa ang mga estudyante sa pagpasabot kon unsay ilang nahibaloan mahitungod sa tahas sa mga pakigsaad ug sa mga ordinansa diha sa plano sa Dios.

Hatagi ang mga estudyante og panahon sa pagrebyo sa mabinantayong paagi sa mga pamahayag ni Presidente Russell M. Nelson sa seksiyon 1 sa materyal sa pagpangandam. Dapita sila sa pagpakigbahin kon unsay ilang nakat-onan gikan ni Presidente Nelson mahitungod sa mga ordinansa sa pagkapari ug mga pakigsaad. Samtang ang mga estudyante nakigbahin, tabangi sila sa pag-ila sa mga kamatuoran sama sa mosunod: Ang pagdawat sa mga ordinansa ug mga pakigsaad makalig-on sa atong mga kaminyoon ug mga pamilya. Samtang kita nagdawat ug nagtahod sa mga ordinansa sa pagkapari ug sa mga pakigsaad, ang Dios nagpanalangin kanato uban sa Iyang gahom (tan-awa usab sa Doktrina ug mga Pakigsaad 109:22).

• Sa unsang mga paagi ang mga ordinansa sa pagkapari ug ang mga pakigsaad naghatag og gahom o naglig-on kaninyo ug sa inyong pamilya? (Ang mga estudyante gidapit sa pagpamalandong niini nga pangutana diha sa materyal sa pagpangandam.)

Mahimong magpamatuod kamo sa usa o sa daghan pa niini nga mga panalangin sa inyong kaugalingong kinabuhi ug sa pamilya. Awhaga ang mga estudyante sa pagpadayon ngadto sa pagdawat sa mga ordinansa sa templo kon sila wala pa makadawat niini ug sa pagtahod sa mga pakigsaad nga ilang gihimo.

Nagtinguha ang atong Langitnong Amahan sa kaluwasan alang sa Iyang tanang pamilya.

Hunahunaa ang pagbahin sa mga estudyante ngadto sa ginagmay nga mga grupo sa pagbuhat sa mosunod nga kalihokan. Hatagi ang matag grupo og kopya sa mosunod nga handout. (O ikaw makaandam og usa sama niini kon gusto nimo nga ipahiangay ang sitwasyon aron sa paghimo niini nga mas may kalabot ngadto sa mga kahimtang sa imong mga estudyante.) Dapita ang mga grupo sa pagsunod sa mga panudlo diha sa handout.

Ang Doktrina sa Katubsanan sa mga Patay

Materyal sa Magtutudlo sa Ang Mahangtorong Pamilya—Leksiyon 9

Basaha ang mosunod nga sitwasyon, ug hisgoti ang nag-uban nga mga pangutana isip usa ka grupo.

Usa ka higala kinsa sakop sa laing tinuohan bag-ohay mitambong sa open house sa templo. Didto, nadungog niya ang mga tawo nga naghisgot sa pagpahigayon sa mga ordinansa alang sa atong namatay nga mga katigulangan. Pila ka adlaw ang milabay, nangutana siya kaninyo, “Ngano nga ang inyong simbahan nagbuhat og mga seremonyas alang sa patay?”

• Unsaon ninyo pagtubag ang pangutana sa inyong higala? (Human ninyo mahisgotan kini nga pangutana, ang inyong grupo makarebyo sa pamahayag ni Presidente Joseph F. Smith sa seksiyon 1 sa materyal sa pagpangandam. Makahimo usab kamo sa pagrebyo og dungan sa 1 Mga Taga-Corinto 15:29.)

• Unsa ang ikatudlo kanato sa doktrina sa kaluwasan sa patay mahitungod sa kinaiya, mga tinguha, impluwensya sa Langitnong Amahan ug ni Jesukristo?

© 2022 pinaagi sa Intellectual Reserve, Inc. All rights reserved.

Ang Doktrina sa Katubsanan sa mga Patay

Human sa igong panahon, dapita ang usa o duha ka estudyante sa pagpakigbahin kon unsay ilang nakat-onan gikan sa ilang panaghisgot sa grupo.

Pagrebyo og dungan sa Doktrina ug mga Pakigsaad 128:15, ug hisgoti ang mosunod nga mga pangutana:

• Sumala niini nga mga bersikulo, nganong mahinungdanon kini alang kanato sa pagdawat sa mga ordinansa sa templo alang sa atong namatay nga mga katigulanagan? (Gamit ang mga pulong sa mga estudyante, pagsulat og usa ka kamatuoran sama sa mosunod diha sa pisara: Ang kaluwasan sa atong mga katigulangan gikinahanglan ug mahinungdanon sa atong kaugalingong kaluwasan ug kahingpitan.)

• Ngano kaha nga ang kaluwasan sa atong mga katigulangan mahinungdanon alang sa atong kaugalingong kaluwasan ug kahingpitan?

• Sa unsang paagi kita nahimong mas sama sa Manluluwas pinaagi sa pagdiskobre sa atong namatay nga mga katigulangan ug sa pagdawat sa mga ordinansa diha sa templo alang kanila? (Mahimo nimong dapiton ang mga estudyante sa pagrebyo sa pamahayag ni Presidente Gordon B. Hinckley diha sa seksiyon 2 sa materyal sa pagpangandam.)

Dapita ang mga estudyante sa pagpamalandong kon sa unsang paagi sila mibati ngadto sa Manluluwas alang sa Iyang mga paningkamot sa pagbuhat og usa ka butang alang kanila nga dili nila mahimo alang sa ilang mga kaugalingon. Dayon dapita sila sa paghunahuna kon sa unsang paagi kaha mibati ang atong namatay nga mga katigulangan sa dihang kita midawat sa makaluwas nga mga ordinansa alang kanila nga dili nila madawat sa ilang mga kaugalingon.

Ang Ginoo nagpanalangin niadtong kinsa nagbuhat sa templo ug family history nga serbisyo.

Pagpalambo sa Atong Pagtudlo ug Pagkat-on

Paghimo og mga pagdapit nga nag-awhag sa paggamit. Naglig-on ang mga estudyante sa ilang pagkat-on sa ebanghelyo kon ilang gamiton ang tinuod nga mga baroganan ug doktrinal nga mga kamatuoran. Ang paglihok diha sa hugot nga pagtuo nagtabang kanila nga mahimong makabig ngadto sa Manluluwas ug makadawat sa mga panalangin nga Iyang gisaad ngadto niadtong kinsa mga masulundon. Samtang ikaw nangandam sa pagtabang sa mga estudyante sa klase, hatagi og angay nga prayoridad ang mga pangutana ug mga kalihokan nga nag-awhag sa paggamit.

Hunahunaa ang pagdapit sa mga estudyante kinsa makahimo sa paggamit sa ilang mga elektronik nga mga himan sa pag-adto sa FamilySearch.org o sa Family Search Family Tree nga app. (Mahimo ka usab nga mopakita sa website o sa app alang sa klase o mosugyot nga ang mga estudyante nga walay himan makigbahin sa usa ka kauban sa klase kinsa aduna.) Pag-uban og suhid sa pipila ka mga bahin sa website o sa app. Hunahunaa hain sa mosunod nga mga pangutana mahimong makatabang sa paghisgot:

• Unsa ang inyong kasinatian sa pagbuhat og family history?

• Unsa ang nagpugong kaninyo o nakapugong kaninyo kaniadto sa pagbuhat og family history? Giunsa ninyo sa pagbuntog niini nga mga matang sa mga babag? Giunsa sa Ginoo pagtabang kaninyo sa inyong mga paningkamot?

• Kon kamo nakadawat sa inyong mga ordinansa sa templo alang sa inyong mga katigulangan, unsa nga mga pagbati kamo aduna niana nga panahon?

Hunahunaa ang paghangyo sa mga estudyante sa paglista sa pipila ka mga panalangin ang Ginoo ug ang Iyang mga lider sa Simbahan nagsaad ngadto niadtong kinsa nag-apil sa templo ug family history nga serbisyo.

Dapita ang mga estudyante sa pagpamalandong sa espirituhanong gahom o mga panalangin nga sila labing nagkinahanglan niini nga panahon (dapita sila sa pagrebyo sa lista diha sa pisara gikan sa sinugdanan sa leksiyon). Hangyoa ang mga estudyante sa pagpakigbahin o sa pagpamatuod kabahin sa dihang sila nagsinati niini nga mga matang sa mga panalangin samtang sila nag-apil sa templo ug sa family history nga serbisyo.

Hatagi ang mga estudyante og pipila ka minuto sa pagrekord kon unsaon nila sa paggamit ang unsay ilang nakat-onan niini nga leksiyon. Awhaga sila sa paghimo og usa ka tumong nga sa ilang hunahuna sila makatuman sa pag-apil kanunay sa templo ug sa family history nga serbisyo. Mahimo usab sila nga morekord sa mga panalangin nga ilang gilaomang madawat gikan sa pagbuhat sa mao.

Mubo nga sulat: Pangita og mga oportunidad samtang ikaw makigkita sa imong klase sa umaabot sa pagpangutana kon unsay nahimo na sa mga estudyante sa ilang templo ug family history nga mga tumong.

Alang sa Sunod nga Higayon

Sa kataposan sa klase o sulod sa semana, mahimo nimong dapiton ang mga estudyante sa pag interbyo og usa ka magtiayon kinsa nabugkos na sa templo. Dapita ang mga estudyante sa pagpangutana sa magtiayon kon sa unsang paagi ang ilang kaminyoon naapektohan sa mga pakigsaad nga ilang gihimo sa dihang sila gibugkos ug giunsa nila pag-uban sa pagpaninguha nga mas magpaduol ngadto sa Dios.