Leksiyon 20 Materyal sa Magtutudlo: Ang Sagrado nga mga Responsibilidad sa mga Amahan

“Leksiyon 20 Materyal sa Magtutudlo: Ang Sagrado nga mga Responsibilidad sa mga Amahan,” Materyal sa Magtutudlo sa Ang Mahangtoron nga Pamilya (2022)

“Leksiyon 20 Materyal sa Magtutudlo,” Materyal sa Magtutudlo sa Ang Mahangtoron nga Pamilya

Leksiyon 20 Materyal sa Magtutudlo

Ang Sagrado nga mga Responsibilidad sa mga Amahan

Ang Langitnong Amahan mitugyan ngadto sa Iyang mga anak nga lalaki og sagrado nga responsibilidad sa pagpanalipod sa ilang mga pamilya. Niini nga leksiyon, ang mga estudyante mopasabot sa mga paagi nga ang mga lalaki makatuman niining responsibilidad. Hisgotan nila kon sa unsang paagi nga ang Langitnong Amahan ug si Jesukristo nahimong hingpit nga ehemplo sa tahas nga anaa sa mga amahan sa pagpanalipod sa ilang mga pamilya. Ang mga estudyante mamalandong ug magplano usab kon sa unsang paagi nga sila makasalig sa tabang gikan sa langit samtang mopaambit sila niining sagrado nga responsibilidad uban sa ilang mga kapikas.

Pahinumdom: Ang mga responsibilidad sa mga lalaki sa pagpangulo ug pagsangkap sa ilang mga pamilya gihisgotan sa miaging mga leksiyon.

Mga Sugyot alang sa Pagtudlo

Ang Dios mao ang hingpit nga ehemplo sa pagkaamahan.

Isip kabahin sa debosyonal alang niini nga leksiyon, ikonsiderar ang pagkanta sa himno nga “O Amahan Ko” (Mga Himno, nu.182) o laing himno nga may kalabotan sa atong Langitnong Amahan.

Mahimo nimong sugdan ang leksiyon pinaagi sa pagpakita og litrato sa usa ka amahan uban sa iyang pamilya ug sa pagpangutana sa mga lalaki diha sa klase sa mosunod nga pangutana:

Unsa ang inyong mga hunahuna, mga pagbati, o mga kabalaka mahitungod sa pagkahimong usa ka amahan?

Dayon pangutan-a ang klase:

Sa inyong hunahuna unsa ang pipila sa labing dagko nga mga hagit sa pagkahimong usa ka matarong nga amahan sa atong panahon karon? (Ikonsiderar ang pagdapit sa mga estudyante sa pagrebyo sa pamahayag ni Presidente Linda K. Burton diha sa seksiyon 1 sa materyal sa pagpangandam.)
Unsa nga mga kalainan ang anaa diha tali sa unsay panglantaw sa mga tawo bahin sa pagkaamahan ug sa unsay panglantaw sa Dios bahin sa pagkaamahan?

Pahinumdomi ang mga estudyante nga samtang nagtuon sa materyal sa pagpangandam, ilang nakat-onan nga ang Langitnong Amahan mao ang hingpit nga ehemplo sa matarong nga pagkaamahan (tan-awa sa pamahayag ni Elder D. Todd Christofferson diha sa seksiyon 1 sa materyal sa pagpangandam).

Pagpalambo sa Atong Pagtudlo ug Pagkat-on

Ipasabot og maayo ang mga ehemplo sa Langitnong Amahan ug ni Jesukristo. Ang Manluluwas mipahimangno sa Iyang mga disipulo nga mahimong sama Niya (tan-awa sa 3 Nephi 27:27). Pangita og mga paaagi aron mapasabot og maayo ang hingpit Niya nga mga ehemplo ug sa Langitnong Amahan samtang maghisgot ka sa mga kamatuoran diha sa klase.

Ipasabot nga makakat-on usab kita og mga baroganan bahin sa matarong nga pagkaamahan gikan sa pagtuon sa ehemplo ni Jesukristo. Magdungan og rebyo sa Juan 10:11–15, ug hisgotan kon unsay nakat-onan sa mga estudyante mahitungod sa matarong nga pagkaamahan gikan sa tahas sa Manluluwas isip atong Maayong Magbalantay.

Unsa kaha ang gikinahanglan sa mga lalaki aron mahimong “andam sa pagkamatay” (bersikulo 15), o isalikway, sa pagtuman sa ilang sagrado nga mga responsibilidad isip mga amahan? (Ikonsiderar ang pagpaambit sa mosunod nga pamahayag ni Elder Christofferson isip kabahin sa panaghisgot: “Isalikway nato [mga lalaki] ang nanobra nga mga ideya sa pagtagbaw sa kaugalingon ug sa pagbuhat sa unsay atong gusto nga maoy kultura karon ug unahon paghunahuna ang kalipay ug kaayohan sa uban” [“Mga Amahan,” Liahona, Mayo 2016, 96].)

Aron matabangan ang mga estudyante sa pagtino og dugang pa nga mga baroganan sa pagkaamahan gikan sa mga ehemplo sa Langitnong Amahan ug ni Jesukristo, ihan-ay ang mga estudyante ngadto sa gagmay nga mga grupo ug pagsangon og usa ka lider alang sa matag grupo. Dapita ang mga estudyante sa paghisgot mahitungod sa ilang buluhaton diha sa “Irekord ang Inyong mga Hunahuna” nga kalihokan sa seksiyon 1 sa materyal sa pagpangandam isip kabahin sa ilang panaghisgotan.

Human sa igong panahon, hangyoa ang pipila ka estudyante nga ipaambit diha sa klase ang mga baroganan nga ilang gihisgotan diha sa grupo. Mahimo nimong dapiton ang usa ka estudyante nga maoy tigsulat ug molista niini nga mga baroganan diha sa pisara.

Ang mga amahan adunay sagrado nga responsibilidad sa pagpanalipod sa ilang mga pamilya.

Dapita ang mga estudyante nga magtinabangay diha sa samang gagmay nga mga grupo alang sa mosunod nga kalihokan. Ihatag ang kopya nga “Handout sa Grupo A” ngadto sa mga lider sa katunga nga grupo ug sa laing katunga ang kopya nga “Handout sa Grupo B.” Dapita ang mga estudyante sa pagsunod sa mga instruksiyon diha sa mga handout.

Handout sa Grupo A—Ang Makapanalipod nga Impluwensiya sa usa ka Mahigugmaon ug Anaa Gayod Kanunay nga Amahan

Materyal sa Magtutudlo sa Ang Mahangtoron nga Pamilya—Leksiyon 20

Dapita ang usa ka sakop sa grupo sa pagbasa og kusog sa pamahayag ni Presidente M. Russell Ballard diha sa seksiyon 2 sa materyal sa pagpangandam. Dayon pangutan-a ang imong grupo:

Unsa ang pipila ka paagi nga ang usa ka amahan makatuman sa iyang sagrado nga responsibilidad sa pagpanalipod sa iyang pamilya?

Ipaambit ang mosunod nga pamahayag ni Elder D. Todd Christofferson nganha sa imong grupo: “Ang mga amahan talagsaon ug dili mahulipan” (“Mga Amahan,” Liahona, Mayo 2016, 93). Dayon pangutan-a ang imong grupo:

Sa unsang paagi nga ang mga amahan “talagsaon ug dili mahulipan”? (Mahimo nimong isugyot nga ang imong grupo modangop ngadto sa mga pagtulon-an diha sa seksiyon 2 sa materyal sa pagpangandam samtang maghisgot niini nga pangutana.)
Sa unsang mga paagi nga ikaw napanalanginan ug napanalipdan pinaagi sa gugma ug pagpanginlabot sa usa ka matarong nga amahan o gipakasama nga amahan sa imong kinabuhi?

Handout sa Grupo A—Ang Makapanalipod nga Impluwensiya sa usa ka Mahigugmaon ug Anaa Gayod Kanunay nga Amahan

Handout sa Grupo B—Pagpanalipod sa mga Pamilya pinaagi sa Balaanong Pagpadayag ug Gahom sa Pagkapari

Materyal sa Magtutudlo sa Ang Mahangtoron nga Pamilya—Leksiyon 20

Magdungan og rebyo sa Mateo 2:13–15, nga mangita kon giunsa ni Jose pagpanalipod si Maria ug Jesus.

Unsa ang atong makat-onan gikan niini nga asoy kon asa ang mga amahan makadawat og tabang sa paggiya ug pagpanalipod sa ilang mga pamilya? Sa unsang paagi nga ang pagpanalipod makatabang sa mga amahan sa atong panahon karon?

Dapita ang usa ka sakop sa grupo sa pagbasa og kusog sa mga pamahayag ni Presidente Boyd K. Packer ug Presidente Russell M. Nelson diha sa seksiyon 3 sa materyal sa pagpangandam. Dayon pangutan-a ang imong grupo:

Unsa ang labing mahinungdanon niini nga pamahayag kaninyo, ug ngano?
Sa unsang mga paagi nga kamo napanalipdan pinaagi sa balaanong pagpadayag o gahom sa pagkapari sa usa ka matarong nga amahan o gipakasama nga amahan sa inyong kinabuhi?

Human sa igong panahon, dapita ang usa ka estudyante kansang grupo nagtuon sa “Handout sa Grupo A” ug ang usa ka estudyante kansang grupo nagtuon sa “Handout sa Grupo B” sa pagpaambit nganha sa klase sa unsay ilang nakat-onan gikan sa ilang mga panaghisgot. Aron madugangan ang nakat-onan sa mga estudyante, ikonsiderar ang pagpaambit og usa ka pananglitan kon sa unsang paagi nga ikaw napanalanginan ug napanalipdan pinaagi sa gugma, pagpanginlabot, balaanong pagpadayag, o gahom sa pagkapari sa usa ka matarong nga amahan o gipakasama nga amahan sa imong kinabuhi. (O, mahimo ka nga mopaambit og usa ka pananglitan gikan sa kinabuhi ni Elder Gary E. Stevenson sa Korum sa Napulog Duha ka Apostoles. Ang amahan ni Elder Stevenson nakadawat og pasidaan gikan sa Espiritu nga nakapanalipod ni Elder Stevenson gikan sa usa ka bitin sa dihang batan-on pa siya [tan-awa sa Robert D. Hales, “Elder Gary E. Stevenson: Usa ka Masinabuton nga Kasingkasing,” Liahona, Hunyo 2016, 26].)

Mahimo nimong ipasabot nga isip magkauban diha sa kaminyoon, ang mga asawa ug mga inahan moambit sa responsibilidad sa pagpanalipod sa ilang mga pamilya. Ang mga bana ug mga asawa kinahanglan nga magtinabangay ug magtinambagay samtang nagtuman sila niining sagrado nga katungdanan.

Hatagi og panahon ang mga estudyante sa pagpamalandong sa mosunod nga mga pangutana ug pagrekord sa bisan unsa nga mga impresyon nga ilang madawat (mahimo nimong ipakita ang mga pangutana):

Unsa ang imong mahimo karon aron mas higugmaon ug mapanalipdan ang imong pamilya ug ang uban?
Sa unsang paagi nga ikaw makasuporta sa mga lalaki sa imong kinabuhi nga mahimong takos nga mga tigpanalipod sa ilang mga pamilya ug sa uban?
Sa unsang paagi nga ang Ginoo makatabang nimo niini nga mga paningkamot?

Sa pagtapos sa leksiyon, ikaw o ang usa ka estudyante mahimong mopamatuod bahin sa kaimportante sa mga amahan ug sa ilang panginahanglan sa pagsunod sa mga ehemplo sa Langitnong Amahan ug ni Jesukristo sa pagtuman sa ilang sagrado nga mga responsibilidad diha sa pamilya.

Alang sa Sunod nga Higayon

Ikonsiderar ang pag-awhag sa mga estudyante sa paghunahuna sa ilang mga anak karon o sa umaabot samtang magtuon sila sa materyal sa pagpangandam alang sa sunod nga klase. Mahimo usab nimong hangyoon ang mga estudyante nga hinumdoman ang mga panahon sa ilang pagkabata sa dihang mibati sila nga gihigugma, kinahanglang disiplinahon, o nakakat-on sa pagserbisyo sa uban.